«2020 جىلى رەسپۋبليكالىق بيۋدجەتتىڭ اتقارىلۋى ىسكەرلىك بەلسەندىلىكتىڭ ايتارلىقتاي تومەندەۋى مەن COVID-19 بايلانىستى قاتاڭ شەكتەۋ شارالارى جاعدايىندا جۇزەگە اسىرىلدى.
جالپى ىشكى ءونىم ناقتى 2,6 پايىزعا تومەندەدى. بۇل نەگىزىنەن كارانتيندىك شارالاردىڭ ەنگىزىلۋىنەن قىزمەتتەر كورسەتۋدىڭ 5,4 پايىزعا تومەندەۋىنە بايلانىستى بولدى. دەگەنمەن, ەكونوميكانىڭ ناقتى سەكتورى 2 پايىزعا وسكەنىن كورسەتتى.
اتاپ ايتقاندا, قۇرىلىس – 11,2 پايىزعا, اقپارات جانە بايلانىس – 8,7 پايىزعا, اۋىل شارۋاشىلىعى – 5,6 پايىزعا, وڭدەۋ ونەركاسىبى – 3,9 پايىزعا. نەگىزگى كاپيتالعا سالىناتىن ينۆەستيتسيالار كولەمى 3,4 پايىزعا تومەندەدى», دەدى ە. جاماۋباەۆ.
ونىڭ ايتۋىنشا, بيۋدجەتتىڭ باسىم باعىتتارى توتەنشە جاعداي كەزىندە ازاماتتاردى جانە ناقتى سەكتوردى قولداۋعا ارنالعان شىعىستار بولدى. بۇل – الەۋمەتتىك تولەمدەردى يندەكستەۋ, شاعىن جانە ورتا بيزنەس سۋبەكتىلەرىنە سالىق اۋىرتپالىعىن تومەندەتۋ, «جۇمىسپەن قامتۋ جول كارتاسى», «بيزنەس جول كارتاسى», «ەڭبەك» جانە باسقا دا باعدارلامالار. «ەكونوميكالىق ءوسىمدى قالپىنا كەلتىرۋ بويىنشا كەشەندى جوسپار قابىلداندى. زارداپ شەككەن سالالاردان شامامەن 700 مىڭ كاسىپكەر سالىقتىق ىنتالاندىرۋ جانە جەڭىلدىك شارالارىمەن قامتىلدى.
شاعىن جانە ورتا بيزنەس كرەديتتەرى جەڭىلدەتىلگەن شارتتارمەن قايتا قارجىلاندىرىلدى. 40 مىڭعا جۋىق جوبا ارزانداتىلعان مولشەرلەمەمەن قارجىلاندىرىلدى. زارداپ شەككەن سالالاردا قارىز الۋشىلاردىڭ 80 پايىزى كرەديتتەر بويىنشا تولەمدەرىن كەيىنگە قالدىرۋ مۇمكىندىگىن الدى. وسى شارالار جۇمىسپەن قامتۋ مەن ىسكەرلىك بەلسەندىلىكتى ساقتاۋعا ىقپال ەتتى», دەدى مينيستر.
سونىمەن قاتار ول جۇمىسسىزدىق 4,9% دەڭگەيىندە ساقتالعانىن ايتتى.
«بيۋدجەت پروتسەسىنىڭ يكەمدىلىگى قامتاماسىز ەتىلدى, مەملەكەتتىك ساتىپ الۋدىڭ ارنايى ءتارتىبى ەنگىزىلدى. وسىنداي جاعدايلاردا رەسپۋبليكالىق بيۋدجەتتىڭ اتقارىلۋى مىناداي كورسەتكىشتەرمەن سيپاتتالادى. بيۋدجەت تۇسىمدەرى 100,3 پايىزعا ورىندالىپ, 12 ترلن 49 ملرد تەڭگەنى قۇرادى. شىعىستار 98,3 پايىزعا يگەرىلدى جانە 14 ترلن 234 ملرد تەڭگەنى قۇرادى. الەۋمەتتىك شىعىستار 2019 جىلمەن سالىستىرعاندا 1,4 ترلن تەڭگەگە ۇلعايىپ, 6,6 ترلن تەڭگەنى قۇرادى.
بۇل رەسپۋبليكالىق بيۋدجەتتىڭ جالپى كولەمىنىڭ 47 پايىزى. بيۋدجەت تاپشىلىعى 2 ترلن 185 ملرد تەڭگە نەمەسە جالپى ىشكى ءونىمنىڭ 3,1%-ى بولدى. مەملەكەتتىك بورىش قاۋىپسىز دەڭگەيدە قالىپ وتىر», دەدى ەرۇلان جاماۋباەۆ.
