66 كيلو سالماق دارەجەسىندە بەلدەسكەن ەلدوس جۇماحانوۆ جارىستى وتە كەرەمەت باستادى. العاشقى اينالىمدا 2018 جىلعى ەۋروپا چەمپيونى, 2017 جىلعى سول جارىستىڭ كۇمىس جۇلدەگەرى سلوۆەنيالىق اندرەا گامبوچتى جولىنىن ىعىستىرعان ول ىلە-شالا اۋستراليالىق ناتان كاتتس جانە موڭعوليالىق حەرلەن گاندبولدان ايلاسىن اسىردى. بۇل باسەكەلەردىڭ بارلىعىنىڭ شيەلەنىستى وتكەنى سونشالىق, جەڭىمپازدى انىقتاۋ ءۇشىن قوسىمشا ۋاقىت قاجەت بولدى. بۇل رەتتە ءوزىنىڭ جانكەشتىلىگى مەن تاباندىلىعىنىڭ ارقاسىندا جۇماحانوۆ جەڭىسكە جەتتى.
شيرەك فينالدا بەلورۋسسيالىق دميتري مينكوۆتان باسىم تۇسكەن قازاق دزيۋدوشىسى جارتىلاي فينالدا الەمدىك رەيتينگتىڭ كوشباسشىسى, بيىلعى جىلعى ەۋروپا چەمپيونى يتاليالىق مانۋەل لومباردومەن ايقاستى. باسەكە بارىسىندا جاراقات العانىنا قاراماستان قانداسىمىز بارىن سالدى. بىراق اپەننين تۇبەگىنىڭ تۇلەگى ءبىزدىڭ جىگىتتىڭ الدىن وراپ كەتتى. ودان كەيىن ەلدوس قولا مەدال ءۇشىن تالاسۋعا ءتيىس ەدى. الايدا سونىڭ الدىندا عانا العان جاراقاتى تىم اۋىر بولىپ, جۇماحانوۆ تاتاميگە شىقپادى. ءسويتىپ, جەڭىس موڭعوليانىڭ وكىلى يوندونپەرنەنلەي ءباسحۋدىڭ ەنشىسىنە جازىلسا, قانداسىمىز بەسىنشى ورىندا قالىپ قويدى.
ال 52 كيلو سالماقتاعى نۇرسۇلۋ ەراليەۆا ءوزىنىڭ تۇساۋكەسەر كەزدەسۋىندە وليمپيا ويىندارى مەن الەم چەمپيوناتىنىڭ قولا جۇلدەگەرى, ەۋروپا ويىندارىنىڭ جەڭىمپازى, قۇرلىق چەمپيونى بەلگيالىق شارلين ۆان سنيكتى سان سوقتىرعانىمەن, كەلەسى كەزدەسۋدە موڭعوليالىق سوسوربارام لحاگۆاسۋرەنگە ەسە جىبەردى.
الەم چەمپيوناتىنىڭ جەڭىمپازدارى مەن جۇلدەگەرلەرى
ايەلدەر
52 كيلو: 1. اي شيشيمە (جاپونيا), 2. انا بوكس پەرەس (يسپانيا), 3. فابين كوچەر (شۆەيتساريا) مەن گەفەن پريمو (يزرايل).
ەرلەر
66 كيلو: 1. دزەسيرو مارۋياما (جاپونيا), 2. مانۋەل لومباردو (يتاليا), 3. ياكۋب شاميلوۆ (رەسەي) پەن يوندونپەرنەنلەي باسحۋ (موڭعوليا).
