08 ماۋسىم، 2021

وگەي بالانىڭ قىزعانىشى

365 رەت كورسەتىلدى

قازىرگى تاڭدا ەلىمىزدە سوتتالعان ەكى مىڭعا جۋىق پەدوفيل تەمىر توردىڭ ارعى جاعىندا وتىر. ولاردىڭ 32-ءسى بيىل ءوز جازالارىنىڭ مەرزىمىن تولىق وتەپ، بوستاندىققا شىعۋى ءتيىس. وسىعان وراي قۇقىق قورعاۋشىلار مەن پسيحولوگتەر ورىندى الاڭداۋشىلىق ءبىلدىرۋ ۇستىندە. سەبەبى پەدوفيلدەردىڭ بۇل توبى – وسى ايۋاندىق قىلمىسقا قارسى زاڭناما قاتاڭ­داتىلعانعا دەيىن سوتتالىپ، الدە­قايدا جەڭىل جازاعا تارتىلعاندار ەكەن.

مەملەكەت باسشىسى قاسىم-جومارت توقاەۆتىڭ العاشقى جولداۋىندا بەرگەن تاپسىرماسىنا سايكەس پەدوفيلياعا قاتىستى زاڭناما 2019 جىلى ايتارلىقتاي قاتايتىلعانى ءمالىم. قازىر قىلمىستىق كودەكس بويىنشا پەدوفيلدەرگە جاساعان قىلمىسىنىڭ اۋىرلىعىنا قاراي 20 جىلعا نەمەسە ءومىر بويى باس بوستاندىعىنان ايى­رۋ­عا دەيىنگى قاتاڭ جازالار كەسىلەدى. ال جاس بالاعا قاتىستى اتا-اناسى، وگەي اكەسى، وگەي شەشەسى، پەداگوگ نە ونى تاربيەلەۋ جونىندەگى مىندەتتەر جۇكتەلگەن وزگە ادام كۇش قولدانباي جاساعان ازعىندىق ءىس-ارەكەت ءۇشىن 10 جىلدان 15 جىلعا دەيىنگى مەرزىمگە باس بوستاندىعىنان ايىرۋ جازاسى كوزدەلگەن. سوعان قاراماستان، قاتاڭ زاڭ كۇشىنە ەنگەن وتكەن جىلى ەلىمىزدە بالالاردىڭ جىنىستىق قولسۇعىلماۋشىلىعىنا بايلانىستى 300-دەن استام قىلمىس تىركەلگەن. ىشكى ىستەر مينيسترلىگى جۇرگىزگەن تالداۋ پەدوفيلدەردىڭ 80 پايىزى – جابىرلەنۋشىلەردىڭ وتباسى مۇشەلەرى نەمەسە جاقىندارى ەكەندىگىن كورسەتكەن.

وسى رەتتە ويلانارلىق جايت تا بار. ول – وگەي بالانىڭ ءوز اناسىن قىزعانىپ، وگەي اكەسىنە جالا جابۋى. ماسەلەن، جۋىردا ەلوردادا تۇراتىن، جاسى الپىستى القىمداعان ايەل بىزگە جالعىز ۇلى ارماننىڭ (ەسىمى وزگەرتىلدى – ك.م.) وسىنداي جالادان جا­زىقسىز تۇرمەگە قامالعاندىعىن ايتىپ، مۇڭىن شاقتى. وقيعا بىلاي بولعان ەكەن:

ارمان وسىدان ون شاقتى جىل بۇرىن ءسۇيىپ قوسىلعان ايەلىمەن ارالارى سۋىپ، اجىراسىپ كەتەدى. ءسويتىپ جۇرگەندە ءوزى سياقتى جۇبايىمەن ايىرىلىسقان، ءبىر كىشكەنتاي قىزى بار جاس كەلىنشەكپەن كوڭىل قوسىپ، ەكىنشى رەت ۇيلەنەدى. مۇنى ەستىگەن الگى كەلىنشەكتىڭ قايىن اكە-شەشەسى كەلىپ، سۇيىكتى نەمەرەلەرىن وزدەرى تاربيەلەگىسى كەلەتىندىگىن ايتىپ، قولقا سالىپ، بەس جاسار قىزدى الىپ كەتەدى.

ارمان ەكىنشى ايەلىمەن بىرگە سەگىز جىلداي بيزنەسپەن اينالىسىپ، تاتۋ-ءتاتتى تۇرمىس كەشەدى. ودان ەكى پەرزەنت سۇيەدى. كەلىنشەگىنە سەنگەنى سونشالىق، ءومىر بويى جيعان دۇنيە-مۇلكىنىڭ بارلىعىن ونىڭ اتىنا جازدىرادى. ماڭدايىنىڭ سورىنا قاراي، بىلتىر اتا-اجەسىمەن بىرگە اۋىلدا تۇرىپ جاتقان 13 جاسار وگەي قىزى كۇتپەگەن جەردەن استاناعا كەلىپ، ەندى انا­سىمەن بىرگە تۇرعىسى كەلەتىندىگىن ايتادى. ايەلىنىڭ قاباعىنا قاراپ ۇيرەنگەن ارمان بىردەن كەلىسىمىن بەرەدى. بىراق ەلورداعا كەلگەن كۇنىنەن باستاپ ول قىز وگەي اكەسىن جاقتىرمايتىندىعىن سەز­دىرە باستايدى. مەكتەپتە بىرگە وقيتىن قۇربىلارىنا شەشەسىن وگەي اكەسىنەن ولەر­دەي قىزعاناتىندىعىن، ونى جەك كورە­تىندىگىن، سوندىقتان ولاردى قالايدا ايى­رىلىستىرۋعا تىرىساتىندىعىن ايتىپ جۇرەدى.

اقىرى، ارام پيعىلىن ىسكە اسىرۋدىڭ بىردەن-ءبىر جولى وسى دەپ ۇيعارسا كەرەك، ءبىر كۇنى شەشەسىنە: «وگەي اكەم تۇندە ساعان بىلدىرمەي، مەنىڭ جاتقان بولمەمە كىرىپ، ۇيىقتاپ جاتقان مەنىڭ دەنەمدى سيپالاپ كەتۋدى شىعاردى. ول كىسىدەن قورقامىن. ماعان اراشا تۇسكىڭ كەلسە، ونىمەن ايىرىلىس»، دەيدى وتىرىك جىلامسىراپ. شەشەسى كۇيەۋىمەن ۇرسىسىپ، ونىڭ اقتالىپ ايتقان سوزىنە سەنبەي، اشۋ ۇستىندە پوليتسياعا حابار بەرەدى. جەدەلدەتىپ جەتكەن پوليتسەيلەر ءاي-شايعا قاراماي، ارماندى تۇتقىنعا الىپ، تەرگەۋ وقشاۋلاعىشىنا اپارىپ توعىتادى. اقىرى وعان وگەي قىزى مەن ايەلىنىڭ كورسەتىندىسىنە سۇيەنگەن ءبىرىنشى ينستانتسياداعى سوت 10 جىلعا باس بوستاندىعىنان ايىرۋ تۋرالى ۇكىم شىعارادى.

كەيىن ارماننىڭ ايەلى قىزىنىڭ قىزعا­نىشپەن كۇيەۋىنە جالا جاپقاندىعىن ءبىلىپ، بارماعىن تىستەپ وكىنىپ، قىلمىستىق ءىستى جۇرگىزگەن تەرگەۋشىگە كەلىپ شىنىن ايتقاندا ول: «جۇبايىڭىزعا جالا جاپقاندىعىڭىز ءۇشىن تۇرمەگە قىزىڭىزبەن بىرگە وتىرعىڭىز كەلمەسە، ءىستى قايتا قاراۋ تۋرالى ەندى ەشكىمگە ءتىس جارماڭىز»، دەسە كەرەك – اياق استىنان ءۇيى مەن وزگە دە مۇلكىن دەرەۋ ساتىپ، ءۇش بالاسىمەن بىرگە توركىنىنە كوشىپ كەتىپتى. ال ارماننىڭ اناسى قازىر ۇلىن اراشالاپ الۋ ءۇشىن شاقشاداي باسىن شاراداي قىلىپ، شارق ۇرىپ ءجۇر.

بۇدان تۇيەر وي: پەدوفيليا بويىنشا كۇدىكتى وگەي اكەگە قاتىستى قىلمىستىق ءىستى قاراعاندا تەرگەۋشى مەن سۋديا وگەي بالانىڭ اناسىنا دەگەن قىزعانىشى فاكتورىن مۇقيات ەسكەرگەندەرى ءجون.

 

سوڭعى جاڭالىقتار

الماتىداعى احۋال كۇردەلى

ايماقتار • بۇگىن، 19:45

بالالار Ashyq جۇيەسىنە ەنگىزىلە مە؟

قازاقستان • بۇگىن، 19:20

شىمكەنتتە كارانتين كۇشەيتىلەدى

ايماقتار • بۇگىن، 15:47

اتوم كولگە ساپار

ايماقتار • بۇگىن، 15:37

قازاقستاندا جاڭا تەلەارنا اشىلدى

قازاقستان • بۇگىن، 11:55

ۇقساس جاڭالىقتار