ايماقتار • 07 ماۋسىم، 2021

الماتىدا بانكتەن 2 ملرد تەڭگە ۇرلاعان كۇدىكتىلەر ۇستالدى

34 رەت كورسەتىلدى

قارجى نارىعىن رەتتەۋ جانە دامىتۋ اگەنتتىگىنىڭ كيبەرقاۋىپسىزدىك باسقارماسىنىڭ ماماندارى ەكى قازاقستاندىق بانكتەن اقشا ۇرلاۋ ءىسىنىڭ تەرگەلۋ جايىن ايتىپ بەردى، دەپ حابارلايدى Egemen.kz.

اگەنتتىك تاراتقان مالىمەتكە سايكەس، 2 ملرد تەڭگە ۇرلاعان «كارباناك/كوبالت» ترانسۇلتتىق كيبەرقىلمىستىق ۇيىمىنىڭ مۇشەلەرى سوتتالدى. الماتى پروكۋراتۋراسى اگەنتتىكتىڭ كومەگىمەن قىلمىسكەرلەر ارەكەتىنىڭ جۇيەلىلىگىن قالپىنا كەلتىرىپ، قاجەتتى دالەلدەر بازاسىن جيناقتاي الدى. 2019-2020 جىلدارى قارجى رەتتەۋشىسىنىڭ قىزمەتكەرلەرى العاش رەت بانكتەرگە جاسالعان كيبەرشابۋىلدار فاكتىلەرى بويىنشا قىلمىستىق ءىستى تەرگەپ-تەكسەرۋ كەزىندە پروكۋراتۋراعا كومەك كورسەتتى.

ء«بىز جاسالعان قىلمىستاردىڭ تسيفرلىق دالەلدەرىن جيناپ، تالداۋ جاساۋعا كومەكتەستىك. سونىڭ ناتيجەسىندە حاكەرلەردىڭ ارەكەتتەرىن سوت ۇرلىق، زاڭسىز جويۋ، اقپاراتتى تۇرلەندىرۋ، اقپاراتتىق جۇيەنىڭ جۇمىسىن بۇزۋ جانە اقپاراتتى زاڭسىز الۋ دەپ جىكتەدى. ترانسۇلتتىق قىلمىستىق توپتىڭ قاتىسۋشىلارى مۇنداي ۇرلىق جاساۋ ءۇشىن ارنايى قالىپتاستىرىلعان زياندى كومپيۋتەرلىك باعدارلامالاردى پايدالانىپ وسى ارەكەتتەردى 2016-2017 جىلدارى ەكىنشى دەڭگەيدەگى ەكى بانككە قاتىستى جاساعان»، دەدى كيبەرقاۋىپسىزدىك باسقارماسىنىڭ ءبولىم باستىعى اناتولي پۋدەل.

پروكۋراتۋرا مەن اگەنتتىكتىڭ بىرلەسكەن قىزمەتىنىڭ ناتيجەسىندە ماتەريالدار دايىندالىپ، الماتى قالاسى بوستاندىق اۋداندىق سوتىنا بەرىلدى جانە قىلمىستىق توپتىڭ ەكى قاتىسۋشىسىنا قاتىستى ايىپتاۋ ۇكىمى شىعارىلدى. سوت ولارعا 8 جىل باس بوستاندىعىنان ايىرۋ تۇرىندە جازا تاعايىندادى. قىلمىستىق توپتىڭ قالعان مۇشەلەرى انىقتالىپ، ولارعا حالىقارالىق ىزدەۋ جاريالاندى.

«تەرگەۋ «كارباناك/كوبالت» ترانسۇلتتىق كيبەرقىلمىستىق توبىنىڭ جوعارىدا كورسەتىلگەن قىلمىستى جاساۋ كەزىندە 13 ەلدىڭ اۋماعىندا ارەكەت ەتكەنىن جانە 2 ملرد تەڭگەدەن اسا جىمقىرعانىن، سونداي-اق تاعى 8 ملرد تەڭگەنى ۇرلاۋ بويىنشا ارەكەتى ءساتسىز بولعانىن دالەلدەدى. ولار قىلمىستىق ويىن بىرنەشە كەزەڭمەن ىسكە اسىرعان: بانكتەرگە زياندى فايلدار سالىنعان ەلەكتروندىق حاتتار جىبەرگەن، ولاردى اشقان كەزدە كومپيۋتەرلەر ءبىر-ءبىرىن زاقىمداي باستاعان. حاكەرلەر قاشىقتان باسقارۋ رەجيمىندە بانك قىزمەتكەرلەرىنىڭ قۇپياسوزدەرىن ۇرلاۋ ءۇشىن باعدارلامالار ورناتقان، 200-دەن اسا تولەم كارتاسىن اشقان، بانكتەردىڭ پروتسەسسينگ جۇيەلەرىنە رۇقساتسىز اكىمشىلىك تۇرعىدان قول جەتكىزگەن. ودان كەيىن تولەم كارتالارىنا كوپ ميلليوندى كرەديتتىك ليميتتەر بەلگىلەگەن، بانكوماتتاردان قاراجات الۋعا قويىلعان شەكتەۋلەردى الىپ تاستاعان، ودان ءارى قاراجات ءتۇرلى ەلدەردەگى بانكوماتتار ارقىلى قولما-قول اقشاعا اينالدىرىلعان»، دەپ ءتۇسىندىردى اناتولي پۋدەل.

الماتى پروكۋراتۋراسىنىڭ دەرەكتەرى بويىنشا، «كارباناك/كوبالت» – بۇل بۇكىل الەمدەگى بانكتەرگە شابۋىل جاساۋمەن اينالىسقان ترانسۇلتتىق كيبەرقىلمىستىق ۇيىم. ولار الەمنىڭ 40 ەلىندە 100-دەن اسا قارجى ۇيىمىن توناعان، ولاردىڭ قىزمەتىنەن بولعان شىعىن شامامەن 1 ملرد دوللاردى قۇرايدى.

سوڭعى جاڭالىقتار

ەربوسىن ۇلىن اۋىر سىناق كۇتىپ تۇر

كاسىپقوي بوكس • بۇگىن، 18:55

اقمولا وبلىسىندا مەكتەپ ورتەندى

ايماقتار • بۇگىن، 15:29

ەكپە سالدىرۋدا بەلسەندىلىك بايقالادى

كوروناۆيرۋس • بۇگىن، 14:10

چارلو شايقاسقا شاقىرۋدان شارشامايدى

كاسىپقوي بوكس • بۇگىن، 13:27

ۇقساس جاڭالىقتار