وقيعا بولعان ماڭايدا تۇراتىن قالا تۇرعىندارى تاڭعى ءتاتتى ۇيقىدان بورودين دۇكەنىنىڭ ارتىنان اتىلعان وقتىڭ داۋسىنان ويانعاندارىن ايتادى.
«6 ماۋسىم كۇنى تاڭعى ساعات 6:00-دە بورودين دۇكەنىنىڭ ارتىنداعى گوگول 98 مەكەنجايىنان شاقىرتۋ ءتۇستى. مەكەنجايعا 3 بريگادا باردى. وقيعا ورنىندا ءۇش ادام جاراقات العان. ءبىر بريگادا بوكسەسىنەن پىشاق جاراقاتىن العان ادامدى الىپ كەتتى. ەكىنشى جەدەل جاردەم كولىگىنە كەۋدە تۇسى كوگەرىپ كەتكەن جابىرلەنۋشى ءمىندى. بۇل – تراۆماتيكالىق قارۋ قولدانۋ ناتيجەسىندە تۇسكەن ءىز بولۋى مۇمكىن. ال ءۇشىنشى ادامنىڭ جاعى, تىستەرى سىنعان. ونى اۋرۋحاناعا ءۇشىنشى بريگادا جەتكىزدى», دەپ مالىمدەدى وبلىستىق دەنساۋلىق ساقتاۋ باسقارماسى.
پوليتسيا اتالمىش وقيعاعا قاتىستى سوتقا دەيىنگى تەرگەۋ شارالارى باستالعانىن حابارلادى.
«6 ماۋسىمدا ساعات تاڭعى 6-لار شاماسىندا گوگول كوشەسىندە بىرنەشە ادامنىڭ توبەلەسىپ جاتقانى تۋرالى مالىمەت كەلىپ ءتۇستى. وقيعا ورنىنا جەدەل تەرگەۋ توبى مەن جەرگىلىكتى پوليتسيا قىزمەتىنىڭ جاساقتارى جەتىپ, جانجالدى توقتاتتى. وقيعاعا قاتىسقان ادامدار مەن كۋاگەرلەردەن پوليتسيا بولىمشەسىندە جاۋاپ الىندى. ناتيجەسىندە, جانجالدىڭ قىزعا تالاسقان ەكى جاس جىگىتتىڭ اراسىندا تۋىنداعانى انىقتالدى. ودان كەيىن جانجالعا ەكى جاقتىڭ دا تانىستارى ارالاسىپ, ونىڭ ارتى توبەلەسكە ۇلاسقان.
وقىس وقيعا تۋرالى پوليتسياعا حابارلاعان ادام وق داۋسىنا ۇقسايتىن داۋىس ەستىگەنىن ايتقان بولاتىن. سوندىقتان قازىر سوتقا دەيىنگى تەرگەۋ شارالارى اياسىندا بۇل مالىمەتتىڭ راس-وتىرىك ەكەندىگى تەكسەرىلىپ جاتىر. الايدا اۋرۋحاناعا تۇسكەندەردىڭ ىشىندە وق جاراقاتىن العان ەشكىم جوق», دەپ مالىمدەدى وبلىستىق پوليتسيا دەپارتامەنتىنىڭ ءباسپاسوز قىزمەتى.
قوستاناي وبلىسى
