پيلوتتىق جوبا بويىنشا ەلىمىزدە بوتەلكەلەردى قايتا وڭدەۋگە قابىلدايتىن ەكىنشى اۆتومات ورناتىلدى. العاشقى فاندومات ءبىر اي بۇرىن الماتىداعى «دوستىق پلازا» ساۋدا ۇيىندە ورناتىلعان بولاتىن. شاراعا ەكولوگيا جانە تابيعاتتى قورعاۋ ءمينيسترى ماعزۇم مىرزاعاليەۆ قاتىستى.
ءمينيستردىڭ مالىمدەۋىنشە, وسىنداي فونداماتتار ەلىمىزدەگى تەك ءىرى قالالاردا عانا ەمەس وڭىرلەرگە دە كوپتەپ قويىلادى.
«جىل سوڭىنا دەيىن ەلىمىزدە بوتەلكەلەردى قايتا وڭدەۋگە قابىلدايتىن 1,5 مىڭ فاندومات ورناتىلاتىن بولادى. سونداي-اق تەك ساۋدا ورتالىقتارىندا عانا ەمەس اشىق الاڭدارعا دا قويىلادى. بۇل فاندوماتتاردىڭ باستى ماقساتى ءىزدىڭ ەكولوگيالىق احۋالدى جاقسارتۋ, ياعني پلاستيك ونىمدەردى اينالىمعا ەنگىزۋ. بۇل باستاماعا مينيسترلىكتەن دە قولداۋ كورسەتىلەتىن بولادى», دەيدى مينيستر.
«Ecoplatform» جوباسىنىڭ جەتەكشىسى ادىلەت نۇرسەلەنوۆ فاندوماتتىڭ حالىققا پايداسى جونىندە ايتىپ كەتتى.
«اتالعان فاندوماتتار پلاستيك جانە اليۋميني ونىمدەردى سۇرىپتاپ, قالدىقتارىن جيناۋدىڭ جاقسى ءبىر شەشىمى. بۇل بوكستار رەسەيدىڭ «Ecoplatform» كومپانياسىنىڭ ءونىمى, ءبىز اتالعان كومپانيانىڭ قازاقستانداعى وكىلىمىز. ءبىر فاندوماتتىڭ قۇنى ورتا ەسەپپەن – 2,5 ملن-دى قۇرايدى. ءبىر اۆتومات شامامەن 700-دەي بوتەلكەنى جيناي الادى. قازىرگى تاڭدا اۆتوماتتار ەلىمىزدەگى ەكى ءىرى مەگاپوليستە ورناتىلدى, الداعى ۋاقىتتا شىمكەنتكە جانە باسقا دا وڭىرلەرگە قويۋ جوسپاردا بار», دەپ مالىمدەدى جوبا جەتەكشىسى.
ايتا كەتەيىك, جينالعان بوتەلكەلەر شىمكەنتتەگى قايتا وڭدەۋ زاۋىتىندا ىرىكتەلىپ, قايتا ءونىم شىعارادى.
