كەزدەسۋ بارىسىندا تاراپتار مادەني-گۋمانيتارلىق ىنتىماقتاستىقتى ارتتىرۋعا پارلامەنت دەپۋتاتتارىنىڭ ىقپالىن جانە تۋريزم, تسيفرلىق تەحنولوگيا سالالارىندا بىرلەسىپ ارەكەت ەتۋ ماسەلەلەرىن تالقىلادى. سونداي-اق, دەپۋتاتتاردىڭ نازارىن قاجەت ەتەتىن وزەكتى پروبلەمالار دا كوتەرىلدى. سونداي تۇيتكىلدەردىڭ ءبىرى ترانسشەكارالىق سۋ رەسۋرستارىن پايدالانۋ ماسەلەسى.
«قازىرگى تاڭدا ترانسشەكارالىق سۋ رەسۋرستارىن پايدالانۋ ماسەلەسىندە بەلسەندى ىنتىماقتاستىق ورنادى. سۋ قاتىناستارى سالاسىنداعى ىنتىماقتاستىق ماسەلەلەرى جونىندەگى جول كارتاسى ىسكە اسىرىلىپ جاتىر. بۇل باعىتتاعى ءوزارا بايلانىستا ترانسشەكارالىق سۋ نىساندارىن بىرلەسىپ باسقارۋ, قولدانۋ جانە ساقتاۋ تۋرالى كەلىسىمدى كەلىسۋ جۇمىستارىن اياقتاۋدىڭ ماڭىزى زور», دەدى ماۋلەن اشىمباەۆ.
پالاتا سپيكەرلەرى حالىقارالىق ارەناداعى پارلامەنتارالىق ىنتىماقتاستىق ماسەلەلەرىن دە ءسوز ەتتى.
ء«بىز ءۇشىن حالىقارالىق ۇيىمداردا ءبىر-ءبىرىمىزدى قولداپ, كەلىسىپ ارەكەت ەتۋ ماسەلەسى دە ماڭىزدى. ەقىۇ, پاو جانە باسقا دا الاڭدار اياسىندا وسىنداي قاعيدانى قولدانۋدىڭ اسەرى مول دەپ ەسەپتەيمىز», دەدى قازاقستان سەناتىنىڭ توراعاسى.
ءىس-شارا سوڭىندا سۇحباتتاسۋشىلار قوسمەملەكەتتىڭ بارلىق سالاداعى سەنىمدى جانە بەلسەندى ديالوگى الداعى ۋاقىتتا دا ەكىجاقتى قاتىناستاردىڭ دايەكتى دامۋىنا سەرپىن بەرەتىنىن اتاپ ءوتتى.
سونىمەن قاتار بۇگىن ماۋلەن اشىمباەۆ تاشكەنت قالاسىنداعى «تەحنوپارك» ونەركاسىپتىك كاسىپورىندار توبىنىڭ قىزمەتىمەن تانىستى. بۇل جەردە ونەركاسىپتىك ونىمدەر شىعاراتىن ونداعان كومپانيا جۇمىس ىستەيدى.
ودان بولەك, سەنات توراعاسى ساپار اياسىندا تولە بي كەسەنەسىنە جانە «حازىرەت يموم» كەشەنىنە باردى.
