بۇل تىزىمگە قارۋدىڭ بارلىق ءتۇرى, وق-ءدارى, جارىلعىش زاتتار, سونداي-اق تەسۋگە جانە كەسۋگە ارنالعان زاتتار كىرەدى.
ء«بىلىم ۇيىمدارىندا تىيىم سالىنعان زاتتاردىڭ ءتىزىمىن ازىرلەۋگە ءبىز وتكەن جىلى كىرىستىك. وسى جىلدىڭ قاڭتار ايىنان باستاپ ء«بىلىم تۋرالى» زاڭ شەڭبەرىندە وسى ءتىزىمدى ازىرلەۋ جانە بەكىتۋ ءبىزدىڭ قۇزىرەتىمىزدە. تىيىم سالىنعان زاتتاردىڭ ءتىزىمى ىشكى ىستەر مينيسترلىگى, دەنساۋلىق ساقتاۋ مينيسترلىگى, تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىكتەرىمەن, ۇقك, باس پروكۋراتۋرامەن جانە جوعارعى سوتپەن بىرلەسىپ جاسالدى», دەپ اتاپ ءوتتى ءبىلىم جانە عىلىم ءمينيسترى اسحات ايماعامبەتوۆ.
جاڭا نورمانى ەنگىزۋ وقۋشىلار ءۇشىن قاۋىپسىز جانە جايلى ورتا قالىپتاستىرۋعا, سونداي-اق قۇقىق بۇزۋشىلىقتاردى ۋاقىتىلى انىقتاۋعا جانە ونىڭ الدىن الۋعا مۇمكىندىك بەرەدى. وسىلايشا, مەكتەپتەرگە قارۋ مەن وعان سىرتقى ۇقساستىعى بار زاتتاردى اكەلۋگە قاتاڭ تىيىم سالىنادى. بۇدان بولەك, ءبىلىم ۇيىمدارىندا شانشيتىن, كەسەتىن جانە وتكىر زاتتاردى, ونەركاسىپتىك قۇرالداردى, وق-ءدارى, جارىلعىش, ۋلى, پسيحواكتيۆتى زاتتاردى اكەلۋگە جانە پايدالانۋعا جول بەرىلمەيدى.
سونداي-اق مەكتەپ وقۋشىلارىنىڭ وقۋ ساباقتارى كەزىندە سمارتفون, پلانشەت, پلەيەرلەردى پايدالانۋىنا شەكتەۋ ەنگىزىلەدى. بۇل شەكتەۋلەر دەنساۋلىقتى باقىلاۋ ءۇشىن سمارتفوندى قاجەت ەتەتىن ەرەكشە ءبىلىم بەرۋ قاجەتتىلىكتەرى بار بالالارعا قاتىستى ەمەس.
ماسەلەن, قانت ديابەتى بار وقۋشىلارعا قانداعى قانتتى باقىلاۋ ءۇشىن سمارتفون قاجەت بولۋى مۇمكىن. بالالاردىڭ تىيىم سالىنعان زاتتاردى ءبىلىم ۇيىمدارىنا كىرگىزگەنى ءۇشىن ولاردىڭ اتا-اناسى مەن زاڭدى وكىلدەرى جاۋاپتى بولاتىنىن ايتا كەتكەن ءجون.
