ماسەلەنىڭ ءبارى جەرگىلىكتى بۇقارالىق اقپارات قۇرالدارىندا پرەمەر-ءمينيستردىڭ رەسمي رەزيدەنتسياسىندا تاڭعى اسقا جۇمسالاتىن شىعىن بىردەن ءوسىپ كەتكەنى تۋرالى مالىمەت تاراعاننان باستالدى.
كۇندەلىكتى شىعاتىن Iltalehti باسىلىمىنىڭ حابارلاۋىنشا, تەك تاڭعى اسقا ساننا مارين ايىنا 850 ەۋرو جۇمسايدى ەكەن. بۇل شامامەن 445 مىڭ تەڭگەگە جۋىق. بۇعان دەيىن رەزيدەنتسياداعى تاڭعى اس شىعىنى شامامەن ايىنا 300 ەۋرو بولعان. باسىلىم شىعىننىڭ مۇنشالىقتى ءوسىپ كەتكەنىنە تاڭعالىپ, ساننا حانىمنىڭ ارەكەتى قانشالىقتى زاڭعا ساي دەگەن ساۋال تاستايدى.
Iltalehti تاراتقان اقپاراتتى پرەمەر-ءمينيستردىڭ كەڭسەسى دە راستادى. سوعان سايكەس 2020 جىلعى قاڭتاردان 2021 مامىر ارالىعىندا رەسمي رەزيدەنتسياعا تۇنەگەندە س.ءماريندى ءبىر رەت تاماقتاندىرۋعا جۇمسالعان قاراجات 14 363 ەۋرو 20 تسەنتتى قۇراعان. وسىلايشا, ايىنا شامامەن 845 ەۋرو كەتكەن ەكەن. پرەمەر-مينيستر كەڭسەسى تاراتقان مالىمدەگە سۇيەنسەك, بۇعان تاڭعى اس پەن تىسكەباسار بەرىلگەن.
ال ساننا ءماريننىڭ ءوزى ەشقانداي زاڭ بۇزباعانىن, قۇزىرەتىن ارتىق پايدالانباعانىن ايتىپ وتىر. ونىڭ سوزىنە سەنسەك, 2019 جىلى پرەمەر-مينيسترلىك مىندەتىنە كىرىسكەندە ۋادە ەتىلگەن قىزمەتتەردى عانا پايدالانعان.
«ارينە, بۇعان قاتىستى ەشتەڭە بىلمەيمىن. ويتكەنى تاڭعى اسقا بولىنەتىن قاراجاتقا قاتىستى زاڭ بۇزۋشىلىق بولعان ەمەس», دەدى ول فينليانديا تەلەارنالارىنىڭ بىرىنە بەرگەن سۇحباتىندا. سونداي-اق ول بۇعان دەيىنگى پرەمەر-مينيسترلەر دە تاڭعى اس اقىسىن پايدالانعانىن اتاپ ءوتىپ, ماسەلەنىڭ انىق-قانىعىن ناقتىلاۋ قاجەت ەكەنىن جەتكىزدى.
وسىعان بايلانىستى حەلسينكي قالاسىنىڭ پوليتسيا قىزمەتى ءىس اشاتىنىن, قانشالىقتى زاڭ بۇزىلعانىن انىقتايتىنىن حابارلادى. قۇقىق قورعاۋ ورگاندارىنىڭ ايتۋىنشا, ماسەلە پرەمەر-ءمينيستردىڭ وزىندە ەمەس, كەڭسە قىزمەتكەرلەرىنە قاتىستى بولۋى مۇمكىن. سوندىقتان ساراپشىلار ساننا ءماريننىڭ قىزمەتىنەن كەتۋى ەكىتالاي ەكەنىن ايتىپ وتىر.
فينليانديادا تۋىنداعان داۋ جايلى وقىپ وتىرىپ تاڭعالاسىڭ. بىلاي قاراساڭ, پرەمەر-مينيستر «تۇيەنى تۇگىمەن» جۇتقان جوق. زاڭ اياسىندا قاراستىرىلعان تاڭعى اسىن عانا ىشەدى. قىسقاسى, بيۋدجەت قاراجاتىن بوسقا شاشپاعان.
ونىڭ ۇستىنە, سكانديناۆيا ەلىندە شەنەۋنىكتەردىڭ بيۋدجەت قارجىسىن پايدالانۋىنا قاتىستى جانجال ءبىرىنشى رەت بولىپ وتىرعان جوق. بىلتىر فينليانديانىڭ قارجى ءمينيسترى كاتري كۋلمۋني مەدياترەنينگكە قاتىسۋ ءۇشىن بيۋدجەت قاراجاتىن جۇمساعانى تالقىعا تۇسكەن سوڭ, قىزمەتىنەن كەتكەن ەدى.
سول جولى دا شاشاۋ شىققان تيىن جوق. ءبارى تيەسىلى جەرىنە جەتكەن. بىراق بيلىكتىڭ جۇمساعان ءار تيىنىنان حاباردار فينليانديا قوعامى ءۇشىن بۇل ماڭىزدى. بۇل – بىرىنشىدەن. ەكىنشىدەن, سكانديناۆيا ەلى سىبايلاس جەمقورلىقتى جەڭگەن مەملەكەتتەر قاتارىندا. ونىڭ ۇستىنە, ەلدى باسقارۋعا اتسالىسىپ جۇرگەندەردىڭ كوبى – كىلەڭ جاستار. ماسەلەن, ۇكىمەت باسشىسى ساننا مارين 36 جاستا. جوعارىدا اتى اتالعان كاتري كۋلمۋني 34-تە. پرەمەر-ءمينيستردىڭ ورىنباسارى اننيكا سااريكو 38-دە, ىشكى ىستەر ءمينيسترى ماريا ويسالو 36-دا, ءبىلىم ءمينيسترى لي اندەرسسون 34 جاستا.
سوندىقتان شىعار, اتالعان ەل الەمدەگى باقۋاتتى دا باقىتتى ەل سانالادى. ماسەلەن, بۇۇ ازىرلەگەن «الەمدەگى باقىت زەرتتەۋىندە» فينليانديا قاتارىنان ءتورتىنشى جىل شارتاراپتاعى «قوي ۇستىنە بوزتورعاي جۇمىرتقالاعان مەكەن» اتانىپ وتىر. زەرتتەۋدى جۇرگىزگەندەر جەر-جاھانداعى 149 ەلدىڭ ازاماتتارىنا ساۋالناما جۇرگىزىپ, باقىت دەڭگەيىن باعالاۋدى سۇراعان.
ايتپاقشى, اتالعان زەرتتەۋدە قازاقستان تۋرالى دا مالىمەت بار. ساۋالناما بويىنشا «توعىزىنشى تەرريتوريانى» مەكەندەگەن ەل 36-ساتىعا جايعاسقان. ياعني بۇل – حالىقتىڭ باقىت جونىندەگى پىكىرى. بىراق الەۋمەتتىك قامتاماسىز ەتۋ, جەكە باس بوستاندىعى, ىشكى جالپى ءونىم كولەمى مەن سىبايلاس جەمقورلىق ماسەلەلەرىن ەسكەرە كەلگەندە, ەلىمىز 45-ورىنعا سىرعىعان. وسىندايدا فين قوعامى مينيسترلەردىڭ تاڭعى اسقا جۇمساعان بولماشى قارجىسىن تالقىلاعانىنا قاراپ وتىرىپ, ەلىمىزدەگى كەي شەنەۋنىكتەردىڭ «بۇيەنى بۇگىمەن, تۇيەنى تۇگىمەن» جۇتىپ جۇرگەنى ەرىكسىز ەسكە تۇسەدى. زاڭنىڭ ۇستەمدىگىن ورناتپايىنشا, فين دوستاردىڭ دەڭگەيىنە جەتۋىمىز ەكىتالاي-اۋ...
