كەزدەسۋ كەزىندە قاتىسۋشىلار ەكى ەل اراسىنداعى قارىم-قاتىناستىڭ جوعارى دامۋ قارقىنىنا نازار اۋداردى. سونداي-اق, ءوزارا بايلانىستى ءارى قاراي نىعايتۋدىڭ, ونىڭ ىشىندە پارلامەنتارالىق ىنتىماقتاستىقتى وركەندەتۋدىڭ ماڭىزى زور ەكەنىن اتاپ ءوتتى.
«قازاقستان تاراپى وزبەكستاننىڭ جەتىستىكتەرىن ەرەكشە قۋانىشپەن قابىلدايدى. ءبىز ءۇشىن ەلدەرىمىز اراسىنداعى باۋىرلاستىقتى ءارى قاراي ارتتىرۋدىڭ تەرەڭ ءمانى بار. قازىرگى تاڭدا ەكى ەل – سەنىمدى ستراتەگيالىق سەرىكتەستەر جانە وداقتاستار. مەملەكەتتەرىمىزدىڭ باسشىلارى بەلگىلەپ بەرگەن وسىنداي جوعارى دەڭگەيدەگى ىنتىماقتاستىقتى پارلامەنتتەرىءمىز ارقىلى قولداۋ دا اسا ماڭىزدى», دەدى ماۋلەن اشىمباەۆ.
سونىمەن قاتار ول ەكى ەلدىڭ سەناتتارى اراسىندا ارنايى ىنتىماقتاستىق جونىندەگى كوميسسيا قۇرىلعانىن تىلگە تيەك ەتتى. ونىڭ جۇمىسى وسى ساپار اياسىندا باستالماق.
كوميسسيا جۇمىسىنىڭ باستى ماقساتى – ەكى ەل سەناتتارىنىڭ ءوزارا بايلانىسىن ودان ءارى جەتىلدىرۋ جانە وڭىرارالىق ىنتىماقتاستىقتى دامىتۋداعى پارلامەنتتەردىڭ ءرولىن ارتتىرۋ. بۇل جۇمىستار قولدانبالى جانە جۇيەلى سيپات الۋى ءۇشىن بۇگىن 2021-2022 جىلدارعا ارنالعان جول كارتاسىنا جانە وزبەكستان رەسپۋبليكاسى ولي ءماجىلىسى جانىنداعى زاڭ شىعارۋ ماسەلەلەرى جانە پارلامەنتتىك زەرتتەۋلەر ينستيتۋتى مەن قازاقستان رەسپۋبليكاسىنىڭ پارلامەنتى جانىنداعى پارلامەنتاريزم ينستيتۋتى اراسىندا ىنتىماقتاستىق جونىندەگى مەموراندۋمعا قول قويىلدى.
«جول كارتاسىندا» كورسەتىلگەن شارالاردى ىسكە اسىرۋ پارلامەنتارالىق بايلانىسىمىزدى نىعايتۋدا ماڭىزدى ءرول اتقارادى دەپ ەسەپتەيمىز. سونداي-اق, بۇل قۇجات زاڭ شىعارۋشى ورگانداردىڭ ەكى ەل اراسىنداعى ستراتەگيالىق ىنتىماقتاستىقتى دامىتۋعا قوسقان ناقتى ۇلەسى ەكەنى ءسوزسىز», دەدى قازاقستان سەناتىنىڭ توراعاسى.
ودان بولەك, سۇحباتتاسۋشىلار وڭىرارالىق, مادەني-گۋمانيتارلىق بايلانىستاردى كۇشەيتۋ جانە حالىقارالىق پارلامەنتتىك الاڭدار ارقىلى دا ىنتىماقتاستىقتى ارتتىرۋ ماسەلەلەرىنە توقتالىپ ءوتتى.
«ەكى ەلدىڭ پارلامەنتتەرى تۋريزم, ەكولوگيا, سۋ رەسۋرستارىن باسقارۋ, ينۆەستيتسيا, مادەني-گۋمانيتارلىق بايلانىس سالالارىنداعى ەكىجاقتى ىنتىماقتاستىقتىڭ قۇقىقتىق بازاسىن جەتىلدىرۋ ىسىندە بىرلەسىپ ارەكەت ەتەدى. ەكولوگيالىق ماسەلەلەردى شەشۋدەگى بىرلەسكەن ءىس-قيمىل ءوزارا بايلانىسىمىزداعى نەگىزگى باعىتتاردىڭ ءبىرى بولىپ سانالادى. سوعان بايلانىستى جول كارتاسىنا ارال تەڭىزىن قۇتقارۋعا جانە ونىڭ ەكوجۇيەسىن ساقتاۋعا قاتىستى ءىس-شارالاردى بىرلەسىپ ۇيىمداستىرۋ تارماعى ەنگىزىلىپ وتىر», دەدى ماۋلەن اشىمباەۆ.
سەنات سپيكەرى تسيفرلىق تەحنولوگيا, تۋريزم, ءبىلىم بەرۋ جانە مادەنيەت سالالارىنداعى ءوزارا ىنتىماقتاستىق بىرلەسكەن جۇمىستىڭ نەگىزگى باسىمدىقتارىنىڭ ءبىرى ەكەنى دە ايتىپ ءوتتى.
«قازاقستان مەن وزبەكستان اراسىندا اكادەميالىق موبيلدىلىك, ەكى ديپلومدى ءبىلىم بەرۋ باعدارلامالارى, بىرلەسكەن ءبىلىم بەرۋ جانە عىلىمي جوبالاردى جۇزەگە اسىرۋ اياسىندا 300-گە جۋىق شارت جاسالعان. بۇل ايتارلىقتاي كورسەتكىش جانە جاقسى تاجىريبە ەكەنى ءسوزسىز. وسى ءىستى ءارى قاراي دامىتۋدىڭ ماڭىزى زور. اتالعان باعىتتا ءبىلىم, بىلىكتىلىك, عىلىمي دارەجەلەردى ءوزارا تانۋ تۋرالى كەلىسىمدى ازىرلەپ, قابىلداۋدىڭ بەرەرى مول دەپ ەسەپتەيمىز», دەدى ماۋلەن اشىمباەۆ.
قازاقستان سەناتىنىڭ توراعاسى ەكى ەلدىڭ وڭىرارالىق ىنتىماقتاستىعى الەۋەتىن تولىق پايدالانۋدىڭ ماڭىزىن دا نازاردان تىس قالدىرمادى.
«ساۋدانىڭ, ءوزارا ينۆەستيتسيانىڭ, ونەركاسىپتىك كووپەراتسيانىڭ ۇلكەن كولەمى ءدال ءبىزدىڭ وبلىستارعا تيەسىلى. وڭىرارالىق ىنتىماقتاستىقتى قولداۋ ماقساتىمەن وڭىرلەردە قازاقستاندىق جانە وزبەكستاندىق سەناتورلاردىڭ كەزدەسۋلەرىن وتكىزۋدى ۇسىنامىز. وعان جەرگىلىكتى وكىلدى ورگاندار دەپۋتاتتارىنىڭ دا قاتىسۋى ماڭىزدى», دەدى ول.
سونداي-اق, سەنات توراعاسى قازاقستاندىق سەناتورلاردىڭ اتقارىپ وتىرعان جۇمىسى مەن ولاردىڭ باستاماسىمەن ازىرلەنگەن زاڭ جوبالارىنا توقتالدى.
كەزدەسۋ سوڭىندا ەكى تاراپ پارلامەنتتەردىڭ بىرلەسكەن سىندارلى جۇمىسى قازاقستان مەن وزبەكستان اراسىنداعى ستراتەگيالىق سەرىكتەستىك پەن جان-جاقتى ارىپتەستىكتى نىعايتۋعا ءوز ىقپالىن تيگىزەتىنىنە سەنىم ءبىلدىردى.
بۇدان باسقا, ماۋلەن اشىمباەۆ وزبەكستانعا ساپارىنىڭ ءبىرىنشى كۇنى اياسىندا «تاۋەلسىزدىك جانە گۋمانيزم» مونۋمەنتىنە گۇل شوعىن قويۋ راسىمىنە قاتىستى جانە تەميريدتەر تاريحى مەملەكەتتىك مۋزەيىنە باردى.
