الەمدەگى قالىپتاسقان احۋالدى ەسكەرسەك, ەكونوميكالىق ءوزارا ءىس-قيمىل پروتسەستەرى تسيفرلى پلاتفورمالاردىڭ, اقپاراتتىق اعىندار مەن دەرەكقورلاردىڭ بىرىكتىرىلۋىن تالاپ ەتەتىنى بەلگىلى. وسى ورايدا ۆەدومستۆو باسشىسى ارمەنيالىق ارىپتەستەرىنە ەلەكتروندى ساۋدا باعىتىندا بىرلەسكەن جوبالاردى جۇزەگە اسىرۋدى ۇسىندى.
«تسيفرلاندىرۋ كەز كەلگەن مەملەكەتتىڭ ەكونوميكالىق تابىسىنىڭ اجىراماس بولىگىنە اينالعانىن ەسكەرىپ, بۇل ورايدا بىرلەسكەن جوبالاردى ىسكە اسىرۋدى ۇسىنامىز. ءبىز «الەۋمەتتىك ءاميان» جوباسىن ەنگىزۋگە بايلانىستى سايكەستىكتى باعالاۋ, تۇتىنۋشىلاردىڭ قۇقىقتارىن قورعاۋ سالاسىندا سۋبەكتىلەردى ەلەكتروندى اككرەديتتەۋگە قاتىستى جاقسى جەتىستىكتەرگە قول جەتكىزدىك», دەدى ب.سۇلتانوۆ.
مينيستر قاپ تاۋىنىڭ وكىلدەرىنە eGov ۇكىمەتتىك پلاتفورماسى ارقىلى اۋقىمدى جوبا ىسكە اسىرىلىپ جاتقانىن, سونداي-اق اتالعان سالادا مينيسترلىكتىڭ وڭ تاجىريبەسى بار ەكەنىن جەتكىزدى. بۇعان قوسا قازاقستاندىق تاراپ ارمەنيالىقتارمەن ساۋدا سالاسىنىڭ باسقا دا باعىتتارىندا بىرلەسىپ جۇمىس ىستەۋگە دايىن ەكەندەرىن ايتتى.
«بىزدە تەرەڭ ديففەرەنتسيالانعان ساۋدا قۇرىلىمى قالىپتاسقان. تاۋارلار نومەنكلاتۋراسىن كەڭەيتۋگە قاتىستى بار كۇش-جىگەرىمىزدى سالىپ كەلەمىز. قازاقستاندىق كومپانيالار 230,9 ملن دوللارعا ءتۇرلى وڭدەلگەن 50 تاۋاردى جەتكىزۋ بويىنشا ەكسپورت نومەنكلاتۋراسىن كەڭەيتۋگە دايىن. ول مۇناي-حيميا (138,8 ملن دوللار), مەتاللۋرگيا (23,1 ملن دوللار), تاماق ونەركاسىبى (36,4 ملن دوللار) جانە تاعى دا باسقا سالالاردى قامتيدى», دەدى ساۋدا ءمينيسترى.
ب.سۇلتانوۆ ايتقانداي, Kazakh Export ارمەنيالىق كومپانيالارعا ساۋدا سالاسىندا ۇزاقمەرزىمدى قارجىلاندىرۋ مەن ساۋدا جەتكىزىلىمدەرىن ساقتاندىرۋعا قاتىستى قولداۋ كورسەتۋ مۇمكىندىكتەرىنە يە.
«بۇل كومپانيانىڭ قىزمەتتەرىن تمد ەلدەرىندەگى ارىپتەستەرىمىز كەڭىنەن پايدالانىپ ءجۇر. قوسىلعان قۇنى جوعارى تاۋارلار ساۋداسىنىڭ جاقسى مىسالى رەتىندە «قاينار اكب» كومپانياسىنىڭ ەلەكتر اككۋمۋلياتورلارى ساۋداسىن ايتۋعا بولادى. ايتالىق, كومپانيا كوروناۆيرۋس پاندەمياسىنا دەيىن 2016-2019 جىلدار ارالىعىندا اككۋمۋلياتورلاردىڭ ساۋدا جەتكىزىلىمىن 6,4 مىڭنان 14 مىڭعا دەيىن ارتتىرۋعا مۇمكىندىك الدى. سول سەكىلدى Alageum Electric كومپانيالار توبىنىڭ ەلەكتر ترانسفورماتورلارىنىڭ ەكسپورت كولەمى دە تۇراقتى دەڭگەيدى ساقتاپ تۇر», دەدى ۆەدومستۆو باسشىسى.
بۇدان بولەك تاراپتار كولىك-لوگيستيكا سالاسىندا ىنتىماقتاستىق ورناتىپ, ەكى جاقتى الىس-بەرىستى نىعايتاتىن جوبالاردى قاراستىرۋعا نيەتتى ەكەندەرىن جەتكىزدى.
