بۇل يگى باستاماعا ەلباسى نۇرسۇلتان نازارباەۆ قولداۋ ءبىلدىرىپ, تاراز قالاسىندا وتكەن العاشقى تۇلەكتەر فورۋمىنا قاتىسۋشىلارعا قۇتتىقتاۋ جولداعان بولاتىن. ونى تۇڭعىش پرەزيدەنت – ەلباسى كەڭسەسىنىڭ باسشىسى ماحمۇت قاسىمبەكوۆ جەتكىزىپ, جەرلەستەرىنە جۇرەكجاردى لەبىزىن ارناعان بولاتىن.
وبلىس اكىمى بەردىبەك ساپارباەۆتىڭ باستاماسىمەن قولعا الىنعان اتالعان جوبا قازىرگى كەزدە ايماقتىڭ بارلىق اۋدانىندا ىسكە اسىرىلۋ ۇستىندە.
شۋ اۋدانىندا وتكەن «جومارت تۇلەك» فورۋمىندا دا ماحمۇت قاسىمبەكوۆ تۋعان ءوڭىرىنىڭ وركەندەۋىنە تىلەكتەستىگىن بىلدىرگەن ەدى. ءوزى ءبىلىم العان شۋ قالاسىنداعى س.سەيفۋللين اتىنداعى مەكتەپپەن ۇزاق جىلداردان بەرى تىعىز بايلانىس ورناتىپ كەلە جاتقان ماحمۇت بازارقۇل ۇلى اۋدانعا ءوزىنىڭ جانە نۇرسۇلتان نازارباەۆ قورى مەن Nur Otan پارتياسىنىڭ اتىنان كادەسىي رەتىندە سالەمدەمەلەر جولداناتىنىن حابارلاعان بولاتىن. سونىمەن قاتار س.سەيفۋللين اتىنداعى مەكتەپتى 1969 جىلى بىتىرگەن تۇلەكتەردىڭ اتىنان جاعدايى تومەن وتباسىنان شىققانىمەن, وقۋ ۇلگەرىمى جوعارى ەكى وقۋشىعا ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە وزدەرى قالاعان كەز كەلگەن ماماندىقتا ءبىلىم الۋعا مۇمكىندىك بەرەتىن گرانت تاعايىندايتىندىعىن جەتكىزدى.
جۋىردا تۇڭعىش پرەزيدەنت – ەلباسى كەڭسەسىنىڭ قىزمەتكەرى سانجار اليەۆ شۋ اۋدانىنا ارنايى كەلىپ, د.قوناەۆ اۋىلدىق وكرۋگىندە ورنالاسقان تولە بي اتىنداعى ورتا مەكتەپتە وتكەن جيىنعا قاتىستى. ول ءوز سوزىندە «جومارت تۇلەك» فورۋمىنىڭ وتە جاقسى ويلاستىرىلعان يدەيا جانە يگى ءىس-شارا ەكەنىن اتاپ ءوتىپ, اۋدانداعى ەرىكتىلەر مەن بەلسەندى جاستاردى ىنتالاندىرۋ ءۇشىن ولارعا ارنايى تىگىلگەن كۇرتەشەلەر مەن كەۋدەشەلەر تاپسىردى. وعان قوسا, اۋداندىق كىتاپحاناعا كوركەم ادەبيەت جانرىنداعى جانە قوعامدىق-ساياسي مازمۇنداعى 500-دەن استام ءتۇرلى كىتاپ سىيلادى.
جيىندا شۋ اۋدانىنىڭ اكىمى نۇرجان كالەندەروۆ «جومارت تۇلەك» جوباسىنا العاشقىلاردىڭ ءبىرى بولىپ قوسقان قوماقتى ۇلەسى ءۇشىن ماحمۇت قاسىمبەكوۆكە العىسىن ءبىلدىرىپ, اۋىل جاستارىنا كىتاپ سىيلاۋ ولاردىڭ رۋحاني بايلىعىن ارتتىرۋعا سەپ بولاتىنىن جانە مۇنىڭ وسكەلەڭ ۇرپاققا دا ونەگە بولاتىنىن ايتتى.
