الەم • 03 ماۋسىم، 2021

Vogue جۋرنالى مالالانىڭ سۋرەتىمەن شىعادى

پاكىستاندىق بەلسەندى مالالا يۋسافزايدىڭ سۋرەتى بريتانيالىق Vogue ءسان جۋرنالىنىڭ مۇقاباسىندا باسىلدى.

بۇگىندە Oxford ۋنيۆەرسيتەتىنىڭ تۇلەگى بىرنەشە جىل بۇرىن تاليبان ساياساتىنىڭ قىسىمىنا ۇشىراپ، وقۋ، دارىگەرگە كورىنۋ سىندى نەگىزگى قاجەتتىلىكتەرىنەن ايىرىلعان بولاتىن. كەيىن بۇل تۋرالى اشىق ايتىپ، الەمدىك ارەنادا اۋعانستانداعى جاعدايدى بۇكپەسىز جەتكىزۋگە مۇمكىندىك الدى.

17 جاسىندا نوبەل سىيلىعىن يەمدەنگەن مالالا بۇگىندە بىرقاتار بەلسەندى قىزبەن دوس ەكەنىن ايتادى. ولاردىڭ قاتارىندا ەكوبەلسەندى گرەتا تۋنبەرگ، ەمما گونسالەز بار.

Vogue جۋرنالىنىڭ شىلدە ايىنداعى ءنومىرى مالالانىڭ سۋرەتىمەن شىقپاق. مالالا فوتوعا Stella McCartney سىندى الەمدىك دەڭگەيدەگى ءسان ءۇيىنىڭ كويلەگىن كيگەنىمەن، باسىنا پۋشتۋندارعا ءتان ورامال تاعىپ ءتۇسىپتى. مالالانىڭ ءوزى «باسىمداعى ورامال – مۇسىلمان ايەلدەردىڭ باس كيىمى ءارى پۋشتۋنداردىڭ ەتنوستىق كيىمى» دەپ ءتۇسىندىردى.

«مۇسىلمان ايەلدەر، پۋشتۋندىق نەمەسە پاكىستاندىق قىزدار ۇلتتىق كيىم كيگەندە كورىنبەيتىن كەيىپكە ەنىپ، پاتريارحالدى قوعامنىڭ ەرەجەلەرىن ۇستانادى. مەن بارىنە مادەنيەتىڭىزگە قاراماي، ءوز ويىڭىز بەن پىكىرىڭىز بولا الاتىنىن ايتقىم كەلەدى»، دەيدى ول.

سونىمەن قاتار الەۋمەتتىك جەلىدەگى پاراقشاسىندا بۇل تاجىريبە وعان قىزىق كورىنگەنىن، ۇيرەنشىكتى بولماعانىن جازىپتى. جۋرنالدىڭ جاڭا جۇلدىزى «مۇنى كورگەن قىزدار الەمدى وزگەرتە الاتىنىن ءبىلىپ ءجۇرسىن دەگىم كەلەدى»، دەپ جازىپتى.

مالالا يۋسافزاي Oxford ۋنيۆەرسيتەتىنىڭ ساياساتتانۋ، فيلوسوفيا جانە ەكونوميكا بولىمىندە وقىدى. جاقىندا ءوزىنىڭ پروديۋسەرلىك ورتالىعىن اشتى. قازىر قىزداردىڭ ءبىلىم الۋى، ايەل قۇقىعى سياقتى دەرەكتى فيلمدەرمەن قاتار، بالالارعا ارنالعان فيلمدەر، انيماتسيا مەن كومەديا جانرىنداعى كينو تۇسىرۋمەن اينالىسادى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز