قىتايدا قۇس تۇماۋىنىڭ بىرنەشە ءتۇرى تارالعان. كەيبىر ءتۇرى ادامدارعا دا جۇعادى, اسىرەسە قۇس باعاتىن ازاماتتار اراسىندا اۋرۋ ءجيى تاراعان. دەگەنمەن, ءدال H10N3 ۆيرۋسىنىڭ ادامعا جۇعۋى كەزدەسپەگەن-ءدى.
جەنجانگ قالاسىنىڭ تۇرعىنى 28 ساۋىردە دارىگەرگە شاعىمدانعان. ءبىر ايدان كەيىن, 28 مامىردا ونىڭ ۆيرۋس جۇقتىرعانى انىقتالدى. الايدا دەنساۋلىق كوميسسياسى ۆيرۋستىڭ قايدان جانە قالاي جۇققانى تۋرالى اقپارات بەرمەدى.
ناۋقاستىڭ جاعدايى تۇراقتى. جاقىن قاتىناستا بولعانداردان ۆيرۋس انىقتالمادى. الەم بويىنشا دا بۇل جالعىز دەرەك بولىپ وتىر.
H10N3 – تومەن پاتوگەندى ۆيرۋس, اسا كۇردەلى اۋرۋ تۋدىرمايدى. سونىمەن قاتار كوروناۆيرۋس سياقتى جاھاندىق پاندەمياعا سەبەپ بولۋ قاۋپى از.
دۇنيەجۇزىلىك دەنساۋلىق ساقتاۋ ۇيىمى Reuters اگەنتتىگىنە ناۋقاستىڭ ۆيرۋستى قايدان جۇقتىرعانى انىقتالماعانىن, ازىرگە باسقا ناۋقاس تىركەلمەگەنىن ايتتى. سونىمەن قاتار بۇل ۆيرۋستىڭ ادامنان ادامعا جۇعۋى ەكىتالاي ەكەن.
«قۇس تۇماۋىنىڭ بۇل ءتۇرى ادامعا جۇققانى الەمدە تۇماۋ پاندەمياسى ءالى دە اياقتالماعانىن بىلدىرەدى», دەپ مالىمدەدى ۇيىم.
تاعام جانە اۋىلشارۋاشىلىق ۇيىمىنىڭ ۇيلەستىرۋشىسى فيليپ كلاس مۇنى «ادەتتەگى ۆيرۋستاردان بولەك» دەپ باعالايدى. 2018 جىلعا دەيىن 40 جىل ىشىندە 160 جاعداي عانا انىقتالعان. ۆيرۋس جابايى جانە سۋدى مەكەندەيتىن قۇستاردان تابىلعان. قۇستار ازيا, سولتۇستىك امەريكانى مەكەندەيدى. بۇل ۋاقىتقا دەيىن بىردە-ءبىر ءۇي تاۋىعىنان انىقتالماپتى.
ەندى ۆيرۋستىڭ گەنەتيكالىق اقپاراتىن زەرتتەۋ ونىڭ بۇرىنعى ۆيرۋسقا ۇقسايتىنىن, نە ۇقسامايتىنىن نەمەسە ءتىپتى بىرنەشە ۆيرۋستىڭ قوسىندىسى بولۋ ىقتيمالدىلىعىن بىلۋگە مۇمكىندىك بەرمەك.
قىتايدا قۇس تۇماۋى ىندەتى 2016-2017 جىل ارالىعىندا تىركەلگەن. H7N9 ۆيرۋسى 1 668 ادامعا جۇعىپ, 616 كىسىنىڭ ءومىرىن قيعان.
