ۇلتتىق بانك تاراتقان اقپارات بويىنشا, بيىل 27 مامىردا تىركەلگەن 60 398 ءوتىنىشتىڭ 35 280-ءى عانا ماقۇلدانعان. ياعني كەلىپ تۇسكەن ءوتىنىشتىڭ تەڭ جارتىسى عانا تالاپقا ساي بولعان. ەندى وسى ماقساتقا 426,6 ملرد تەڭگە بولىنبەك. بۇعان دەيىن باعدارلاما اياسىندا 325 ملرد تەڭگەگە نەسيە بەرىلگەنى حابارلانعان بولاتىن.
ەسكە سالساق, جاقىندا عانا قارجى نارىعىن رەتتەۋ جانە دامىتۋ اگەنتتىگىنىڭ باسشىسى ءمادينا ابىلقاسىموۆا «7-20-25» جانە «باسپانا حيت» باعدارلامالارىنىڭ جابىلاتىنىن ايتقان ەدى.
«داعدارىستىڭ ەكونوميكاعا اسەرىن تومەندەتۋ ءۇشىن نارىقتىق ۇستانىمدارعا ورىن بەرە وتىرىپ مەملەكەتتىڭ نەسيەلەۋ باعدارلامالارىنان بىرتىندەپ شىعۋىن قامتاماسىز ەتۋ كەرەك. وسىعان بايلانىستى ۇلتتىق بانك 2023 جىلدان باستاپ مەملەكەتتىك باعدارلامالاردى قارجىلاندىرۋدى توقتاتا باستايدى. 2021 جىلى «باسپانا حيت», ال 2022 جىلى «7-20-25» باعدارلاماسى اياقتالادى», دەپ مالىمدەدى اگەنتتىك توراعاسى الماتىدا وتكەن Cfo Idea exchange & networking سامميتىندە.
«7-20-25» الەۋمەتتىك باعدارلاماسى زايم بەرۋدى 2018 جىلى 4 شىلدەدە باستاعان. نەسيە تەك ۇلتتىق ۆاليۋتامەن بەرىلەدى. «قازاقستاننىڭ ورنىقتىلىق قورى»اق PR-مەنەدجەرى ايبار ولجاەۆتىڭ ايتۋىنشا, باعدارلاماعا ەلدىڭ بارشا ازاماتى قاتىسا الادى.
– بۇگىنگى تاڭدا وسى باعدارلاما بويىنشا 325 ملرد تەڭگەگە نەسيە بەرىلدى. بۇل ءوز كەزەگىندە باستاپقى تۇرعىن ءۇي نارىعىنان 27 مىڭ قازاقستاندىق وتباسىنىڭ ءۇيلى بولۋىنا سەپتىگىن تيگىزدى. باعدارلاماعا قازاقستاننىڭ بارلىق ازاماتتارى قاتىسا الادى. باستىسى ازاماتتىڭ اتىندا ءۇي جانە باسقا يپوتەكاسى بولماۋى ءتيىس. سونىمەن بىرگە تابىس رەسمي راستالۋى قاجەت. ەگەر ءسىز ايلىق الاتىن بولساڭىز, وندا ول بويىنشا زەيناتاقى قورىنا سالىمدار ءتۇسىپ تۇرۋى كەرەك. ال جەكە كاسىپكەر بولساڭىز, وندا بانك سىزدەن جىلدىق سالىق دەكلاراتسياسىن تالاپ ەتەدى, – دەيدى قور وكىلى.
باعدارلامانىڭ مەرزىمى شەكتەۋسىز بولىپ بەكىتىلگەن. جوبا بەكىتىلگەن 1 ترلن تەڭگە ليميتىنە جەتكەنگە دەيىن جۇزەگە اسىرىلا بەرەدى.
