ولار بوسانۋ كەزىندەگى اسفيكسيانىڭ اۋىر تۇرلەرىنە بايلانىستى جاڭا تۋعان نارەستەلەردىڭ ءولىمىن ازايتۋعا كومەكتەسەدى. زاماناۋي رەانيماتسيالىق قۇرال-جابدىقتاردى ساتىپ الۋدا Samruk-Kazyna Trust الەۋمەتتىك جوبالاردى دامىتۋ قورى ۇيىتقى بولدى.
«اتالعان جوبا اياسىندا ەلەكترەنتسەفالوگرافيا مونيتورى مەن اۆتوماتتى باسقارىلاتىن گيپوتەرميا اپپاراتى, سونداي-اق ناۋقاستىڭ مونيتورى ساتىپ الىندى. مۇنىڭ ءبارى سابيلەر ءولىمى دەڭگەيىن تومەندەتۋگە, سونداي-اق جاڭا تۋعان نارەستەلەردە اسفيكسياعا ۇشىراۋ ناتيجەسىندە مۇگەدەكتىكتىڭ اۋىر تۇرلەرىنىڭ دامۋىنىڭ الدىن الۋعا باعىتتالعان. ءبىز دەنساۋلىق ساقتاۋ سالاسىندا بىرقاتار جوبانى جۇزەگە اسىرۋدامىز, سونىڭ ارقاسىندا جىل سايىن مۇگەدەكتىگى بار 7 مىڭنان استام بالا زاماناۋي ورتالىقتاردا تەگىن وڭالتۋدان وتە الادى, قازاقستاندا ەمدەلمەيتىن دياگنوزى بار شامامەن 100 بالا شەتەلدىك كلينيكالاردا ەمدەلەدى, 600-دەن استام «ەرەكشە» بالا بەيىمدەلگەن سپورتپەن اينالىسادى, ال 10,5 مىڭ بالا تۇزەتۋ كابينەتتەرى مەن ينكليۋزيۆتى ورتالىقتاردا مامانداردان كومەك الا الدى», دەپ اتاپ ءوتتى قوردىڭ رەسمي وكىلى ميراس ىرگەباەۆ.
ول سونداي-اق قور قاراعاندى وبلىسىندا بۇقارالىق جانە بەيىمدەلگەن سپورت تۇرلەرىن دامىتۋ, وتباسى ينستيتۋتىن قولداۋ, Covid-19 قارسى كۇرەس اياسىندا مەديتسينالىق مەكەمەلەردى جابدىقتارمەن قامتاماسىز ەتۋ سياقتى بىرقاتار ماڭىزدى الەۋمەتتىك جوبالاردى ىسكە اسىراتىنىن اتاپ ءوتتى.
جىل سايىن قاراعاندى وبلىسىندا 19 مىڭ بالا دۇنيەگە كەلەدى, ونىڭ 7%-ى – مەرزىمىنەن ەرتە تۋعاندار. ولارعا نەگىزگى كومەكتى 6 پەريناتالدىق ورتالىق كورسەتەدى. ولاردىڭ ءبىرى وبلىستىق كلينيكالىق اۋرۋحانا بازاسىندا جۇمىس ىستەيدى جانە جىل سايىن 5000-عا جۋىق بوسانۋدى قابىلدايدى. بىلتىر مۇندا ورتا جانە اۋىر دارەجەلى اسفيكسيامەن 100-گە جۋىق ءسابي دۇنيەگە كەلدى. ولاردىڭ بارلىعى تەراپەۆتىك گيپوتەرميا جۇرگىزۋدى قاجەت ەتتى. الايدا بۇل ءۇشىن اۋرۋحانادا ارنايى قۇرال-جابدىقتار بولمادى, سوندىقتان قولدا بار قۇرالدارمەن جۇمىس جاساۋعا تۋرا كەلدى.
تەراپيالىق گيپوتەرميانى العاشقى 6 ساعاتتا, ءتىپتى جاڭا تۋعان نارەستەنىڭ ءومىرىنىڭ العاشقى مينۋتتارىندا قولدانۋ قاجەت. سوندا مي جاسۋشالارىنىڭ جۇمىسىن قالپىنا كەلتىرۋگە مۇمكىندىك بار. ەگەر مۇنداي اپپارات اۋرۋحانادا بولماسا, بالا ورتالىق جۇيكە جۇيەسىنىڭ اۋىر فۋنكتسيونالدىق زاقىمدانۋىمەن ءومىر سۇرۋىنە تۋرا كەلەدى, كەيدە ءتىپتى قايتىس بولۋى مۇمكىن. گيپوتەرميا اپپاراتى جاڭا تۋعان نارەستەنىڭ بارلىق دەنەسىن نەمەسە ونىڭ بولىگىن ۇقىپتى سالقىنداتادى, وسىلايشا نۇكتەلى تەمپەراتۋرالىق اسەرلەر قان اعىنىن تۇزەتۋگە جانە سول ارقىلى نارەستەلەردىڭ باس ميىنىڭ جاسۋشالارىنىڭ نەمەسە زاقىمدانعان بولىكتەرىنىڭ قالپىنا كەلۋىن باقىلاۋعا مۇمكىندىك بەرەدى.
