وسىدان ەكى اپتا بۇرىن عانا قازاق ۇلتتىق اگرارلىق ۋنيۆەرسيتەتى (قازۇاۋ) نەگىزىندە قۇرىلعان ايتۋلى كوماندا ماسكەۋدىڭ ءدال ىرگەسىندە ورنالاسقان زەلەنوگراد قالاسىندا كسرو-عا ەڭبەك سىڭىرگەن جاتتىقتىرۋشى الەكساندر كيلچەۆسكيدى ەسكە تۇسىرۋگە ارنالعان تۋرنيردە توپ جارعانى جايىندا جازعان ەدىك. مىنە, ەندى ولار تاعى دا اتوي سالدى.
نەۆا جاعالاۋىندا وتكەن جارىستا «الماتىنىڭ» ساپىندا يگور چەكرۋسكوۆ, باقىتجان بايتورە, ۆلاديمير باننيكوۆ, رۋستام ءماسىموۆ, شوحرات ارزيەۆ, الەكساندر تاراسوۆ, ۆياچەسلاۆ كوزۋب, امرا شالبارباەۆ جانە ەلدار گازيزۋلين سىندى ويىنشىلارى ونەر كورسەتتى. باستاپقى باسەكەلەردىڭ بارلىعىن ءوز پايداسىنا شەشكەن جەرلەستەرىمىز اقتىق سىندا كوستروما وبلىسىنىڭ وكىلدەرىمەن كەزدەستى. ال بۇل كوماندا كەزىندە اردەگەرلەر وليمپياداسىندا توپ جارىپ, الەم چەمپيونى اتانعان. وسىنداي ازۋلى قارسىلاستارىنان ەش قايمىقپاعان قازاقستاندىق ۆولەيبولشىلار 2:0 ەسەبىمەن باسىم ءتۇسىپ, باس جۇلدەنى ولجالادى.
– قازاق ۇلتتىق اگرارلىق ۋنيۆەرسيتەتىندە ارداگەر ۆولەيبولشىلار كومانداسىنىڭ قۇرىلعانىنا 20 جىلعا جۋىقتاپ قالدى. سول كەزدەن بەرى ءتۇرلى دودالارعا ۇزدىكسىز قاتىسىپ كەلەمىز. ماقاتانعانىم ەمەس, ەلىشىلىك جارىستاردا ءبىزدىڭ جەڭىلگەن كەزدەرىمىز سيرەك. ماسەلەن, سوڭعى بەس-التى جىل ارالىعىندا كىل مىقتىلار جينالعان رەسپۋبليكالىق دەڭگەيدە وتكەن تۋرنيرلەردى تەگىستەي ۇتتىق. بىلتىر كۇزدە اناپادا ۇيىمداستىرىلعان رەسەيدىڭ اشىق كۋبوگىندا 16 كوماندا اراسىنان بەسىنشى ورىنعا تابان تىرەدىك. بيىل پولشادا جالاۋى جەلبىرەگەن حالىقارالىق تۋرنيردە كۇمىس مەدالدى موينىمىزعا ىلدىك. تاياۋدا عانا ماسكەۋدەگى تۋرنيردە توپ جاردىق. ءسوز ورايى كەلگەندە, قازۇاۋ رەكتورى تىلەكتەس ەسبولوۆ مىرزاعا زور ريزاشىلىعىمىزدى بىلدىرسەك دەيمىز. كورنەكتى عالىم تەك عىلىم مەن ءبىلىمنىڭ دامۋىنا كوڭىل ءبولىپ قانا قويماي, سپورت سالاسىندا بارىنشا دامىتۋدا. سونداي قامقورلىقتىڭ ارقاسىندا ايتۋلى ۋنيۆەرسيتەتتىڭ ۆولەيبولشىلارى ءدۇبىرلى دودالاردا اۋىز تولتىرىپ ايتارلىقتاي تابىستارعا قول جەتكىزىپ ءجۇر. تىلەكتەس يساباي ۇلىنىڭ ءوزى دە ءجيى-ءجيى ويىن الاڭىنا شىعىپ, ءتۇرلى جارىستارعا قاتىسۋدا. سونىمەن قاتار كوماندامىزدىڭ ساپىندا ايگىلى اقىن, قوعام جانە ساياسي قايراتكەر, قازاقستاننىڭ ەڭبەك ەرى ولجاس سۇلەيمەنوۆ تە ونەر كورسەتەدى. مىنە, وسىنداي سەركەلەردىڭ بارىندا ءبىزدىڭ كوماندامىزدىڭ جەڭىلۋگە قاقىمىز جوق, – دەيدى قازۇاۋ رەكتورىنىڭ كەڭەسىشىسى, كوماندا كاپيتانى يگور چەكرۋسكوۆ.
تاعى ءبىر ايتا كەتەرلىك جايت, سانكت-پەتەربۋرگتەگى ءتۋرنيردىڭ قورىتىندىسى بويىنشا «الماتى» كلۋبىنىڭ وكىلى الەكساندر تاراسوۆ ەڭ ۇزدىك ويىنشى دەپ تانىلدى.
