وتىرىستا «قازاقستان رەسپۋبليكاسىنىڭ ۇكىمەتى مەن رەسەي فەدەراتسياسىنىڭ ۇكىمەتى اراسىنداعى پوليار ماڭىنداعى وربيتالارعا سولتۇستىك باعىتتا عارىش اپپاراتتارىن ۇشىرۋ ءۇشىن «بايقوڭىر» عارىش ايلاعىنان «سويۋز-2» تيپىندەگى تاسىمالداعىش زىمىرانداردى ۇشىرۋدى جۇزەگە اسىرۋ جونىندەگى ىنتىماقتاستىق تۋرالى كەلىسىمدى راتيفيكاتسيالاۋ تۋرالى» جانە «1994 جىلعى 10 جەلتوقسانداعى قازاقستان رەسپۋبليكاسىنىڭ ۇكىمەتى مەن رەسەي فەدەراتسياسىنىڭ ۇكىمەتى اراسىنداعى «بايقوڭىر» كەشەنىن جالعا بەرۋ شارتىنا وزگەرىس ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوبالارى تالقىعا سالىندى.
قۇجاتتار «سويۋز-2» زىمىران-تاسىعىشتارىن ۇشىرۋ كەزىندە قاۋىپسىزدىكتى قامتاماسىز ەتۋ ءۇشىن تاراپتاردىڭ مىندەتتەرىن ناقتى ايقىنداۋعا مۇمكىندىك بەرەدى.
«قۇجاتتاردا حالىق پەن اۋماقتاردىڭ ەكولوگيالىق قاۋىپسىزدىگىن قامتاماسىز ەتۋ جونىندەگى تاراپتاردىڭ مىندەتتەمەلەرى, سونداي-اق باسقا دا بىرقاتار ماسەلە جازىلعان. قۇجاتتاردى راتيفيكاتسيالاۋ عارىش ايلاعىن كوممەرتسيالىق ۇشىرۋلارمەن جۇكتەۋدى ۇلعايتۋعا مۇمكىندىك بەرەدى, بۇل بۇكىل بايقوڭىر كەشەنىنىڭ تىنىس-تىرشىلىگىنە وڭ اسەرىن تيگىزەدى», دەدى تالعات مۇساباەۆ.
زاڭ جوبالارى سونىمەن قاتار بۇرىنعى مىندەتتەمەلەردى ۇيلەستىرۋگە, سونداي-اق «بايقوڭىر» كەشەنىنىڭ عىلىمي-تەحنيكالىق, وندىرىستىك جانە الەۋمەتتىك-مادەني الەۋەتى مەن ينفراقۇرىلىمىن ساقتاۋعا, ءتيىمدى پايدالانۋعا جانە دامىتۋعا مۇمكىندىك بەرەدى.
