بۇل – بالتىق جاعالاۋىندا ۇيىمداستىرىلىپ جاتقان الەم بىرىنشىلىگىندە تىركەلگەن ەڭ ءىرى ەسەپ, بىلايشا ايتقاندا, رەكوردتىق ناتيجە. ازىرشە, اقش, فينليانديا, ءتىپتى, ا توبىندا كوش باستاپ تۇرعان رەسەي مەن سلوۆاكيا حوككەيشىلەرى دە مۇنداي كوپ شايبا سوعا العان جوق.
كانادانى قاپى قالدىرا المادىق
جەرلەستەرىمىز يتاليا قۇراماسىنا دەيىن بەسىنشى تۋردا چەمپيوناتتىڭ العاشقى ءۇش ويىنىندا جەڭىلىستىڭ كەرمەك ءدامىن تاتقان كانادا حوككەيشىلەرىمەن شەبەرلىك بايقاستى. اسا تارتىستى وتكەن ماتچتا ۇيەڭكى جاپىراقتار ەلى سپورتشىلارىنىڭ باعى جانىپ, جەڭىستى ج ۇلىپ الدى.
قازاقستان قۇراماسى كەزدەسۋدى جاپ-جاقسى باستاعانىمەن, ماتچتىڭ 6-مينۋتىندا قاقپالارىنا گول وتكىزىپ الدى. 4-مينۋتتا دمي-تري شەۆچەنكو ءتارتىپ بۇزعانى ءۇشىن ەكى مينۋتقا كىشى ايىپپەن جازالانىپ, كومانداسىن ءتورت ويىنشىمەن قالدىردى. سان باسىمدىعىنا يە بولعان كانادالىقتار بۇل مۇمكىندىكتى ءمۇلت جىبەرگەن جوق. باستاپقىدا تورەشىلەر ەندريۋ ماندجاپانەنىڭ سوققان گولىن ەسەپكە الماعانىمەن, بەينەقايتالاۋدان كەيىن گول ويىن جاعدايىندا سوعىلدى دەگەن شەشىم شىعاردى.
ەكىنشى كەزەڭ باستالا سالىپ ادام حەنريك اندرەي شۋتوۆ قورعاعان قاقپانى ءدال كوزدەپ, ەسەپتى 2:0-گە جەتكىزدى. جەرلەستەرىمىز ەكىنشى 20 مينۋتتىقتا ويىنعا شىنداپ كىرىستى. 24-مينۋتتا نيكيتا ميحايليس قارسى شابۋىلدا قارسىلاستىڭ قورعانىسىن بۇزىپ-جارىپ, ەسەپ ايىرماسىن قىسقارتتى – 1:2. ەكىنشى كەزەڭ سوڭىنا دەيىن ءبىزدىڭ قۇرامانىڭ ەسەپتى تەڭەستىرەتىن مۇمكىندىكتەرى بولعان ەدى. الايدا ءتورت ويىنشىمىز ءتارتىپ بۇزىپ, 8 مينۋت كەم قۇرامدا ويناعاندىقتان شابۋىلعا ەمەس, قورعانىسقا كوبىرەك كوڭىل بولۋگە ءماجبۇر بولدى. دەگەنمەن ءۇشىنشى كەزەڭ باستالا سالا قازاقستان قۇراماسى ءبارىبىر تابلوداعى كورسەتكىشتى تەڭەستىردى. كەرتيس ۆولكتىڭ پاسىنان كەيىن قاقپانى ءدال كوزدەگەن ميحايليس ءدۋبلدىڭ اۆتورى اتاندى. بىراق جانكۇيەرلەردىڭ قۋانىشى ۇزاققا سوزىلمادى. 48-مينۋتتا كانادالىقتار تاعى دا ەسەپتە العا شىعىپ, ماتچ اياقتالۋعا ءۇش سەكۋند قالعاندا كوننور براۋن ءبىزدىڭ بوس قاقپاعىمىزعا كومانداسىنىڭ ءتورتىنشى شايباسىن سوعىپ, كەزدەسۋدىڭ نۇكتەسىن قويدى – 2:4.
يتاليانى اسا ءىرى ەسەپپەن جەڭدىك
تارتىستى ويىندا قارسىلاستارىنا ەسە جىبەرگەن يۋري ميحايليس شاكىرتتەرى ەرتەسىنە يتاليا حوككەيشىلەرىمەن ءۇش ۇپاي ءۇشىن باق سىنادى. بارلىق ويىندا جەڭىلىسكە ۇشىراپ, تۋرنير كەستەسىندە سوڭعى ورىندا كەلە جاتقان يتاليالىقتار ءبىزدىڭ جىگىتتەرگە قاراعاندا ءبىر كۇن دەمالىپ ويىنعا تىڭ كۇشپەن كەلگەن-ءدى.
بۇگىنگە دەيىن ەكى ەلدىڭ حوككەيشىلەرى الەم چەمپيوناتىندا 6 رەت كەزدەسىپ, ەكى قۇراما دا ءۇش ويىننان جەڭىسكە جەتكەن. ەڭ كەيىنگى رەت قازاقستان مەن يتاليا 2018 جىلى بۋداپەشت مۇزايدىنىندا جولىعىپ, جەڭىس يتاليالىقتاردىڭ ەنشىسىندە كەتكەن ەدى. ءسويتىپ يتاليا ەليتالى ديۆيزيوندا ونەر كورسەتۋگە مۇمكىندىك الىپ, قازاقستان تومەنگى توپقا ءتۇسىپ قالعان-تىن.
بۇل ماتچ سول ءبىر اۋىر جەڭىلىستەن كەيىن ەسە قايتارۋ ءۇشىن تاماشا مۇمكىندىك ەدى. سونى تۇسىنگەن ءبىزدىڭ حوككەيشىلەر 60 مينۋت بويى مۇزايدىندا ايانىپ قالمادى. ماتچ باستالا سالا سان باسىمدىعىنا يە بولعان قازاقستان قۇراماسى ء«ا» دەگەننەن ەسەپ اشىپ ۇلگەردى. گولدىڭ اۆتورى – رومان ستارچەنكو. بىراق يتاليالىقتار دا وڭاي شاعىلاتىن جاڭعاق ەمەس ەكەندىكتەرىن اڭعارتىپ, جەرلەستەرىمىزگە ءبىراز قارسىلىق كورسەتتى. العاشقى كەزەڭ 1:0 ەسەبىمەن اياقتالدى. ۇزىلىستەن كەيىن قارسىلاستارىمىزدىڭ ويىن ورنەگى وزگەرىپ سالا بەردى. شايباعا يەلىك ەتە سالىسىمەن قارسى شابۋىلعا شىققان يتاليا قۇراماسى 24-مينۋتتا ءوز دەگەندەرىنە جەتتى. نيكيتا بوياركين اندجەلو ميچەليدىڭ سوققىسىن قايتارا المادى. ەكىنشى كەزەڭنىڭ ورتا تۇسىنان اۋعاندا ەگور پەتۋحوۆ پەن ەۆگەني رىمارەۆ بەلسەندىلىك تانىتىپ, ەسەپتى 3:1-گە جەتكىزدى.
ال ءۇشىنشى كەزەڭدە قازاقستان قۇراماسى گولدان جاڭبىر جاۋعىزىپ, جانكۇيەرلەرگە ناعىز حوككەي مەرەكەسىن سىيلادى. بۇل كەزەڭدە جەرلەستەرىمىزدەن نيكيتا ميحايليس, كەرتيس ۆولك, ارتەم ليحوتنيكوۆ (دۋبل), كيريلل پانيۋكوۆ, رومان ستارچەنكو, ۆيكتور سۆەدبەرگ جانە ەگور شالاپوۆ گول سوقسا, يتاليالىقتار پەتەر حوحكوفلەر مەن الەكس پەتان ەكى گولمەن قارىمتا قايتاردى. قورىتىندى ەسەپ – 11:3.
جوعارىدا ايتىپ وتكەنىمىزدەي, قازاقستان بيىلعى الەم چەمپيوناتىندا ءبىر ويىندا ەڭ كوپ شايبا سوققان قۇراما اتاندى. بۇعان دەيىنگى ۇزدىك ناتيجە گەرمانيا حوككەيشىلەرىنە تيەسىلى ەدى. ولار دا يتاليا قۇراماسىنا 9 شايبا سوعىپ, چەمپيوناتتىڭ ۇزدىك ناتيجەسىن تىركەگەن بولاتىن.
سونىمەن قاتار بۇل – قازاقستان قۇراماسىنىڭ الەم چەمپيوناتتارىنىڭ (ەليتالى ديۆيزيوندا) تاريحىنداعى دا ەڭ ءىرى ناتيجەسى. جەرلەستەرىمىز 2004 جىلى فرانتسيا قۇراماسىن 5:0 ەسەبىمەن جەڭسە, 2006 جىلى سلوۆەنيادان دا ءدال وسىنداي ەسەپپەن باسىم تۇسكەن ەدى.
التى ويىننان كەيىن 10 ۇپاي جيناعان قازاقستان قۇراماسى ۆ توبىنىڭ تۋرنير كەستەسىندە ءۇشىنشى ورىندا كەلەدى. بىراق وزگە كوماندالارعا قاراعاندا ءبىر ويىن كوپ وتكىزگەن. جەرلەستەرىمىز الەم چەمپيوناتىنداعى سوڭعى ويىنىن بۇگىن نورۆەگيا حوككەيشىلەرىمەن وتكىزەدى. ەگەر بۇل ويىندا نەگىزگى ۋاقىتتا جەڭىسكە جەتە السا, قازاقستان حوككەيشىلەرى تۇڭعىش رەت الەم چەمپيوناتىنىڭ پلەي-وفف كەزەڭىندە وينايدى.
