دۋباي شارشى الاڭىنداعى جارتىلاي فينال باسەكەلەرىندە دانيال ءسابيت (49 كگ), ابىلايحان ءجۇسىپوۆ (69 كگ), امانقۇل ءابىلحان (75 كگ), ۆاسيلي لەۆيت (91 كگ) جانە ۇلتتىق قۇراما كاپيتانى قامشىبەك قوڭقابەۆ (+ 91 كگ) قارسىلاستارىنان باسىم ءتۇسىپ, التىن جۇلدە ءۇشىن وتەتىن جەكپە-جەككە جولداما العان-دى.
وكىنىشكە قاراي, 52 كيلودا جۇدىرىقتاساتىن ساكەن بيبوسىنوۆ فينالعا شىعا المادى. توكيو وليمپياداسىنا جولداما جەڭىپ العان جەرلەسىمىز جارتىلاي فينالدا ازيانىڭ ءبىرىنشى ءنومىرلى بوكسشىسى اميت پانگالمەن كەزدەسىپ, بۇل جولى دا ۇندىستاندىق ساڭلاقتىڭ وسال تۇسىن تابا المادى. 2019 جىلى رەسەيدە وتكەن الەم چەمپيوناتىنىڭ جارتىلاي فينالىندا جەرلەسىمىزدىڭ جولىن كەسكەن اميت وتكەن جەكپە-جەكتە دە بيبوسىنوۆتىڭ ادىمىن اشتىرماي, سارى قۇرلىق بىرىنشىلىگىندە التىن الامىن دەگەن ارمانىن ەكى جىل كەيىنگە شەگەردى. ءسويتىپ جەرلەسىمىز قاتارىنان ەكى ءىرى تۋرنيردە پانگالدان جەڭىلىپ, قولا جۇلدەنى قاناعات تۇتۋعا ءماجبۇر بولدى. ەندى ەكى بوكسشىنىڭ جولى الداعى توكيو وليمپياداسىندا ءتۇيىسۋى مۇمكىن. ەگەر سوقىر جەرەبە ەكەۋىن ءۇشىنشى مارتە وليمپيا ويىندارىندا جولىقتىرىپ جاتسا, بيبوسىنوۆ قالايدا جەڭىسكە جەتۋى ءتيىس.
وسى ازيا چەمپيوناتىنا ۇلكەن ۇمىتپەن اكەلىپ, ايبىنىمىزدى اسقاقتاتادى دەپ سەنگەن ءبىراز جىگىتتەرىمىز ەكىنشى اينالىمعا جەتپەي ءسۇرىنىپ, جانكۇيەرلەر ءۇمىتىن اقتاي الماي ۇياتتى بولىپ جاتقاندا, ەڭ جەڭىل سالماقتاعى بوكسشىمىز دانيال ءسابيت (49 كگ) ءوزىنىڭ العاشقى ازيا چەمپيوناتىنا قاتىسىپ جاتقانىنا قاراماستان فينالدان ءبىر-اق شىقتى. بىلتىر ەل چەمپيوناتىندا 2013 جىلعى ازيا چەمپيونى, قازاقستاننىڭ بەس دۇركىن چەمپيونى تەمىرتاس ءجۇسىپوۆتى جەڭىپ, 49 كيلودا ەلىمىزدىڭ ۇزدىك بوكسشىسى اتانعان د.ءسابيت قۇرلىقتىق ءتۋرنيردىڭ جارتىلاي فينالىندا فيليپپيندىك مارك لەستەر دۋرسانستى تىزە بۇكتىردى. 19 جاستاعى جەرلەسىمىز ءۇشىن بۇل ۇلكەن جەتىستىك.
دانيال فينالدا 2019 جىلى تايلاندتا وتكەن ازيا چەمپيوناتىندا باس جۇلدەنى ولجالاعان وزبەكستاندىق نوديرجون ميرزاحمەدوۆپەن جۇدىرىقتاسادى. وزبەك بوكسشىسى جارتىلاي فينالدا موڭعوليالىق ۋنۋبولد ورحونتۋنگالاگتى 5:0 ەسەبىمەن جەڭدى.
69 كيلو سالماق دارەجەسىندە ونەر كورسەتكەن ابىلايحان ءجۇسىپوۆ جارتىلاي فينالدا موڭعوليالىق باتتۋمۋر ميشەلتگە ەش مۇمكىندىك قالدىرمادى – 5:0. ءار راۋندتا قاجەتتى ۇپاي جيناپ وتىرعان ءجۇسىپوۆ اسا قينالا قويعان جوق. 2017 جانە 2019 جىلعى الەم چەمپيوناتىنىڭ قولا جۇلدەگەرى فينالدا تاعى ءبىر وزبەكستاندىق بوكسشى بوبو-ۋسمون باتۋروۆپەن كۇش سىناسادى. باتۋروۆ 2018 جىلى ازيا ويىندارىندا, 2019 جىلى ازيا چەمپيوناتىندا ۇزدىك شىققان. بوبو-ۋسمون ازيا ويىندارىنىڭ فينالىندا جەرلەسىمىز اسلانبەك شىمبەرگەنوۆتەن ايلاسىن اسىرىپ كەتكەن بولاتىن.
75 كيلوداعى ۇزدىگىمىز ءابىلحان امانقۇل دا ازيا چەمپيوناتىنىڭ فينالىنا جولداما الدى. جارتىلاي فينالدا ول يراندىق سەيەدشاحين مۋساۆيدەن 5:0 ەسەبىمەن باسىم ءتۇستى. التىن جۇلدە ءۇشىن وتەتىن ايقاستا امانقۇل ازيا چەمپيوناتىنا تۇڭعىش رەت قاتىسىپ جاتقان وزبەكستاندىق سايدجامشيد جافاروۆپەن كەزدەسەدى. ءوز كەزەگىندە جافاروۆ جارتىلاي فينالدا قازاق بوكسشىلارى ءۇشىن الىنبايتىن قامالعا اينالعان فيليپپين وكىلى ەۋمير فەليكس مارسيالدى تىزە بۇكتىردى. بۇعان دەيىنگى ازيا بىرىنشىلىگىنىڭ كۇمىس جانە قولا جۇلدەسىن جەڭىپ العان جەرلەسىمىزگە ەندى سارى قۇرلىقتىڭ التىنى جەتپەي تۇر. بۇگىن سول ولقىلىقتىڭ ورنىن تولتىراتىن تاماشا مۇمكىندىك.
91 كيلو سالماقتاعى بوكسشىمىز ۆاسيلي لەۆيت ءوزىنىڭ ازيا چەمپيوناتىنداعى ءتورتىنشى فينالىنا شىعىپ وتىر. جارتىلاي فينالدا ول قىرعىزستاندىق رۋستام ىرىسبەك ۋلىن جەڭدى. ىرىسبەك تەگەۋرىندى قارسىلىق كورسەتكەنىمەن, لەۆيتتىڭ سوققىلارى دالىرەك بولدى. وسىدان كەيىن-اق كىمنىڭ جەڭىسكە جەتەتىنى بىردەن بايقالدى. لەۆيتتى فينالدا ۇندىستاندىق سانجيت كۇتىپ تۇر. ەگەر جەرلەسىمىزدىڭ بۇل جەكپە-جەكتە دە مەرەيى ۇستەم بولسا, ازيا چەمپيوناتىندا ءتورت مارتە توپ جارعان تۇڭعىش قازاقستاندىق بوكسشى اتانادى.
ۇلتتىق قۇرامانىڭ كاپيتانى قامشىبەك كوڭقاباەۆ قازاقستان قۇراماسىنىڭ بەسىنشى جولداماسىن جەڭىپ الدى. 91 كيلودان جوعارى سالماقتا شارشى الاڭعا كوتەرىلگەن كوڭقاباەۆ جارتىلاي فينالدا يراندىق پۋريا ءاميريدى جەڭدى – 5:0. وتانداسىمىز ەكىنشى راۋندتا قارسىلاسىن ءبىر مارتە نوكداۋنعا ءتۇسىردى. فينالدا قامشىبەك وزبەكستاندىق باحودير دجالولوۆپەن كەزدەسەدى. بۇل ەكى بوكسشى اراسىنداعى جەتىنشى جەكپە-جەك. بۇعان دەيىن التى كەزدەسۋدە بوكسشىلار ءۇش مارتەدەن جەڭىسكە جەتكەن. بۇگىنگى فينالدا جەڭىسكە جەتكەن بوكسشى ازيا چەمپيوناتىنىڭ التىن جۇلدەسىن ەنشىلەپ قانا قويماي, جەكە كەزدەسۋ بويىنشا العا شىعىپ الادى.
