پەتروپاۆلعا ساپار شەككەن «تاراز» ءبىرىنشى كەزەڭدە الاڭ يەلەرىنىڭ قاقپاسىنا ەكى گول سالدى. دۋبل اۆتورى – نەناد اداموۆيچ. بىراق ۇزىلىستەن كەيىن جاعداي كۇرت وزگەردى. قاقپاشى مۇحامەدجان سەيسەننىڭ جىبەرگەن قاتەلىكتەرى سالدارىنان «قىزىلجاردىڭ» ويىنشىلارى ماتچ اياقتالعانعا دەيىن تارازى باسىن تەڭەستىردى – 2:2.
الماتىدا «قايرات» قىزىلوردانىڭ «قايسارىن» قابىلدادى. بۇل ويىندا 33-مينۋتتا حوسە كانتە مارتينەس سوققان جالعىز گول باسەكە تاعدىرىن شەشتى – 1:0.
«جەتىسۋ» قاتارىنان ءۇشىنشى كەزدەسۋدە جەڭىس تويىن تويلادى. وسى تۋردى تۇركىستاننىڭ «تۇرانىنا» قارسى وتكىزگەن تالدىقورعاندىقتار الاڭ يەلەرىنىڭ قاقپاسىنا جاۋاپسىز ەكى گول سوقتى. ەسەپ – 0:2. وسى تابىستارىنىڭ ارقاسىندا كوش سوڭىندا كەلە جاتقان «جەتىسۋ» جارىس كەستەسىندە بىرنەشە ساتىعا جوعارلادى.
اقتاۋدا وتكەن «كاسپي» مەن «استانا» اراسىنداعى باسەكە دە اسا شيەلەنىستى ءوتتى. ءبىرىنشى تايمدا قوناقتار ەكى دوپ ايىرماشىلىعىمەن العا شىققاندا, ەلوردالىقتار ەندى جەڭىستى ۋىسىنان شىعارا قويماس دەپ ويلادى. بىراق ۇزىلىستەن كەيىن الاڭ يەلەرىن ەكى مارتە نىسانانى ءدال كوزدەدى – 2:2.
ال وسى تۋرداعى وزگە ماتچتار مىناداي ەسەپتەرمەن اياقتالدى: «ورداباسى» - «شاحتەر» 0:0, «توبىل» - «اقتوبە» 2:1 جانە «اتىراۋ» - «اقجايىق» 2:1.
جارىس كەستەسىندە «استانا» جەكە-دارا الدا كەلەدى. ولاردىڭ ەنشىسىندە 34 ۇپاي بار. ەكىنشى ورىندا – «توبىل». كوش باسىنداعى كوماندادان قوستانايلىقتاردىڭ ءۇش ۇپايى كەم. قورجىنىندا 24 ۇپايى بار «قايرات» ءۇشىنشى ورىندى يەلەنۋدە.
