سوڭعى جولدامالار ءۇشىن تارتىس تايلاند پەن يراك جانە ۆەتنام مەن ليۆان قۇرامالارى اراسىندا ءوتتى. بۇل ايقاستا العاشقىلارىنىڭ اسىعى الشىسىنان ءتۇستى. وسىلايشا, بالتىق تەڭىزى جاعالاۋىندا جالاۋى جەلبىرەيتىن جارىستا مىنا ەلدىڭ ۇلتتىق قۇرامالارى ونەر كورسەتەدى: اقش, انگولا, ارگەنتينا, برازيليا, ۆەنەسۋەلا, ۆەتنام, گۆاتەمالا, جاپونيا, يران, يسپانيا, قازاقستان, كوستا-ريكا, ليتۆا, ماروككو, مىسىر, وزبەكستان, پاناما, پاراگۆاي, پورتۋگاليا, رەسەي, سەربيا, سولومون ارالدارى, تايلاند جانە چەحيا.
باسەكەلەر ۆيلنيۋستەگى «سيمەنس ارەنا» (10 000 كورەرمەنگە ەسەپتەلگەن), كاۋناستاعى «جالگيريس ارەنا» (13 807) جانە كلايپەداداعى «شۆيتۋريو ارەنا» (6 200) كەشەندەرىندە وتەدى.
ەستەرىڭىزگە سالا كەتەيىك, سوڭعى رەت فۋتزالدان الەم چەمپيوناتى وسىدان بەس جىل بۇرىن كولۋمبيادا ۇيىمداستىرىلدى. بۇل جارىستا ارگەنتينا ويىنشىلارىنىڭ ايدارىنان جەل ەستى. فينالدا ولار رەسەيدى 5:4 ەسەبىمەن ۇتتى. قولا مەدالدى يران يەلەندى. ال قازاقستان قۇراماسى پلەي-وففقا جولداما الىپ, 1/8 فينالدا يسپانياعا 2:5 ەسەبىمەن ەسە جىبەردى.
