«29 مامىر كۇنى ۇيعىر اۋداندىق ورتالىق اۋرۋحاناسىنا شارىن شاتقالىندا زارداپ شەككەن 6 ادام جەتكىزىلدى. ولاردىڭ ەكەۋى — 2009 جانە 2010 جىلى تۋعان بالالار. قازىرگى ۋاقىتتا 2009 جىلى تۋعان بالا الماتى ايماقتىق بالالار اۋرۋحاناسىنا اۋىستىرىلدى. رەانيماتسيا جانە قارقىندى تەراپيا بولىمشەسىنە جاتقىزىلدى. جاعدايى اۋىر, تۇراقتى. دياگنوزى - جابىق باس سۇيەك-مي جاراقاتى, ميدىڭ شايقالۋى. دەنەسىنىڭ بىرنەشە بولىگى جاراقاتتانعان.
2010 جىلى تۋعان ناۋقاس ۇيعىر اۋداندىق اۋرۋحاناسىنىڭ حيرۋرگيالىق بولىمشەسىنە جاتقىزىلدى. دياگنوز: جابىق باس سۇيەك-مي جاراقاتى. ميدىڭ شايقالۋى. اياقتارى جاراقاتتانعان», دەدى الماتى وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتىنىڭ رەسمي وكىلى ءلايلىم اۋباكىروۆا.
ۆەدومستۆو وكىلىنىڭ اقپاراتىنا سايكەس, زارداپ شەككەندەردىڭ بارلىعىنىڭ ميى شايقالعان.
«1976 جىلى تۋعان ناۋقاس حيرۋرگيالىق بولىمگە جاتقىزىلدى. دياگنوز: ميدىڭ شايقالۋى. دەنەسى جاراقاتتانعان.
1991 جىلى تۋعان ناۋقاستى تۋىستارىنىڭ تالابى بويىنشا ودان ءارى تەكسەرىپ, ەمدەتۋ ءۇشىن الماتى قالاسىنا الىپ كەتتى. دياگنوز: ججبي. ميدىڭ شايقالۋى.
1970 جانە 1971 جىلى تۋعان ەكى ادام امبۋلاتوريالىق ەمدەلۋگە جىبەرىلدى», دەپ تولىقتىردى ل. اۋباكىروۆا.
دەنساۋلىق ساقتاۋ باسقارماسىنىڭ باسشىسى ومىرزاق ابىلسەيىت ۇلى نيازبەكوۆ ارنايى ۇيعىر اۋداندىق ورتالىق اۋرۋحاناسىنا بارىپ, زارداپ شەككەندەردىڭ جاعدايىمەن تانىستى جانە دارىگەرلەرگە مەديتسينالىق كومەك كورسەتۋ بويىنشا بىرقاتار تاپسىرمالار بەردى. سونىمەن قاتار, الماتى ايماقتىق بالالار اۋرۋحاناسىنان تراۆماتولوگ مەن رەانيماتولوگ دارىگەرلەر بارىپ, زارداپ شەككەن وقۋشىلارعا بىلىكتى مەديتسينالىق كومەك كورسەتتى.
