«29 مامىر كۇنى ساعات 00:30-دا ۇزدىكسىز ىزدەستىرۋ جۇمىستارىنىڭ بارىسىندا وگەم وزەنىنەن ءبىر ادامنىڭ جانسىز دەنەسى تابىلدى. ول 1999 جىلى تۋعان تاۋدا جوعالىپ كەتكەن تۋريستەر توبىنىڭ ءبىرى ەكەنى انىقتالدى. ەكىنشى جىگىتتىڭ دەنەسى بۇگىن وگەم وزەنىنەن 3 شاقىرىم جەردەن تابىلدى», دەپ حابارلادى تجم رەسمي وكىلى تالعات ءۋالي.
جىگىتتەردىڭ دەنەسى «قازاۆياقۇتقارۋ» اق مي-171 تىكۇشاعىمەن شىمكەنت قالاسىنا جونەلتىلدى.
قالعان ەكى ادامدى ىزدەستىرۋ جۇمىستارى جالعاسۋدا.
جەردەگى ىزدەستىرۋدى قۇتقارۋشىلار, پوليتسيا قىزمەتكەرلەرى, شەكارا قىزمەتىنىڭ ات ءپاترۋلى, ۇلتتىق پارك قىزمەتكەرلەرى جانە جوعالعانداردىڭ تۋىستارى جۇرگىزۋدە. سونداي-اق, اۋەدەن ىزدەۋ ءۇشىن قر تجم «قازاۆياقۇتقارۋ» اق ەكى بورتى جۇمىس ىستەۋدە.
اتالعان فاكتى بويىنشا تۇركىستان وبلىسىنىڭ پوليتسيا دەپارتامەنتى سوتقا دەيىنگى تەرگەۋدى باستادى. ساراپتامالار تاعايىندالدى, ولاردىڭ ناتيجەلەرى بويىنشا ءولىمنىڭ سەبەبى انىقتالاتىن بولادى.
ەسكە سالا كەتەيىك, تولەبي اۋدانىنىڭ سايرام-وگەم مەملەكەتتىك ۇلتتىق تابيعي پاركىنىڭ اۋماعىندا 7 ادامنىڭ جوعالعانى تۋرالى حابارلاما 2021 جىلعى 25 مامىردا 18 ساعات 30 مينۋتتا كەلىپ ءتۇستى. ولاردىڭ ۇشەۋى كەشە تابىلعان بولاتىن.
