«2020 جىلدىڭ قازانىندا رەسەيلىك تاجىريبەنى تىڭعىلىقتى زەردەلەۋ ماقساتىندا تمد-عا قاتىسۋشى مەملەكەتتەردىڭ حالقى ەڭبەگى, جۇمىسپەن قامتىلۋى جانە الەۋمەتتىك قورعالۋى جونىندەگى كونسۋلتاتسيالىق كەڭەستىڭ XXXIII وتىرىسىندا بۇل ماسەلە قاراستىرىلدى. جۇرگىزىلگەن جۇمىستىڭ ناتيجەسىندە «انا كاپيتالى» تۋدى ىنتالاندىرۋ جانە «تابيعي كەمۋ» سىندى قۇبىلىستى ەڭسەرۋ ءۇشىن ۋاقىتشا ءىس-شارا ەكەندىگىن اتاپ وتكەن ورىندى. ىنتالاندىرۋ ءىس-شاراسى ەنگىزىلگەن كەزدە رەسەي فەدەراتسياسىنداعى تۋدىڭ جيىنتىق كوەففيتسيەنتى 1,4-ءتى قۇرادى. ال اتالعان باعدارلاما جۇزەگە اسىرىلعان كەزدەگى تۋدىڭ جيىنتىق كوەففيتسيەنتى 0,1 تارماققا ارتتى نەمەسە 1,5-كە جەتتى. بۇل باعدارلامانىڭ تيىمسىزدىگىن كورسەتەدى. بۇل رەتتە قازاقستانداعى تۋدىڭ جيىنتىق كوەففيتسيەنتى 2007 جىلى 2,47-ءى بولسا, 2020 جىلى 3,13-كە دەيىن ءوستى», دەدى ۆيتسە-پرەمەر جاۋابىندا.
ەرالى توعجانوۆتىڭ اتاپ وتۋىنشە, قازاقستاندا قولدانىستاعى انا مەن بالانى قولداۋ جۇيەسى ۋاقىتى ءارى مەرزىمدى جاردەماقى تولەمىنە كەپىلدىك بەرەدى. ول جۇكتىلىككە جانە تۋعا بايلانىستى الەۋمەتتىك تولەمدى (ورتاشا ايلىق جالاقىنىڭ شامامەن 40 پايىزى), بالا تۋىنا ارنالعان جاردەماقىنى (1, 2, 3 بالاعا 110 846 تەڭگە, ءتورت جانە ودان كوپ بالاعا 183 771 تەڭگە), بالا 1 جاسقا تولعانعا دەيىنگى كۇتىمىنە ارنالعان تولەمدى (16 802 تەڭگەدەن 25 962 تەڭگەگە دەيىن) قامتيدى. بۇل تولەمدەر وتباسىنىڭ كىرىسىنە قاراماستان بەرىلەدى. بۇعان قوسا, بالا 1 جاسقا دەيىن كۇتىم جاسايتىن ايەلدەرگە ورتاشا ايلىقتىڭ 10 پايىزى مولشەرىندە مىندەتتى زەينەتاقى جارناسىن سۋبسيديالاۋ قاراستىرىلعان. 2020 جىلدان باستاپ كوپبالالى وتباسىلارعا وتباسىداعى بالا سانىنا بايلانىستى سارالانعان مولگەردە جاردەماقى تاعايىندالىپ, تولەنىپ كەلەدى. تابىسى تومەن از قامتىلعان وتباسىلارعا اتاۋلى الەۋمەتتىك كومەك تاعايىندالادى. از قامتىلعان وتباسىدان شىققان بالالارعا كەپىلدەندىرىلگەن الەۋمەتتىك توپتاما بەرىلەدى.
«بۇعان قوسا, بۇگىندە ەلىمىزدىڭ بارلىق وڭىرىندە جانە ەلوردادا از قامتىلعان جانە كوپبالالى وتباىلارعا ء«بىر تەرەزە» قاعيداتىمەن قىزىعۋشىلىق تانىتقان بارلىق ساۋالدارىنا كونسۋلتاتسيالىق قىزمەت كورسەتەتىن «جانۇيا» جانە «شاڭىراق» وتباسىنا قولداۋ ينستيتۋتى ورتالىقتارى جۇمىس ىستەيدى. سونىمەن قاتار ورتالىقتاردا بالالارعا جانە ولاردىڭ وتباسىلارىنا, ونىڭ ىشىندە مۇگەدەك جاندارعا پسيحولوگيالىق ءارى ىنتالاندىرۋ ترەنينگتەرى, وزگە دە ءىس-شارالار وتكىزىلەدى», دەدى ۇكىمەت باسشىسىنىڭ ورىنباسارى.
