اگروونەركاسىپ كەشەنىن دامىتۋ ناتيجەلەرىن كورسەتكەن مينيستر كوروناۆيرۋس پاندەمياسىنا جانە الەمدەگى كۇردەلى ەكونوميكالىق جاعدايعا قاراماستان, 2020 جىلدىڭ قورىتىندىسى بويىنشا سالا بارلىق ماكروكورسەتكىشتەر بويىنشا وسىمگە قول جەتكىزگەنىن ايتتى. ماسەلەن, اۋىل شارۋاشىلىعىنىڭ جالپى ءونىمىنىڭ كولەمى 5,6%-عا ارتىپ, 6,3 ترلن تەڭگەگە جەتكەن.
مۇنداي وسىمگە مەملەكەتتىك اگرارلىق ساياسات ينديكاتورلارىنىڭ جوسپارلى تۇردە ورىندالۋى, سونداي-اق جۇيەلى جۇمىس پەن وتكەن جىلدىڭ كوكتەمىندە داعدارىسقا قارسى شۇعىل شەشىمدەردىڭ دەر كەزىندە قابىلدانعانى ىقپال ەتتى.
«وتكەن جىلى داعدارىسقا قارسى شارالاردى ەسەپتەگەندە, مەملەكەتتىك قولداۋ كولەمى 366 ملرد تەڭگەگە دەيىن جەتتى. بۇل 2019 جىلعى دەڭگەيدەن 13%-عا ارتىق.
اتاپ ايتقاندا, سۋبسيديالاۋ بارىنشا جەڭىلدەتىلىپ, تولىق اۆتوماتتاندىرىلدى. ونىڭ بەلگىلى ءبىر سالاعا عانا نازار اۋدارماي, بىرىڭعاي ءتاسىلدى كوزدەيتىن مەحانيزمدەرى قايتا قارالدى. سونداي-اق شاعىن جانە ورتا فەرمەرلەردى سۋبسيديالاۋعا قول جەتكىزۋ شەگى وزگەرتىلدى», دەدى مينيستر.
ونىڭ ايتۋىنشا, وسىمدىك شارۋاشىلىعىنداعى بارلىق سۋبسيديالار بىرىڭعاي ەرەجەلەرگە بىرىكتىرىلىپ, وسىمدىكتەردى قورعاۋ قۇرالدارىن سۋبسيديالاۋ كەڭەيتىلدى. ەندى گەربيتسيدتەر عانا ەمەس, پەستيتسيدتەردىڭ باسقا دا تۇرلەرى سۋبسيديالانادى. باستى جاڭالىقتاردىڭ ءبىرى – سۋبسيديالاردى بەكىتىلگەن ۋاقىتتا عانا ەمەس, تۇقىمدى, تىڭايتقىشتى, پەستيتسيدتەردى ساتىپ الىنعان كۇننەن باستاپ جىل ون ەكى اي الا الاتىن مۇمكىندىك بەرىلىپ وتىر.
قارجى قۇرالدارىن جەتىلدىرۋ اياسىندا اينالىم قاراجاتىن تولىقتىرۋعا ارنالعان نەسيەلەر بويىنشا سىياقى مولشەرلەمەلەرىن سۋبسيديالاۋ ءنورماتيۆى 5%-دان 7%-عا دەيىن ۇلعايتىلدى. ەندى ەگىن ەگۋ جانە ەگىن جيناۋ جۇمىستارىن جۇرگىزۋ سىياقى مولشەرلەمەسىنىڭ 9%-ى سۋبسيديالانادى.
«اگروونەركاسىپ كەشەنىنىڭ سۋبەكتىلەرى ءۇشىن كەپىلدىك بازاسى جەتپەگەن جاعدايدا ەكىنشى دەڭگەيدەگى بانكتەردىڭ نەسيەلەرىنە كەپىلدىك بەرۋ مەحانيزمى قولجەتىمدى بولدى. نەسيە سوماسىنىڭ 50%-نا دەيىن جانە باسىم ينۆەستيتسيالىق جوبالار بويىنشا نەسيە سوماسىنىڭ 85%-نا دەيىن كەپىلدىك بەرىلەدى.
وتكەن جىلدان باستاپ اۋىل شارۋاشىلىعى سالاسىندا ساقتاندىرۋدىڭ جاڭا جۇيەسى جۇمىس ىستەي باستادى. ياعني, ساقتاندىرۋ ەرىكتى تۇردە جاسالادى. سونداي-اق وسىمدىك شارۋاشىلىعى سالاسىن عانا ەمەس, باسقا دا سالالاردى ساقتاندىرۋ مەحانيزمى ەنگىزىلدى», دەپ حابارلادى ساپارحان وماروۆ.
وتىرىس سوڭىندا قوعامدىق كەڭەس مۇشەلەرى ۇيىمداستىرۋ ماسەلەلەرىن قارادى. اتاپ ايتقاندا, تورالقا قۇرامىن, ەرەجەنى جانە جىلدىق جۇمىس جوسپارىن بەكىتتى.
