ءىس-شارا قازاقستان رەسپۋبليكاسى تاۋەلسىزدىگىنىڭ 30 جىلدىعىن مەرەكەلەۋ اياسىندا نۇر-سۇلتان قالاسى اكىمدىگىنىڭ قولداۋىمەن ۇيىمداستىرىلدى.
كەزدەسۋگە قاتىسۋشىلار – مادەنيەت, سپورت, عىلىم, مەديتسينا, بيزنەس جانە ساياسات سالالارىنىڭ كورنەكتى تۇلعالار جيىندا ەل تاريحىنىڭ كۇردەلى كەزەڭدەرىن, ۇرپاقتار ساباقتاستىعىن, تاۋەلسىز حالىقتىڭ ۇلتتىق ساناسىن قالىپتاستىرۋداعى ىرگەلى ىستەردى تالقىلادى.
جينالعاندار الدىندا نۇر-سۇلتان قالاسى اكىمىنىڭ ورىنباسارى باقتيار ماكەن ءسوز سويلەدى. ول كوپشىلىكتى ازاتتىعىمىزدىڭ ايتۋلى كۇنىمەن قۇتتىقتاپ, حالىق تاريحىن ۇرپاق جادىندا جاڭعىرتۋدىڭ ماڭىزدىلىعىن اتاپ ءوتتى.
«تاۋەلسىزدىك – قاسيەتتى ۇعىم. بوستاندىق ەلىمىزدىڭ جانە ازاماتتارىمىزدىڭ دامۋى ءۇشىن كەرەمەت مۇمكىندىكتەر بەرەدى. ەگەمەن مەملەكەتتىڭ سوڭعى وتىز جىلداعى ەلەۋلى جەتىستىگى تۇڭعىش پرەزيدەنت – ەلباسى نۇرسۇلتان نازارباەۆتىڭ سىندارلى ساياساتىمەن, سونداي-اق تاۋەلسىزدىكتىڭ باستاۋىندا تۇرعان ءبىلىمدى, كاسىبي, تالانتتى قازاقستاندىقتاردىڭ, ياعني وتانداستارىمىزدىڭ قاجىرلى ەڭبەگىنىڭ ارقاسىندا مۇمكىن بولدى», دەدى ب.ماكەن.
ءىس-شارا بارىسىندا ازات ابىكەن پروديۋسەرلىك جاساعان «وتىز. حالىق تاعدىرى - ەل تاريحى» اتتى دەرەكتى فيلم كورسەتىلدى. بۇل كارتينادا قازاقستاننىڭ تاۋەلسىزدىك العاننان باستاپ قازىرگى ۋاقىتقا دەيىنگى كۇردەلى كەزەڭى جۇيەلى تۇردە, كينو تىلىمەن كوركەم باياندالعان.
«وتىز. حالىق تاعدىرى - ەل تاريحى» اتتى كينوعا بايلانىستى قالا اكىمىنىڭ ورىنباسارى پىكىرىن ءبىلدىرىپ, ۇلى ويشىل ءال-ءفارابيدىڭ «تاريحىن بىلمەيتىن جۇرتتى ب ۇلىڭعىر بولاشاق كۇتىپ تۇر» دەگەن سىڭايداعى قاناتتى ءسوزىن جەتكىزدى. دەرەكتى فيلم كوپشىلىكتىڭ ويىنان شىعىپ, ىستىق ىقىلاسىنا يە بولدى.
«تاۋەلسىزدىكتىڭ وتىز جىلى ۇلى وقيعالار مەن قازاقستان تاريحىنداعى ەلەۋلى وزگەرىستەرگە تولى. ءبىزدىڭ مىندەتىمىز - مۇنى جاس ۇرپاققا ءتۇسىندىرۋ, ەلىمىزدىڭ ءتۇرلى سالالارىندا دامۋىنا ءوز ۇلەسىن قوسقان ازاماتتارىمىزدى قۇرمەتتەۋ جانە ولارعا قولداۋ كورسەتۋ. سوندىقتان بۇگىنگى فيلم اۋديتوريانىڭ نازارىن اۋدارىپ, ۇلتتىق سانا-سەزىمدى قالىپتاستىرۋدا, ءپاتريوتيزمدى ناسيحاتتاۋدا ماڭىزدى ءرول اتقارادى دەپ سەنەمىن», دەپ تولىقتىردى باقتيار ماكەن ءسوزىن.
جينالعانداردىڭ اراسىندا حح عاسىردىڭ 90-شى جىلدارى قازاقستان ساياساتىنىڭ حالىقارالىق ۆەكتورىن قالىپتاستىرۋعا بەلسەندى اتسالىسقان قازاقستاننىڭ تۇڭعىش سىرتقى ىستەر ءمينيسترى تولەۋتاي سۇلەيمەنوۆ تە بولدى.
«بىزدە ول شاقتا بوس ۋاقىت بولمادى, ءبىز تەك تاۋەلسىزدىگىمىزدىڭ تۇعىرىن نىعايتۋ تۋرالى ويمەن ءومىر سۇردىك, ەلدى تەزىرەك كوتەرۋىمىز كەرەك دەگەن اسىل مۇراتىمىز بولدى. تاۋەلسىزدىك بىزگە ەركىندىك, حالقىمىزدىڭ بىرلىگىن بەردى. ازاماتتىق سوعىستار بولعان جوق. حالىق ءبىزدىڭ تۇڭعىش پرەزيدەنتىمىز نۇرسۇلتان ءابىش ۇلى نازارباەۆتى قولدادى. حالىق بولماسا, ول ەشتەڭە ىستەي المايتىن ەدى. حالىق وعان سەندى جانە ونى قولدادى. تۇڭعىش پرەزيدەنتتىڭ قۇرامىندا جاۋىنگەرلەردەن, ءوز ەلىنىڭ پاتريوتتارىنان, ءوز ادامدارىنان تۇراتىن قۋاتتى كوماندا بولدى», دەپ ەسكە الدى مەملەكەت قايراتكەرى.
حالىقارالىق دودالاردا ءوز ەلىنىڭ قورجىنىنا بىرنەشە التىن مەدال سالعان وليمپيادا چەمپيونى ولگا شيشيگينا دا تاۋەلسىزدىكتىڭ ماڭىزدىلىعى تۋرالى ايتتى. ونىڭ پايىمىنشا, كەڭەس وداعى جىلدارىندا وداقتىڭ سپورتتىق قۇراماسىنا كىرۋ وتە قيىن بولاتىن. ويتكەنى, وعان ەڭ الدىمەن ماسكەۋدەن جانە وعان جاقىن قالالاردان سپورتشىلار ەنەتىن ەدى. بىراق تاۋەلسىزدىككە قول جەتكىزگەننەن كەيىن قازاقستاندىق سپورتشىلار تەك وليمپيادا ويىندارىندا عانا ەمەس, باسقا دا بايراقتى باسەكەلەردە ءوز حالقى مەن ەلىنىڭ نامىسىن قورعادى, ماقتاناتىنداي دەڭگەيگە كوتەردى.
ءوز كەزەگىندە تۇڭعىش پرەزيدەنت كىتاپحاناسى ديرەكتورىنىڭ ورىنباسارى بوتاگوز قايىپوۆا قازاقستاندىقتاردىڭ جاس ۇرپاعىنىڭ ەل بولاشاعىنداعى رولىنە نازار اۋداردى.
«مەنىڭ ويىمشا, تاۋەلسىزدىك قۇرداستارىنىڭ بۋىنى ەڭ باقىتتى, ويتكەنى ولار ەگەمەن, ازات ەلدە تۋدى, سول مەملەكەتتە ءومىر ءسۇرىپ جاتىر. نۇرسۇلتان ءابىش ۇلى دا ءوز وكىلەتتىگىن تاپسىرا وتىرىپ, تاۋەلسىز قازاقستاننىڭ ەڭ باستى جەتىستىگى - جاڭا تاۋەلسىز ۇرپاق ەكەنىن ايتتى. قاسىم-جومارت كەمەل ۇلى «اعا بۋىننىڭ مىندەتى - تاۋەلسىز ەلدىڭ كرەاتيۆتى ءبىلىمدى, اقىلدى, تابىستى ۇرپاعى بولۋ ءۇشىن بارلىق جاعدايدى جاساۋ» دەپ اتاپ ءوتتى. جوعارى اتاققا - تاۋەلسىز قازاقستاننىڭ ۇرپاعى دەگەن اتقا لايىق بولىڭىزدار!», دەدى ول.
شارانىڭ سوڭىندا اعا جانە جاس بۋىن وكىلدەرى تاۋەلسىز قازاقستاننىڭ قالىپتاسۋ تاريحىنىڭ جارقىن وقيعالارىنا ارنالعان قر تۇڭعىش پرەزيدەنتى مۋزەيىندەگى فوتوكورمەنى تاماشالادى.
