ەرلان قارين Telegram-داعى پاراقشاسىندا جۋىقتا پرەزيدەنتتىك جاستار كادر رەزەرۆىنە ەكىنشى قابىلداۋ باستالاتىنىن جازدى.
ايتۋىنشا, بۇگىن مەملەكەت باسشىسى «پرەزيدەنتتىك جاستار كادر رەزەرۆىنىڭ كەيبىر ماسەلەلەرى» تۋرالى «قازاقستان رەسپۋبليكاسى پرەزيدەنتىنىڭ 2019 جىلعى 27 تامىزداعى № 141 جارلىعىنا وزگەرىستەر ەنگىزۋ تۋرالى» جارلىققا قول قويعان.
«رەزەرۆكە ەكىنشى ىرىكتەۋگە 35 جاسقا دەيىنگى, جوعارى ءبىلىمى بار جانە ەڭبەك ءوتىلى 5 جىلدان كەم بولمايتىن جاستار قاتىسا الادى.
سونداي-اق جاڭا ىرىكتەۋ شەڭبەرىندە ۇمىتكەرلەردىڭ مەملەكەتتىك ءتىلدى ورتا دەڭگەيدەن (ۆ1) تومەن ەمەس دەڭگەيدە مەڭگەرگەنى تۋرالى سەرتيفيكاتتىڭ بولۋى تۋرالى تالاپ ەنگىزىلدى», دەدى پرەزيدەنتىڭ كومەكشىسى.
ونىڭ جازباسىندا ايتىلعانداي, كانديداتتاردى ىرىكتەۋ ارنايى اقپاراتتىق جۇيە ارقىلى بىرنەشە كەزەڭدە جۇرگىزىلەدى:
- قۇجاتتاردى قابىلداۋ (ونلاين);
- ماتىندىك جانە ساندىق اقپاراتپەن جۇمىس ىستەۋ قابىلەتىن باعالاۋ (ونلاين);
- سيتۋاتسيالىق تاپسىرمالاردى شەشۋ (ونلاين);
4.قۇزىرەتتەردى باعالاۋ (وفلاين);
- ساراپتامالىق كوميسسيادا كانديداتتارمەن اڭگىمەلەسۋ (ونلاين);
- ۇلتتىق كوميسسيانىڭ وتىرىسىندا قاراۋ (الدىن الا ونلاين).
ۇمىتكەرلەر رەزەرۆكە 3 جىلعا قابىلدانادى.
«بۇگىنگى تاڭدا پرەزيدەنتتىك جاستار كادر رەزەرۆىنىڭ العاشقى لەگىنەن شىققان 179 جاس مامان مەملەكەتتىك ورگاندار مەن كۆازيمەملەكەتتىك كومپانيالارعا قىزمەتكە تاعايىندالدى. وسىلايشا, پرەزيدەنتتىك جاستار كادرلىق رەزەرۆى ءوزىنىڭ باستى مىندەتى – جاس ماماندار ءۇشىن ءتيىمدى الەۋمەتتىك ليفت قۇرۋ مىندەتىن ىسكە اسىرۋدا», دەپ جازدى ەرلان قارين.
