ساياباق – ەلوردا تۇرعىندارى مەن قالا قوناقتارىنىڭ سۇيىكتى دەمالىس ورنىنىڭ ءبىرى. مۋزەي عيماراتىنىڭ جانىندا بالالار وينايتىن جاڭا زاماناۋي الاڭدار, ساحنا الاڭى, Workout الاڭى, 3 ستريتبول الاڭى بار. ولاردىڭ سالىنۋىنا نۇرسۇلتان نازارباەۆ قورى مۇرىندىق بولعان.
نىسانداردىڭ اشىلۋ قۇرمەتىنە وراي ارنايى مەرەكەلىك باعدارلاما ءوتتى. شىعارماشىلىق توپتاردىڭ, انيماتورلاردىڭ قاتىسۋىمەن بي مەن ويىن-ساۋىق ويىندارى ۇيىمداستىرىلدى.
نۇرسۇلتان نازارباەۆ قورىنىڭ ديرەكتورى داريعا نازارباەۆا, Nur Otan پارتياسى توراعاسىنىڭ ءبىرىنشى ورىنباسارى باۋىرجان بايبەك جاڭا دەمالىس ورىندارىن ارالادى. تۇرعىندار مەن قالا قوناقتارى ولارمەن ديدارلاسىپ, ادەمى اسەرلەرىمەن ءبولىستى.
– بۇل وتە جايلى جەر ەكەن. ۇزاق سەرۋەندەي بەرگىڭ كەلەدى. بالالار دا كوڭىلدى. مۇنداعى ەرەكشە سۋبۇرقاقتار مەن ويىن الاڭدارى ادامدى وزىنە باۋرايدى, – دەيدى قالا تۇرعىنى اينۇر جاقىپوۆا.
ال الىستان ات تەرلەتىپ كەلگەن ءلاززات امانباەۆا بولسا, استانانىڭ كۇننەن-كۇنگە وسىلاي كوركەيىپ كەلە جاتقانىنا ءدان ريزا.
«قاراعاندىدان اپكەمە قوناققا كەلگەنمىن, ول وسىندا سەرۋەندەۋدى ۇسىندى. بۇل جەر ماعان ۇنادى. مۇندا ءبارى ىڭعايلى ءارى ادەمى. ءارتۇرلى الاڭى بار ساياباق بالالارعا دا, سپورتسۇيەر قاۋىمعا دا, قارتتارعا دا ۇنايدى دەپ ويلايمىن», دەيدى ل.امانباەۆا.
بۇگىندە ساياباق سالۋدىڭ ءبىرىنشى كەزەڭى اياقتالدى. بالالار مەن ەرەسەكتەردىڭ بوس ۋاقىتىن ءتيىمدى وتكىزۋىنە بارلىق جاعداي بار. ءالى دە اباتتاندىرۋ جۇمىستارى جالعاسادى. ەكىنشى كەزەڭدە اعاش وتىرعىزۋ جوسپارلانعان, ارنايى ۆەلو جانە جارىس جولى جاسالادى. قىس مەزگىلىندە اۋماقتا مۇز ايدىنى مەن شاڭعى تراسساسى پايدا بولادى.
