نەسيەسى بار ادام بانكپەن ءار كەز بايلانىستا بولادى. اي سايىنعى تولەمىن جاسايدى, قايتا قارجىلاندىرادى, تولەمىن كەشىكتىرەدى, سول ماسەلە بويىنشا بولىمشەگە بارادى, قوڭىراۋ شالىپ مەنەدجەردىڭ بوساۋىن كۇتەدى. ايتەۋىر, تاۋسىلمايدى-اق. وقىستان كەلگەن پاندەميا بىزگە قاشىقتان ارالاسۋدى ۇيرەتتى. مۇندايدا بانكتەر دە كليەنتپەن قارىم-قاتىناس فۋنكتسياسىن جەتىلدىرىپ, ءموبيلدى قوسىمشالارىن دامىتۋى ءتيىس. وسى ورايدا ەكىنشى دەڭگەيلى بانكتەردىڭ ونلاين قىزمەتىنە شولۋ جاساعاندى ءجون كوردىك.
ءموبيلدى بانكينگتىڭ دامۋى اسىرەسە, زاڭدى تۇلعالار ءۇشىن اسا قاجەت. بيزنەسىن ساقتاۋ ءۇشىن كاسىپكەرلەر جەدەل ءارى ساپالى بانك ءونىمىن تۇتىنعىسى كەلەدى. ەكىنشى دەڭگەيلى بانكتەردىڭ ءموبيلدى قوسىمشاسىن Play Market جانە App Store جۇيەسىنەن جۇكتەپ الۋعا بولادى. Ranking مالىمەتىنشە, ءموبيلدى بانكينگ بويىنشا ەڭ ۇزدىك كورسەتكىش «الفا-بيزنەس كازاحستان» ونىمىنە تيەسىلى ەكەن. «الفا بانك» قوسىمشاسىنا Play Market-تە 4,8 (بارلىعى 5), App Store-دە 4,7 جۇلدىز دەڭگەيى بەرىلگەن. قوسىمشا ارقىلى ازاماتتار بانكتىڭ شاعىن جانە ورتا بيزنەسكە ۇسىناتىن بارلىق وپەراتسياسىنىڭ 99 پايىزىن پايدالانا الادى. قولجەتىمدى فۋنكتسيالار ىشىندە – شوتتاردى باسقارۋ, ءۇزىندى كوشىرمەلەر مەن انىقتامالار الۋ, ونلاين نەسيەلەۋ, بارلىق تولەمدى جۇزەگە اسىرۋ, تەڭگەلىك جانە ۆاليۋتالىق وپەراتسيالار قىزمەتتەرى بار. ەكىنشى ورىندا 4,7 (Play Market) جانە 4,6 (App Store) جۇلدىزبەن Jýsan Business (Jusan Bank) ورنالاسقان. سونداي-اق قارجى ينستيتۋتىندا كونتاكتىسىز تولەمدەرگە ارنالعان JPAY قوسىمشاسى دا بار. ءۇشىنشى ورىندا 4,4 جانە 4,1 جۇلدىزبەن Kaspi Pay (Kaspi Bank).
SME Banking Club ساراپشىلارىنىڭ زەرتتەۋىنشە, تمد مەن كاۆكاز ەلدەرىندەگى بيزنەس-كليەنتتەرگە ارنالعان ءموبيلدى بانك توپ-20-لىعىنا قازاقستاندىق ەكىنشى دەڭگەيلى 5 بانك ەنگەن. وندا ءموبيلدى قوسىمشالاردىڭ AppStore مەن Play Market-تەگى باعاسى, جۇكتەلۋ مەن پىكىر سانى ەسكەرىلگەن. ۇزدىكتەر قاتارىنا كىرگەن قازاقستاندىق قارجى ينستيتۋتتارى – «الفا-بانك», «بانك تسەنتركرەديت», «سبەربانك», «اتف بانك» جانە Halyk Bank.
