كەز كەلگەن ەلدىڭ مەملەكەتتىك ماڭىزى بار ايشىقتى بەلگىلەرىنە قويىلاتىن ەرەكشە تالاپتار بار. مىسالى, مەملەكەتتىك ءانۇراننىڭ ءسوزى وڭاي جاتتالاتىن, اۋەنى رۋحتى كوتەرەتىندەي سالتاناتتى بولۋى كەرەك بولسا, ۆاليۋتاسى ەشكىم قولدان جاساي المايتىنداي كۇردەلى بولۋى كەرەك. ءبىزدىڭ ءتول تەڭگەمىز وسى تالاپقا ساي كەلەدى. سوندا دا زاڭسىز جولمەن وڭاي ولجا تاپقىسى كەلەتىندەر جالعان اقشا جاساۋدى قوياتىن ءتۇرى جوق.
ۇلتتىق بانكتىڭ بانكنوتتار مەن مونەتالار ساراپتاماسى باسقارماسىنىڭ باستىعى اسحات ابىشەۆتىڭ مالىمەتىنشە, بيىلعى ءبىرىنشى توقسانداعى قولدان جاسالعان اقشالاردىڭ كوبى نومينالى 2 000 جانە 5 000 تەڭگەلىك بانكنوتتار بولعان. ال باسقا بانكنوتتار مەن مونەتالاردىڭ ۇلەسى 12%-دى قۇراعان.
جالعان بانكنوتتاردىڭ كوپ بولىگى – الماتىدا (169), ەڭ ازى قىزىلوردا مەن جامبىل وبلىستارىندا انىقتالعان.
جاساندى اقشا ءوندىرىسى – باس اينالدىرارلىق تابىس اكەلەتىن كولەڭكەلى بيزنەستىڭ ءتۇرى. اقپاراتتىق تەحنولوگيانىڭ قارىشتاپ دامىعان قازىرگى كەزەڭىندە تەحنولوگيانىڭ بارلىق قىر-سىرىن مەڭگەرگەن اككى قۋلار زاماناۋي قۇرىلعىلاردىڭ كومەگىمەن-اق ءاپ-ساتتە جالعان بانكنوتتاردى اينىتپاي جاساپ شىعارادى. قازىر ءتىپتى پوليگرافيالىق جابدىقپەن باسىپ شىعارعان ۆاليۋتالاردى تەك بانكتە, ارنايى قۇرىلعىنىڭ كومەگىمەن عانا اجىراتۋىڭىز مۇمكىن.
دەگەنمەن دە بانكنوتتىڭ تۇپنۇسقاسىن جالعان اقشادان اجىراتۋدىڭ جولى بار. ا.ابىشەۆتىڭ ايتۋىنشا, ەلىمىزدەگى جالعان ۆاليۋتانىڭ كوپ بولىگى جەڭىل تەحنولوگيامەن جاسالادى, ولار تۇپنۇسقاداعى نەگىزگى بەلگىلەردى تەك يميتاتسيالاۋمەن عانا شەكتەلەدى. سوندىقتان ارنايى جابدىقسىز-اق جالعان بانكنوتتاردى قولمەن ۇستاپ, مۇقيات قاراپ تا انىقتاۋعا بولادى. تۇپنۇسقا بانكنوتتىڭ بىرنەشە ايرىقشا بەلگىسى بار. «بىرىنشىدەن, ناعىز اقشا شىتىرلاق كەلەدى. ەكىنشىدەن, ارنايى بەدەرى بولادى. سوسىن بارلىق بانكنوتتا كورۋ قابىلەتى ناشار ادامدارعا ارنالعان ساۋساق ۇشىمەن اجىراتۋعا بولاتىن بەلگىلەر بار. 1000, 2000, 5000, 10000 جانە 20000 تەڭگەلىك بانكنوتتاردا ءتۇس وزگەرتەتىن بوياۋمەن سالىنعان بەينەلەر بولادى. كولبەۋ بۇرىشىن وزگەرتكەن كەزدە ورنەك ءتۇسى جاسىلدان التىنعا وزگەرەدى. سونداي-اق تۇپنۇسقا اقشانى جارىققا توسىپ قاراعان كەزدە جازۋ شىعادى, ول پۋنكتير تۇرىندەگى تۇتاس ماگنيتتى جانە ۇزىك-ۇزىك ءجىپ ءتارىزدى بولادى, سوعان نازار اۋدارعان ءجون», دەيدى ۇلتتىق بانكتىڭ باسقارما باسشىسى.
دەگەنمەن دە بانكنوتتار اينالىمدا كوپ جۇرگەن سايىن وسى ايرىقشا بەلگىلەر وشە باستاۋى مۇمكىن. ەسكى تەڭگەلەردى اينالىمنان شىعارىپ, ورنىنا جاڭاسى ەنگىزىلىپ وتىراتىنى سوندىقتان.
جۇرتشىلىققا ايتارىمىز, پاتەر نەمەسە كولىك سەكىلدى الدەبىر قىمبات م ۇلىك ساتاردا ساق بولىڭىز. قوماقتى اقشانى الماس بۇرىن بانكنوتتى تەكسەرەتىن قۇرىلعىسى بار نوتاريۋستى تاڭداۋ كەرەك نەمەسە بانككە بارىپ, اقشانى تەكسەرتىپ, ەسەپشوتقا اۋدارتقانىڭىز ءجون.
