بۇگىن اقتوبە قالاسىنداعى ابىلقايىر حان داڭعىلى بويىندا جول-كولىك وقيعاسى تىركەلدى.
«Shacman» ماركالى جۇك كولىگىنىڭ جۇرگىزۋشىسى بۇرىلىستا قارسى كەلە جاتقان «BMW» ماركالى اۆتوكولىگىنە جول بەرمەي, سوقتىعىسقان. سول كەزدە جۇك كولىگى قوزعالىس باعىتىن وزگەرتىپ, جاياۋ جۇرگىنشىلەر جولىمەن ءجۇرىپ كەلە جاتقان باتىس قازاقستان وبلىسىنىڭ 32 جاستاعى تۇرعىنىن قاعىپ كەتكەن.
جول اپاتى سالدارىنان ايەل سول جەردە كوز جۇمدى. ال «BMW» اۆتوكولىگىنىڭ جۇرگىزۋشىسى جەدەل مەديتسينالىق جاردەم اۋرۋحاناسىنا جاتقىزىلدى.
«جول-كولىك وقيعاسىنىڭ نەگىزگى سەبەبى – قاراپايىم ەرەجەنى بۇزۋ. جۇرگىزۋشىلەر تاۋەكەلگە بارىپ, ورنى تولماس وكىنىشكە دۋشار بولىپ جاتادى. وسىعان بايلانىستى جول قوزعالىسىنا قاتىسۋشىلاردى جول ەرەجەلەرىن ساقتاۋعا شاقىرامىن. ءسىزدىڭ ويلانباي ىستەگەن ارەكەتىڭىزدەن ەشبىر كىناسى جوق ادام زارداپ شەگۋى مۇمكىن. بۇل جەردە ءوز جونىمەن كەتىپ بارا جاتقان ايەل قازا تاپتى», دەيدى وبلىستىق پد باستىعى اتىعاي ارىستانوۆ.
