سەناتورلار «كۆازيمەملەكەتتىك سەكتوردىڭ جەكەلەگەن سۋبەكتىلەرىنىڭ ساتىپ الۋى تۋرالى» جانە «قازاقستان رەسپۋبليكاسىنىڭ كەيبىر زاڭنامالىق اكتىلەرىنە كۆازيمەملەكەتتىك سەكتوردىڭ جەكەلەگەن سۋبەكتىلەرىنىڭ ساتىپ الۋى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوبالارىن قارادى.
قۇجاتتار ساتىپ الۋ سالاسىنداعى زاڭنامانى جەتىلدىرۋگە باعىتتالعان. ول ءۇشىن زاڭ جوباسىندا ساتىپ الۋدى جۇزەگە اسىرۋ ۇستانىمدارى مەن تاسىلدەرى, ساتىپ الۋعا قاتىسۋعا بايلانىستى شەكتەۋلەر, ساتىپ الۋدى جوسپارلاۋ قاعيدالارى جانە الەۋەتتى ءونىم جەتكىزۋشىلەرگە بىلىكتىلىك تالاپتارى بەلگىلەنەدى. ودان باسقا, ساتىپ الۋ تۋرالى زاڭنامانىڭ ساقتالۋىن باقىلاۋ جانە تاپسىرىس بەرۋشىنىڭ, ساتىپ الۋدى ۇيىمداستىرۋشىنىڭ, تەندەرلىك كوميسسيانىڭ جانە باسقالاردىڭ ءىس-ارەكەتى مەن شەشىمدەرىنە شاعىمدانۋ ماسەلەلەرى بەلگىلەندى.
«الەۋەتتى ءونىم جەتكىزۋشىدەن الىنعان جالعان اقپاراتتىڭ, سونداي-اق ساتىپ الۋعا جوسىقسىز قاتىسۋشىلاردىڭ ءتىزىلىمىن قالىپتاستىرۋ زارداپتارىن رەتتەيتىن ەرەجەلەر ەنگىزىلەدى. ورتالىقتاندىرىلعان ساتىپ الۋدى باقىلاۋ قىزمەتى مەن قۇزىرەتتى سالاداعى ۋاكىلەتتى ورگان ءوز كەزەگىندە كۆازيمەملەكەتتىك سەكتورداعى جەكەلەگەن سۋبەكتىلەردىڭ ساتىپ الۋ تۋرالى زاڭناما تالاپتارىن ساقتاۋىنا باقىلاۋ جۇرگىزەتىن بولادى», دەپ اتاپ ءوتتى سەناتور ەرىك سۇلتانوۆ.
سەناتورلاردىڭ ايتۋىنشا, زاڭ جوبالارىن قابىلداۋ ساتىپ الۋ جۇيەسىنىڭ ءتيىمدى جۇمىس ىستەۋىنە, سونداي-اق راسىمدەردىڭ اشىقتىعىن ارتتىرۋعا جانە سىبايلاس جەمقورلىق قاۋپىن ازايتۋعا ىقپال ەتۋى ءتيىس.
