«بۇل وقۋ جىلى بۇكىل الەمدەگى وقۋشىلار مەن ستۋدەنتتەر ءۇشىن وڭاي بولعان جوق. الەمدىك ءبىلىم ءبىرۋ جۇيەسى پاندەميا سىندى ۇلكەن سىناقتان ءوتتى. ءبىز مۇعالىمدەرمەن بىرلەسە وتىرىپ ءبىلىم بەرۋ جۇيەسىنە جاڭا دەم بەرىپ, ولارعا بارىنشا قاجەتتى جاعداي جاساۋعا تىرىستىق. سىزدەر وقۋلارىڭىزدى اياقتاپ جاتىرسىزدار. كەيبىر تۇلەكتەر جوعارى وقۋ ورىندارىنا نەمەسە كوللەدجدەرگە تۇسسە, ەندى بىرەۋلەرى جۇمىس ىستەيدى. قالاي بولسا دا, الداعى ۋاقىتتا سىزدەردى جاڭا مۇمكىندىكتەر مەن جاڭا ءومىر بەلەستەرى كۇتىپ تۇر», دەپ جازدى مينيستر ءوزىنىڭ الەۋمەتتىك جەلىدەگى پاراقشاسىندا.
جاستاردىڭ جىگەرىنە جىگەر قوسۋ ءۇشىن ۆەدومستۆو باسشىسى ءوز تاجىريبەسىن دە بولىسكەن.
مينيستر ارمانعا ادال بولۋ كەرەكتىگىن, قيىندىقتان قورىقپاۋ كەرەكتىگىن تىلگە تيەك ەتەدى.
«ادام بالاسى ءوز كۇشى مەن ارمانىنا سەنۋى كەرەك. قۇلاساڭ دا قايتا تۇرىپ, العا ۇمتىلۋعا تىرىسۋ كەرەك. ەستەرىڭىزدە بولسىن, تاعدىر ماقساتى ايقىن جانە العان بەتىنەن قايتپايتىن ادامداردى جاقسى كورەدى. ەكىنشىدەن, قاتەلەسۋدەن قورىقپاۋ كەرەك. قاتەلىك جاسالسا, ءومىر سونىمەن اياقتالمايدى. بارلىق ادام قاتەلەسەدى. ەڭ باستىسى – ءوز قاتەلىگىمىزدى ۋاقىتىلى ءتۇسىنىپ, تۇزەتۋگە تىرىسۋىمىز الدەقايدا ماڭىزدى. بارىنشا كۇش-جىگەرىمىزدى سالىپ, العان بەتتەن قايتپاعانىمىز ابزال. مىنە, بۇل – بولاشاقتا تابىسقا قول جەتكىزەتىن ادامعا ءتان قاسيەت», دەيدى ايماعامبەتوۆ.
سونداي-اق ءبىلىم ءمينيسترى مىقتى تۇلەكتەردى پەداگوگ ماماندىعىن تاڭداۋعا شاقىردى.
«ويتكەنى ءبىلىم ساپاسى, ەلدىڭ بولاشاعى جوعارى وقۋ ورىندارىن اياقتاپ شىعاتىن مۇعالىمدەرگە تىكەلەي بايلانىستى. بۇل ۇلكەن دارەجەگە يە جانە وتە قۇرمەتتى ماماندىق. مۇعالىم ماماندىعىنىڭ مارتەبەسىن ارتتىرۋ ءۇشىن پرەزيدەنتتىڭ تاپسىرماسى بويىنشا ءبىز پەداگوگتەردىڭ جالاقىسىن بەلسەندى تۇردە ارتتىرىپ جاتىرمىز. شامادان تىس ەسەپتىلىكتى الىپ تاستادىق», دەپ جازدى مينيستر.
سونداي-اق بولاشاق پەداگوگتەردىڭ ستيپەندياسى ەڭ جوعارى ستيپەنديا بولاتىنىن, بۇل باعىتتاعى جۇمىستار ءارى قاراي دا جالعاسىن تاباتىنىن ايتتى.
«قۇرمەتتى جاس تۇلەك! العا قويعان ماقساتتارىڭىزعا جەتىڭىزدەر. باتىل بولىڭىزدار. ءبارى ءوز قولدارىڭىزدا ەكەنىن ەستەرىڭىزدە ساقتاپ جۇرىڭىزدەر. ءسوز سوڭىندا ايتارىم: وزدەرىڭدى شەكتەمەي, كەڭ ءارى اۋقىمدى ويلاۋعا تىرىسىڭدار. سوندا عانا تولاعاي تابىستارعا جەتەسىزدەر! ومىرلەرىڭىزدەگى جاڭا كەزەڭ قۇتتى بولسىن, دوستار! بولاشاقتا جاڭا جەتىستىكتەرگە جەتە بەرىڭدەر!», دەلىنگەن ءمينيستردىڭ جازباسىندا.
