– باتىس قازاقستان وبلىسىندا 2021 جىلدىڭ باسىنان بەرى كوروناۆيرۋس ينفەكتسياسىن جۇقتىرىپ, دۇنيەدەن وتكەندەردىڭ سانى 152 ادام بولدى. ونىڭ ىشىندە قاڭتاردا – 28, اقپاندا – 15, ناۋرىزدا – 30, ساۋىردە 42 ءولىم تىركەلدى. مامىر ايىنىڭ باسىنان بۇگىنگە دەيىن 37 ادام قايتىس بولعان. مارقۇمداردىڭ 80-ءى – ايەل ادام, 72-ءسى – ەر ادام. اۋداندا قايتىس بولعاندار سانى 18 بولسا, قالادا 134 ادام دۇنيەدەن ءوتتى, – دەدى وڭىردەگى ەپيدەميالىق احۋالعا ساراپتاما جاساعان وبلىستىق دەنساۋلىق ساقتاۋ باسقارماسى باسشىسىنىڭ مىندەتىن اتقارۋشى ارمان قاليبەكوۆ.
مارقۇمداردىڭ باسىم كوپشىلىگىندە جۇرەك-قان تامىرلارى اۋرۋلارى, قانت ديابەتى جانە باسقا دا ىلەسپەلى سوزىلمالى دەرتى بولعان.
دارىگەرلەردىڭ ايتۋىنشا, ءدال قازىرگى جاعدايدا 195 ناۋقاسقا ارنالعان 4 كارانتيندىك ستاتسيوناردا دا, 1 123 توسەكتىك ورىندىق 18 ينفەكتسيالىق ستاتسيوناردا دا, ينفەكتسيالىق ستاتسيونارلارداعى 72 رەانيماتسيالىق بولىمدەردە دە توسەكتىك ورىن جەتكىلىكتى.
وبلىس بويىنشا 1 اقپاننان باستاپ COVID-19 قارسى ۆاكتسينالاۋ باستالعان بولاتىن. بۇگىنگە دەيىن وبلىستا ۆاكتسينانىڭ 138 560 دوزاسى كەلىپ تۇسكەن, ونىڭ 89 050 دوزاسى – I كومپونەنت, 49 510 دوزاسى –
II كومپونەنت.
25 ءساۋىر كۇنى وبلىسقا جەتكىزىلگەن 2 مىڭ دوزا (1 مىڭ دوزا – ءى كومپونەنت, 1 مىڭ دوزا – ءىى كومپونەنت) قازاقستاندىق ۆاكتسينا تۇرعىندارعا تولىعىمەن ەگىلگەن. سونىمەن قاتار بىرىككەن اراب امىرلىكتەرىندە وندىرىلگەن 45 مىڭ دوزا Hayat-Vax اراب ۆاكتسيناسى دا وبلىس تۇرعىندارىنا جەتكىزىلدى.
جالپى, وبلىس بويىنشا ۆاكتسينانىڭ ءى كومپونەنتىمەن 65 547 ادامعا ەگىلگەن بولسا, 24 مامىر كۇنگى مالىمەت بويىنشا ۆاكتسينانىڭ ءىى كومپونەنتىن بارلىعى 27 773 باتىسقازاقستاندىق الىپ ۇلگەرگەن.
ارمان تالعات ۇلىنىڭ پىكىرىنشە, وڭىردەگى كوروناۆيرۋسقا قاتىستى ەپيدەميالىق احۋال ناشار. ينفەكتسيالىق ستاتسيونارعا اۋىر جانە اسا اۋىر حالدە ءتۇسىپ جاتقان ناۋقاستار ازايماي وتىر.
– 1 مامىردان بەرى وبلىستا COVID-19-بەن اۋىرعاندار سانى 2 550 ادام بولدى. زەرتحانالاردا 51 870 مارتە پتر-تەست وتكىزىلدى, ورتا ەسەپپەن كۇنىنە 2 255 تەست زەرتتەلۋدە, – دەيدى وبلىستىق سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى نۇرلىبەك مۇستاەۆ.
وڭىردە سوڭعى اپتادا وتكەن اپتامەن سالىستىرعاندا اۋرۋشاڭدىق 7,7%-عا تومەندەگەن. بىراق بوساڭسۋعا ەرتە. سوڭعى تاۋلىكتە, ياعني 23 مامىر كۇنى كوروناۆيرۋس 85 ادامنان انىقتالعان.
1 مامىردان باستاپ باتىس قازاقستان وبلىسىنداعى مەملەكەتتىك شەكارادان بارلىعى 22 846 ادام وتكەن ەكەن. ونىڭ ىشىندە 327 جولاۋشىنىڭ COVID-19 انىقتاماسى بولماعان. ارنايى ستاتسيوناردا جاسالعان تەست قورىتىندىسى ءبىر ادامدا ۆيرۋس بار ەكەنىن انىقتاعان. ال شەكارادان كەدەرگىسىز ءوتىپ, حالىقارالىق جۇك تاسىمالىن جۇزەگە اسىراتىن 2 191 جۇرگىزۋشى دە ءتيىستى انىقتاماسىز بولىپ, ولاردان پتر ادىسىمەن COVID-19 تەست الىنعان كەزدە, 9 ادامدا وڭ ناتيجە كورەتكەن. مونيتورينگ توپتار 179 رەيد جۇرگىزىلىپ, 965 نىسان قامتىلدى. 22 نىساندا قۇقىق بۇزۋشىلىقتار انىقتالدى. 22 حاتتاما تولتىرىلىپ, 962 610 تەڭگەگە ايىپپۇل سالىندى.
بۇگىنگى تاڭدا Ashyq قوسىمشاسىمەن وبلىس بويىنشا بارلىعى 391 نىسان جۇمىس ىستەيدى. 1 مامىردان باستاپ Ashyq جوباسىنا قاتىساتىن نىسانداردا «سارى/قىزىل» مارتەبەسى بار 136 ادام انىقتالعان.
