ويتكەنى بۇرىن اۋىل, كەنت جانە اۋىلدىق وكرۋگ اكىمدەرىن اۋدان ءماسليحاتى سايلايتىن. ال اۋداندىق ءماسليحاتتىڭ كانديداتتارىن اۋدان اكىمى ۇسىنعان جانە ولار جەرگىلىكتى قوعامداستىق جينالىسىمەن كەلىسىلگەن. مۇنداعى جاڭاشىلدىقتىڭ ءمانى مىنادا – ەندى اۋىلدىق وكرۋگ اكىمدەرىن سايلاۋ تىكەلەي بولادى. ياعني اكىمدەردى ءماسليحات دەپۋتاتتارى ەمەس, ازاماتتار – قاراپايىم حالىقتىڭ ءوزى تاڭدايدى.
اۋىلدىق وكرۋگتەردە اكىمدەردى تاڭداۋدىڭ جەتىلدىرىلگەن تەتىگى 2021 جىلدىڭ ەكىنشى جارتىسىنان باستاپ قولدانىسقا ەنگىزىلمەك. ال جىل سوڭىنا دەيىن 836 اۋىلدىق وكرۋگ اكىمىنىڭ وكىلەتتىك مەرزىمى اياقتالادى. زاڭ بويىنشا, بۇعان دەيىن 10 كۇن بۇرىن اكىمنىڭ تىكەلەي سايلاۋى ءوتۋى ءتيىس.
سايلاۋ تۋرالى زاڭناماعا ەنگىزىلگەن وزگەرىستەردىڭ ارتىندا ازاماتتاردى جەرگىلىكتى جەرلەردەگى ناقتى ساياساتقا تارتۋدىڭ زور الەۋەتى تۇر. زاڭناماداعى بۇل وزگەرىس اكىم لاۋازىمىنا كانديداتتار اراسىندا باسەكەلەستىكتى تۋدىرىپ, جەرگىلىكتى قوعامداستىقتىڭ جۇمىسىن جانداندىرادى دەگەن سەنىم مول. ويتكەنى تىكەلەي سايلاۋ ءوزىن ءوزى ۇسىناتىن كانديداتتاردىڭ بەلسەندىلىگىن ارتتىرىپ قانا قويمايدى, سونداي-اق ساياسي پارتيالاردى ايماقتاردا ءتيىمدى جۇمىس ىستەۋگە ىنتالاندىرادى. ال بۇل بەلسەندىلىك ساياسي پارتيالارعا وزدەرىنىڭ كانديداتتارى ناقتى بولۋى ءۇشىن وتە قاجەت.
ارينە, مۇنداي رەفورمانى جۇزەگە اسىرۋ ازاماتتار مەن قوعام بەلسەندىلەرىنىڭ, سونداي-اق جەرگىلىكتى مەملەكەتتىك باسقارۋ جانە ءوزىن ءوزى باسقارۋ ورگاندارى وكىلدەرىنىڭ ساياسي ساۋاتتىلىعى مەن مادەنيەتىن ارتتىرۋدى تالاپ ەتەدى. بۇل, سونىمەن قاتار ەل پرەزيدەنتى قاسىم-جومارت توقاەۆتىڭ اۋىلدىق وكرۋگتەر اكىمدەرىنىڭ تىكەلەي سايلاۋىن ەنگىزۋ تۋرالى باستاماسىن ىسكە اسىرۋ مۋلتيپليكاتيۆتى اسەر ەتەتىنىن دە اڭعارتادى.
ەرمەك توقتاروۆ,
قازاقستان رەسپۋبليكاسىنىڭ پرەزيدەنتى جانىنداعى ستراتەگيالىق زەرتتەۋلەر ينستيتۋتىنىڭ جەتەكشى عىلىمي قىزمەتكەرى, PhD
