مادەنيەت جانە سپورت مينيسترلىگى, Kazakh Tourism ۇلتتىق كومپانياسى, Jana Dunie قايىرىمدىلىق قورى, «بۋراباي دامۋ» سەرىكتەستىگى جانە وبلىستىق تۋريزم باسقارماسى, ۇلتتىق پاركتىڭ ءوز ۇجىمى ۇيىتقى بولعان ونەگەلى ءىس بۋراباي باۋرايىن مۇنتازداي ەتىپ تازالاۋمەن عانا ەمەس, جالپاق جۇرتتىڭ ەسىنە تاماشا تابيعاتتى ايالاي ءبىلۋ كەرەك ەكەنىن تاعى ءبىر مارتە ەسكە سالۋىمەن قۇندى. قازباۋىر بۇلتتى جامىلعان جارتاستاردىڭ بەتىندە نە جوق دەيسىز, كىمنىڭ قايدان كەلگەنى, قاشان كەلگەنى, «ساشا مەن ماشانىڭ ماڭگىلىك ماحابباتى» تۋرالى دەرەكتەر كوز سۇرىندىرەتىن.
ولقىلىقتىڭ ورنى تاياۋدا تولدى. بوي جەتەتىن, قول جەتەتىن جەردەگى جازۋ اتاۋلىنىڭ بارلىعى ءوشىرىلدى. ەندى تازا, تابيعي قالىپتا, باعزى زامانداعى پاك كۇيىندە. جازۋ عانا ەمەس, جىلدار بويى اعاش-اعاشتىڭ باۋىرىندا, قويتاستاردىڭ ىعىندا, قاعا بەرىستەردە جاتقان كۇل-قوقىس تا جينالدى. باقانداي ءبىر جارىم توننا.
– بۇگىنگى اكتسيا ەل نازارىن وزىنە اۋدارۋعا ءتيىس. باسقا جۇرت تا باعالى باستامانى ءىلىپ اكەتسە, جاراسىمدى بولار ەدى. ءبىز تابيعاتتى تازالاۋمەن قاتار ەل ساناسىن دا تازالاۋىمىز كەرەك, – دەيدى Kazakh Tourism ۇلتتىق كومپانياسىنىڭ توراعاسى ەرجان ەركىنباەۆ.
بۋرابايدىڭ جارتاسى عانا ەمەس, ءبيشى قايىڭدارى دا, ماڭگى جاسىل قاراعايى دا جارالى ەدى. سوڭعى كەزدە اق بالتىرلى قايىڭعا ورامال بايلاۋ ادەتى شىققان. مۇمكىن ەسكەرتكىش سانايتىن شىعار, الدە كيەلى جەرگە دەگەن قۇرمەت پە ەكەن؟ قالاي بولعان كۇندە دە ىلكىدەن كەلە جاتقان ەجەلگى سالت-ءداستۇر ەمەس, بۇگىنگىنىڭ بۇيرەكتەن سيراق شىعارعان جارتىلاي جابايى تانىم-تۇسىنىگى. قازىر اق شىت ورامالدىڭ جانىندا جامان تۇماۋدان قورعايتىن بەتپەردە دە ءىلۋلى تۇر. بۇل – ەندى ناعىز شەكتەن شىققاندىق.
جارتاستاردىڭ بەتىندەگى ايعىز-ايعىز جازۋلاردى ءوشىرۋ ءۇشىن حيميالىق ەرىتىندىلەر دە پايدالانىلدى. مۇنىڭ بارلىعى تابيعاتقا كىنارات كەلتىرمەي, ۇقىپتى جاسالدى. ەندى تابيعاتقا تاعىلىق كورسەتۋدەن تايىنبايتىن تەنتەكتەر ايىلىن جياتىن شىعار. ايتپاقشى, بۇل يدەيا وتكەن جىلى ومىرگە كەلگەن. بۋراباي باۋرايىنداعى تۋريستىك باعىتتاردى قالىپتاستىرۋ كەزىندە ەرجان ەركىنباەۆ كوتەرگەن بولاتىن. ارادا ءبىر جىل وتكەننەن كەيىن قولداۋ تاۋىپ, كوپشىلىك بىلەك بىرىكتىرە كىرىسكەن سوڭ كوگىلدىر نۇرعا بولەنگەن بۋرابايدىڭ باۋرايىن كوپ-كورىم جاقسارىپ قالدى.
ءسوز اراسىندا مامىر ايىنىڭ باسىندا ەرىكتىلەر ىلە الاتاۋىنداعى ۇلتتىق پاركتىڭ جارتاستارىن تازارتقانىن ايتا كەتەيىك. ەل ىشىندە وسىنداي ىلكىمدى ءىس قولعا الىنىپ, ونى جالپى جۇرت قۋاتتاپ جاتسا, ءتول تابيعاتىمىزدى كوزدىڭ قاراشىعىنداي ساقتاۋ كەرەك دەيتۇعىن اتالى ءسوزدىڭ استارىنداعى مازمۇن جاس تولقىننىڭ جادىنا شىمشىمداپ ءسىڭىپ, جاتتالىپ قالار ەدى-اۋ.
