ونەر • 23 مامىر، 2021

ەلوردادا بالالار ەكو-تەاترى اشىلدى

195 رەت كورسەتىلدى

تابيعات تازالىعىنا ءتۇرلى جولمەن كوڭىل بولۋگە بولادى. سونداي ەرەكشە جوبانى EcoQolday ەكولوگيالىق تەاترى قولعا الىپ وتىر. ونەر ۇجىمى تەك بالالاردان قۇرالعان. ول جەردە شىعارماشىلىق ۇجىم تۇرمىستىق قالدىقتاردى ءبولىپ تاستاۋ، قورشاعان ورتانى قورعاۋ تاقىرىپتارىنا قاتىستى قويىلىمدار ازىرلەيدى.

تەاتر شىمىلدىعى «گرينەيكتەر حيكاياسى» سپەكتاكلى­مەن اشىلدى. اتالعان پەسا ەكولوگيالىق تاقىرىپتى نەگىز ەتكەن ەرتەگىنىڭ جەلىسىمەن جازىلعان. سپەكتاكلدى ورىس دراما تەاترىنىڭ كاسىبي قويۋشى-رەجيسسەرلەرى دايىنداپتى. وسى ايدا تەاتر ءوز كورەرمەندەرىنە تاعى ەكى سپەكتاكل ۇسىنۋعا نيەتتى.

سپەكتاكل كورۋگە نەمەسە اكتەرلىك شەبەرلىك كۋرستارىنا قاتىسۋدىڭ جولى دا قىزىق. ول ءۇشىن ماكۋلاتۋرا، پلاستيك جانە شىنى دەگەن سەكىلدى قايتالاما شيكىزاتتى قايتا وڭدەۋگە تاپسىرۋ قاجەت. سونداي-اق ينكليۋزيۆتى ءبىلىم بەرۋدى دامىتۋ ماقساتىندا تەاتر قابىرعاسىندا «ەكو-شەبەرحانا» الەۋمەتتىك جوباسى اشىلعان. ول جەردە دە تۇرمىستىق قالدىقتاردى بولەك سۇرىپتاۋ بويىنشا ساباقتار وتكىزىلىپ، ەسكى تۇرمىستىق ەلەكتر تەحنيكاسىن بول­شەكتەپ، ونى قايتا وڭدەۋگە جىبەرۋ جولدارى ۇيرەتىلەدى.

ەكو-تەاتر بازاسىندا ويىن ايماعى دا بار. مۇندا بالالارعا ەكولوگيالىق مادەنيەت نەگىزدەرى، قايتا وڭدەلەتىن قالدىقتاردى ۇيدە سۇرىپتاۋ، سونداي-اق قورشاعان ورتا ءۇشىن بولەك جيناۋدىڭ ارتىقشىلىقتارى تۇسىندىرىلەدى. مۇنىڭ بارلىعى وقۋشىعا قىزىقتى ءارى ۇعىنىقتى بولۋ ءۇشىن ويىن تۇرىندە وتكىزىلەدى. سونىمەن قاتار ەلوردا وقۋشىلارىنىڭ يننوۆاتسيالىق ەكولوگيالىق جوبالارى دا نازاردان تىس قالمايدى.

– «كەز كەلگەن قوقىسقا ەكىنشى ۇران سىيلا» دەگەن ۇستانىمدى نەگىز ەتىپ تەاتردى اشىپ وتىرمىز. تەاتر جۇمىسى ينتەراكتيۆتى تۇردە وتەدى. كەلگەن كورەرمەندەر سپەكتاكلدى تاماشالاپ قانا قويماي، ءتۇرلى شەبەرلىك سىنىپتارىنا قاتىسا الادى. تەاتردىڭ باستى ماقساتى – ومىرگە ەندى ارالاسىپ، بەيىمدەلىپ كەلە جاتقان جاسوسپىرىمدەردىڭ ەكولوگيالىق تۇسىنىگىن كەڭەيتۋ، ەكو-ساۋاتتىلىعىن ارتتىرۋ. ەكو-تەاتر وسىنداي ۇلكەن ماقساتتى يگەرە الادى دەگەن ويدامىز. شىنى كەرەك، قوعامدا قوقىستى كوشەگە تاستاي سالۋ، جانۋارلارعا دورەكىلىك كورسەتۋ سياقتى ارەكەتتەر بەلەڭ الىپ تۇر. نۇر-سۇلتان قالاسىنىڭ وزىندە سارى جانە جاسىل كونتەينەرلەر بار. الايدا كوپشىلىك تۇرعىن ولاردىڭ ايىرماشىلىقتارىن بىلە بەرمەيدى. مىنە، وسىنداي قوردالانعان ماسەلەلەردى كوركەمدەپ، وڭدەپ بالالاردىڭ اۋزىمەن، ولاردىڭ ءىس-قيمىلىمەن كورەرمەنگە جەتكىزسەك دەگەن نيەتىمىز بار، – دەيدى «جاسۇلان» بىرىڭعاي بالالار مەن جاسوسپىرىمدەر ۇيىمىنىڭ ءتورايىمى دينارا سادۋاقاسوۆا.

ەلىمىزدە العاش رەت ەڭسە كوتەرىپ وتىرعان EcoQolday جوباسى وكم وپەراتورىنىڭ باستاماسىمەن، نۇر-سۇلتان قالاسى اكىمدىگى، «ادال نيەت» قورى، Clean City NC كومپانياسى جانە «جاس ۇلان» رقب قولداۋىمەن جۇزەگە اسىرىلۋدا. تۇساۋكەسەر سپەكتاكلدە №83 مەكتەپ وقۋشىلارى ويناپ شىقتى. الداعى ۋاقىتتا تەاتر جۇمىسىنا شاھارداعى وزگە ءبىلىم وردالارىنىڭ وقۋشىلارى دا اتسالىسپاق.

سوڭعى جاڭالىقتار

تاعى 1650 قازاقستاندىق ىندەت جۇقتىردى

كوروناۆيرۋس • بۇگىن، 09:00

ۇقساس جاڭالىقتار