بۇل تۋرالى وبلىستىق دەنساۋلىق ساقتاۋ باسقارماسىنىڭ ءباسپاسوز حاتشىسى ءلايلىم اۋباكىروۆا مالىمدەدى. كوروناۆيرۋسقا قارسى ەكپەنىڭ ەكىنشى كومپونەنتىن سالدىرۋعا كەلگەن ازاماتقا دارىگەر ۆاكتسينا پاسپورتىنا قاتىستى ءتۇسىندىرۋ جۇمىستارىن جۇرگىزگەن. الايدا, ماماننىڭ ايتقانىن ورىنداعىسى كەلمەگەن پاتسيەنت قابىلداۋ بولمەسىندە شۋ شىعارىپ, دارىگەرگە جۇدىرىق الا جۇگىرگەن.
«21 مامىردا ەسكەلدى اۋداندىق ورتالىق اۋرۋحاناسىنىڭ ەمحاناسىندا قابىلداۋ جۇرگىزگەن دارىگەرگە شابۋىل جاسالدى. ۆاكتسينا سالدىرۋعا كەلگەن پاتسيەنتكە ۆاكتسينا پاسپورتىنا قاتىستى ءتۇسىندىرۋ جۇمىستارىن جۇرگىزۋ بارىسىندا پاتسيەنت دارىگەرگە دورەكىلىك تانىتقان. دارىگەر مەديتسينالىق ۇيىمدا پاتسيەنتكە ءوزىن دۇرىس ۇستاۋدى ەسكەرتكەن. الايدا, ول ەسكەرتۋگە قاراماستان دارىگەرگە شابۋىل جاساپ, باسىنان ۇرىپ, تۇنشىقتىرا باستاعان. دارىگەردىڭ بەتى پەن مويىن تۇسىنان بىرنەشە رەت ۇرعان. بۇل وقيعاعا قاتىستى دارىگەر ەسكەلدى اۋداندىق ىشكى ىستەر بولىمىنە ارىز جازدى», دەلىنگەن حابارلامادا.
باسقارمانىڭ حابارلاۋىنشا, قازىر دارىگەر باس ميىنىڭ شايقالۋى دياگنوزىمەن امبۋلاتوريالىق ەم قابىلداۋدا.
