«وسى جىلدىڭ اقپان ايىنان باستاپ قازاقستان رەسەيلىك «سپۋتنيك V» پرەپاراتىمەن حالىقتى بەلسەندى تۇردە ۆاكتسيناتسيالاۋدا. رەسەيدىڭ كومەگى ارقاسىندا بۇل پرەپاراتتىڭ ءوندىرىسى ءبىزدىڭ ەلدە دە جولعا قويىلدى. بۇل تابىستى عىلىمي جانە وندىرىستىك ىنتىماقتاستىقتىڭ جارقىن مىسالى. مۇنداي تاجىريبەنى باسقا سالالاردا ەنگىزۋ جانە كەڭەيتۋ ابدەن مۇمكىن», دەدى قاسىم-جومارت توقاەۆ جوعارى ەۋرازيالىق ەكونوميكالىق كەڭەستىڭ وتىرىسىندا سويلەگەن سوزىندە.
سونداي-اق مەملەكەت باسشىسى وتاندىق QazVac ۆاكتسيناسىنىڭ ءوندىرىلىپ جاتقانىن العا تارتتى.
«وسىلايشا, قازاقستان ءوزىنىڭ ۆاكتسيناسى بار ون ەلدىڭ قاتارىنا ەندى. كلينيكالىق زەرتتەۋلەر ونىڭ تيىمدىلىگى مەن قاۋىپسىزدىگىن دالەلدەدى. سونىمەن قاتار بارلىق بولجامدارعا سايكەس, كوۆيد اۋرۋى ماۋسىمدىق سيپاتقا يە بولادى. ۆيرۋسپەن كۇرەستە جەتىستىككە جەتۋدىڭ كىلتى – حالىقتى يممۋنداۋ ەكەنى انىق. ءبىز وسى سالاداعى ىنتىماقتاستىق پەن ءوزارا ارەكەتتەسۋدى جالعاستىرۋ وتە ماڭىزدى دەپ سانايمىز», دەدى قازاقستان پرەزيدەنتى.
