الەم • 20 مامىر، 2021

اماندا گورمان اقش-تىڭ كەلەشەك پرەزيدەنتى مە؟

62 رەت كورسەتىلدى

كوپشىلىككە شىعارماشىلىعى ارقىلى تانىلىپ، كەيىنگى عۇمىرىن ساياسي قايراتكەرلىككە ۇلاستىرعان ايگىلى ادامدار از ەمەس. قوس تىزگىندى قاتار ۇستاپ، اقىندىعىن دا (جازۋشىلىعىن دا)، قايراتكەرلىگىن دە بيىك دەڭگەيدەن تۇسىرمەي وتكەندەر بار. ءومىرىنىڭ سوڭىنا دەيىن مانسابىنان ءبىر ەلى اجىراماعان ايگىلى اقىن گەتەنىڭ ءومىرى دە – بۇعان جارقىن مىسال. ءبىزدىڭ تاريحتا دا مۇنداي مىسالعا وزەك بولارلىق ازاماتتار كوپ-اق. وسىنشاما، كوپ سوزعانداعى ايتپاعىمىز اماندا جايىندا ەدى. وسى كۇنگە دەيىن امەريكاداعى ەلەۋسىز كوپ جاس اقىننىڭ ءبىرى عانا بولعان، بىراق پرەزيدەنت دجو بايدەننىڭ ۇلىقتاۋ راسىمىنەن سوڭ اتاعى التى قۇرلىقتى كەزىپ جۇرە بەرگەن 23 جاستاعى اماندا جايىندا.

اماندا – اقىن قىز. كىش­كەنتايىنان ولەڭ-جىرعا قۇمار بولىپتى. بەس-التى جاسىنان باس­تاپ قولىنا قالام العان. باس­قالاردان ايىرماشىلىعى، بالكىم ارتىقشىلىعى – ەل تاع­دىرى، مەملەكەت كەلەشەگى جاس جۇ­رەكتى كوبىرەك تولعاندىرىپتى. العاشقى جىر جيناعى 2015 جىلى The One for Whom Food Is Not Enough دەگەن اتاۋمەن جارىق كورگەن. ىلە-شالا Change Sings يلليۋستراتسيالىق كىتابىن شىعارعان. ارينە، مۇنىڭ ءبارى اماندانىڭ اقىندىق جولىنىڭ ورىستەۋىنە العىشارت بولعانى تۇسىنىكتى. ال دجو بايدەندى ۇلىق­تاۋ راسىمىنە قاتىسىپ، The Hill We Climb ء(بىز باعىندىراتىن بەلەس) ولەڭىن وقۋى ونىڭ شى­عارماشىلىق قانا ەمەس، ازا­مات­تىق، ساياسي عۇمىرداعى ءترامپلينى بول­دى. وسى جۇلدىزدى ساتتەن كەيىن ميشەل وباماعا (باراك وبا­مانىڭ جۇبايى) بەرگەن سۇح­باتىندا يناۋگۋراتسياعا تۇندەر بويى اينا الدىندا تاپجىلماي وتىرىپ دايىندالعانىن، ۇلكەن تولقۋدى باستان وتكەرگەنىن ايتىپتى.

اتاعىن شارتاراپقا جاي­عان The Hill We Climb ء(بىز باعىن­دىراتىن بەلەس) ولەڭىن 6 قاڭتار كۇنى، پرەزيدەنت سايلاۋىندا جەڭىلىس تاپقان دونالد ترامپ جاقتاستارىنىڭ كاپيتولي عيما­راتىنا شابۋىلى كەزىندە جازعان. ادۋىندى، رۋحتى جىردا ەلدى ەش­كىممەن بولىسپەۋ ءۇشىن ونى قۇر­تىپ جىبەرۋگە دايىن كۇشتەر جايىن­دا ايتىلادى. وندا اقىن امە­ريكا قازىر باستان كەشىپ جاتقان تاع­دىرلى ءساتتى بارىنشا ءدال بە­رۋگە بارىن سالعان. وسى كەزدەن باستاپ قۇراما شتاتتاردىڭ جاڭا تاريحى باستالدى، ەندى تەك كەلەشەككە قاراۋىمىز كەرەك دەپ وي تاستايدى.

وسى ولەڭ كۇللى حالىق الدىن­دا وقىلعان سوڭ-اق اماندا گور­ماننىڭ تۆيتتەردەگى جازىلۋشى­لار سانى 100 مىڭنان 1 ملن ادام­عا، ال ينستاگرامداعى وقىر­ماندارى 206 مىڭنان 2 ملن ادام­عا كوبەيىپ شىعا كەلگەن.

«پوەزيا مەن ءتىل وزگەرىس ءۇشىن بولعان قوزعالىستاردىڭ ناق ورتاسىنان ءجيى تابىلادى. بۇل پوە­زيا – ناسىلدىك تەڭدىك تۋرالى ايتۋعا جارالعان قۋاتتى پوەزيا» دەگەن اماندا ناسىلشىلدىككە، تەڭسىزدىككە قارسى تۇرا الاتىن ايبارلى بۋىننىڭ ءوسىپ كەلە جاتقانىن، ولاردىڭ امەريكانى، ءوز وتانىن قورعاۋعا، ادىلدىك تۋىن تىگۋگە لايىقتى ۇرپاق ەكەنىن ايتادى. ارينە، سول ۇلى شەرۋدىڭ كوش باسىندا ءوزى تۇرارىن دا اڭعارتپاي قويمايدى.

«ماعان يۋسەف كومۋنياكاا، سونيا سانچەس، ترەيسي سميت، فيل­ليس ۋيتلي سياقتى اقىندار شى­عارماشىلىعى ۇنايدى. فرە­دەريك دۋگلاس، ۋينستون چەرچيلل، اۆراام لينكولندى دە كوپ وقىدىم. كومپوزيتورلار تۋىندىلارىن دا ءجيى تىڭدايمىن. ولار – كەرەمەت اڭگىمەلەۋشىلەر. بىراق ءسوز قولدانبايدى. سول بوس كەڭىستىكتى ءوزىم تولتىرعىم كەلەدى. امەريكالىقتاردىڭ مەنى تانۋىنا مۇمكىندىك بەرگىم كەلەدى. بۇعان ءسىزدىڭ: «مەن ءار تاڭ سايىن قۇلدار سالعان ۇيدە ويانامىن» دەگەن ءسوزىڭىز قاتتى اسەر ەتتى. پوەزيا، بۇل – تاريح قاتپارلارىنا كوز جىبەرىپ قارايتىن ءدۇربى سەكىلدى. وسىدان ءۇش جىل بۇرىن عانا گورمان دەگەن ءوز تەگىمدى ايتا المايتىن ەدىم. سوزدەردى دۇرىس ايتا المايتىن قيىندىققا دۋشار بولىپ تۋدىم. ءۇش جىل بۇرىن بۇل نارسەگە السىزدىك دەپ قاراۋشى ەدىم. بىراق وسىنىڭ ارقاسىندا مەن سويلەمەي-اق ءوز ويىمدى جەت­كىزەتىن باسقا ءبىر ءتاسىل ىزدەدىم. ءسويتىپ شىعارماشىلىققا كەل­دىم» دەيدى اماندا ميشەل وبا­ماعا بەرگەن سۇحباتىندا.

اماندا اقىن عانا ەمەس، كۇ­رەسكەر. ءتۇرلى فورۋم مەن جيىنداردا ناسىلشىلدىك، پوليتسيانىڭ قاتىگەزدىگى، قوعامداعى ادىلەت­سىز­دىك تۋرالى ايتىپ كەلەدى. تۇسىك تاستاۋعا تىيىم سالۋ، ميگرانت بالالارعا ارنالعان تۇرمە ماسە­لەلەرىنە دە ءجيى نازار اۋدارادى. جاس اقىننىڭ پوەزياسى مەن شىندىق ىزدەپ شىرىلداعان بولمىسىنا ءتانتى بولعان ميشەل وباما «اماندا وسىنداي وتكىر ءارى شىندىققا تولى سوزدەرىمەن ءبىزدىڭ ارقايسىمىزدىڭ دەموكراتيانى قورعاي الاتىنىمىزدى ۇعىندىرىپ بەردى» دەيدى. ونىڭ بۇل سوزىندە دە ۇلكەن وي بۇعىپ جاتقانىن باعامداۋ قيىن ەمەس. دەموكراتيا، ول – تەڭ قۇقىق، مە­يىرىمدىلىك، ادىلدىك، ەشكىمدى جات­سىنباۋ، ابايشا ايتقاندا «باۋىرىم دەپ ادامزاتتىڭ ءبارىن ءسۇيۋ!».     

اماندا گورماننىڭ پوەزيا جولى وسىدان التى جىل بۇرىن باستالعان. حالىق ەندى عانا وعان نازارىن اۋداردى دەۋگە بولاتىن سياقتى. ال اماندانىڭ جوعارىداعى سوزدەرىنەن ونىڭ ءوز پوەزياسى ارقىلى ەلدىڭ تاعدىرى مەن كەلەشەگىن جىرلاۋعا، نا­سىلشىلدىك دەرتىمەن كۇرەسكە، ءار ازا­ماتتىڭ تەڭ قۇقىلى، ەركىن پىكىرلى بولىپ قالىپتاسۋى جو­لىنداعى مايدانعا كىرىسكەنىن انىق بايقايمىز. اقىن قىز 2036 جىلى اقش پرەزيدەنتىنىڭ سايلاۋىنا تۇسكىسى كەلەتىنىن دە جاسىرماعان. ايگىلى ساياساتكەر حيللاري كلينتون سول سايلاۋدا اماندانى قولدايتىنىن دا مالىمدەپ ۇلگەرىپتى. قازىردىڭ وزىندە-اق اقش تاريحىنىڭ جاڭا ءداۋىرى باستالىپ كەتكەن سەكىلدى. بالكىم، بۇل ادامزات تاريحىنداعى جاڭا بەتبۇرىستىڭ باستاۋى شىعار. كىم بىلەدى... ويتكەنى ولەڭ­مەن، ونەرمەن شىندىق، ادىل­دىك بيىگىنە ۇمتىلۋ كىم-كىمدى دە بەيجاي قالدىرمايدى...

 

سوڭعى جاڭالىقتار

دوللار ارزاندادى

قارجى • بۇگىن، 15:58

ۇقساس جاڭالىقتار