26 ماۋسىمدا اقش-تىڭ لاس-ۆەگاس قالاسىندا وتەتىن جارىستا قانداسىمىز جەرگىلىكتى بوكسشى روب برانتپەن جۇدىرىقتاسادى. 30 جاستاعى تەحاس شتاتانىڭ تۋماسى 2012 جىلدان بەرى كاسىپقوي رينگتە ونەر كورسەتۋدە. سول ارالىقتا 27 كەزدەسۋ وتكىزىپ, 25 رەت جەڭىسكە جەتتى. 17 قارسىلاسىن نوكاۋتقا جىبەردى. 2018 جىلدىڭ 20 قازانىندا ول ءوز وتانىندا وتكەن بوكس كەشىندە جاپونيانىڭ جۇلدىزى ريوتا مۋراتانى ۇپاي سانىمەن ۇتىپ, WBA نۇسقاسى بويىنشا چەمپيوندىق اتاقتى يەلەندى. 2019 جىلدىڭ 12 اقپانىندا رەسەيلىك حاسان بايسانگۋروۆتان باسىم تۇسسە, سول جىلدىڭ 12 شىلدەسىندە مۋراتامەن قايتا كەزدەستى. بۇل باسەكەدە جەڭىلىستىڭ كەرمەك ءدامىن تاتقان برانت التىن بەلبەۋدەن ايىرىلدى.
اۋەسقويلار اراسىندا الەم جانە قۇرلىق چەمپيونى, ازيا ويىندارىنىڭ جەڭىمپازى دەگەن اتاعى بار جانىبەك ءالىمحان ۇلى كاسىپقوي بوكستى سەرىك ەتكەلى بەس جىلعا جۋىقتاپ قالدى. سول كەزدەن بەرى توعىز رەت رينگكە كوتەرىلگەن قازاق جىگىتى بارلىق جەكپە-جەكتى ءوز پايداسىنا شەشتى. بەس قارسىلاسىن ەسىنەن تاندىردى.
ال 26 ماۋسىمدا لاس-ۆەگاستا وتەتىن بوكس كەشىنىڭ باستى باسەكەسىندە ۋكراينالىق ۆاسيلي لوماچەنكو (14-2, 10 كو) مەن جاپونيالىق ماساەشي ناكاتاني (19-1, 13 كو) قولعاپ تۇيىستىرەدى.
