«Şərəf» (ابىروي) وردەنى 2007 جىلى قۇرىلدى. وردەن ازەربايجان رەسپۋبليكاسىنا ايرىقشا ەڭبەك سىڭىرگەن تۇلعاعا ەكونوميكا, عىلىمي-تەحنيكالىق دامۋعا, قوعامدىق-مادەني پروگرەسكە قوسقان ۇلەسى ءۇشىن, عىلىم, مادەنيەت, ادەبيەت, ونەر, اعارتۋ جانە دەنساۋلىق ساقتاۋ سالاسىندا ەرەن ەڭبەگى ءۇشىن بەرىلەدى. وردەن التىن مەن پلاتينادان جاسالعان سەگىز قىرلى جۇلدىزدان تۇرادى.
ىشىندە ەكى دوڭگەلەك بار سىرتقىسى التىن, ىشىندەگىسى پلاتينادان جاسالعان. اتالعان ماراپات شەتەلدىكتەردەن - تۇركيا پرەزيدەنتى سۇلەيمان دەميرەلگە, رەسەي پاتريارحى كيريللگە, ەۋروپا وليمپيادا كوميتەتتەرىنىڭ پرەزيدەنتى پاتريك حيككيگە, رەسەي وپەرا ءانشىسى تامارا سينياۆسكاياعا, تاسس اگەنتتىگى باس ديرەكتورىنىڭ ءبىرىنشى ورىنباسارى ميحايل گۋسمانعا بەرىلگەن.
ەسكە سالا كەتسەك, 18 مامىردا اقىن, جازۋشى, مەملەكەت جانە قوعام قايراتكەرى, تۇركولوگ, «سەمەي-نەۆادا» قوزعالىسىنىڭ كوشباسشىسى قازاقستاننىڭ حالىق جازۋشىسى ولجاس سۇلەيمەنوۆ 85-كە تولدى.
ولجاس سۇلەيمەنوۆ – XX-XXI عاسىرلارداعى اسا كورنەكتى اقىن, بۇكىل الەمگە ءوزىنىڭ پوەزياسىمەن عانا ەمەس, قوعامدىق-سايامي قىزمەتىمەن دە تانىمال تۇلعا. ولجاس ومار ۇلى ءار جىلدارى جازۋشىلار وداعىن باسقارىپ, قازاق كسر كينەماتوگرافيا جونىندەگى مەملەكەتتىك كوميتەتىنىڭ توراعاسى, كوپ جىل بويى قازكسر جوعارعى كەڭەسىنىڭ دەپۋتاتى بولدى. 1995-2001 جىلدارى ارالىعىندا قر-نىڭ يتاليا, گرەتسيا, مالتاداعى توتەنشە جانە وكىلەتتى ەلشىسى, 2001-2014 جىلدارى – قازاقستاننىڭ يۋنەسكو- داعى تۇراقتى وكىلى بولدى.
ولجاس سۇلەيمەنوۆتىڭ مەرەيتويى قارساڭىندا الماتىدا «تانىپ – ءبىلىپ ءوزىمىزدى وزگەدەن, ءبىز كوشەمىز وزىمىزگە بەت الىپ: ولجاس جانە مادەنيەتتەردى جاقىنداستىرۋ» اتتى حالىقارالىق عىلىمي كونفەرەنتسيا ءوتتى. ولجاس سۇلەيمەنوۆتىڭ ولەڭدەرى مەن پوەمالارى اعىلشىن, فرانتسۋز, نەمىس, يسپان, چەح, پولياك, سلوۆاك, بولگار, ماجار, موڭعول, قىرعىز, تۇرىك جانە باسقا دا تىلدەرگە اۋدارىلعان.
