«بيىل قاراعاندى وبلىسىنىڭ اۋماعىندا ەسىرتكى قىلمىستارىنىڭ سانى 175-تەن 208-گە دەيىن ءوستى. الەۋمەتتىك جەلىلەر مەن قولما-قول اقشاسىز تولەم جۇيەلەرىنىڭ قارقىندى دامۋى ادامدارعا جابىرلەنۋشىلەرمەن ومىردە بايلانىسپاي-اق ءتۇرلى قىلمىس جاساۋعا مۇمكىندىك بەرەتىنىن تالداۋ كورسەتىپ وتىر. ماسەلەن, بيىل Telegram مەسسەندجەرىن پايدالانىپ, قالا بويىنشا ەسىرتكى قويۋمەن اينالىسقان قاراعاندى تۇرعىنى 11 جىلعا سوتتالدى», دەپ حابارلادى قاراعاندى وبلىسى پروكۋراتۋراسىنىڭ ءباسپاسوز قىزمەتىندەگىلەر.
ۆەدومستۆو وكىلى ەسىرتكى تاراتۋدىڭ بۇل جولى كەڭىنەن تانىمال ەكەنىن ايتتى. بيىل ناۋرىزدا وبلىستىڭ باسقا ءبىر تۇرعىنىنا قاتىستى تاعى ءبىر ۇقساس ءىس سوتقا جولدانعان ەكەن. ول «الفا – PVP» ەسىرتكىسىن Telegram ارقىلى ساتتى دەگەن كۇدىككە ىلىنگەن. بۇل ءۇشىن ول مۇلكى تاركىلەنىپ, 10 جىلدان 15 جىلعا دەيىن باس بوستاندىعىنان ايىرىلۋى مۇمكىن.
«وسى ساناتتاعى قىلمىستاردىڭ نەگىزگى بولىگىنە (133 نەمەسە 64 پايىزى) ەسىرتكىنى ساتۋ ەمەس, ولاردى مەديتسينالىق ەمەس تۇتىنۋ, ءوندىرۋ, وڭدەۋ, ساتىپ الۋ, ساقتاۋ جانە ساتۋ ماقساتىنسىز تاسىمالداۋ جاتادى», دەپ تولىقتىردى پروكۋراتۋرا وكىلى.
