سپورت • 18 مامىر، 2021

جاستارىمىزدان تولايىم تابىس كۇتەمىز

42 رەت كورسەتىلدى

بۇل كۇندەرى اۋىر اتلەتيكادان قازاقستاننىڭ جاستار قۇراماسى الماتى وبلىسىنىڭ تالعار اۋدانىندا ورنالاسقان دۇنيەجۇزىلىك بوكس اكادەمياسىندا وقۋ-جاتتىعۋ جيىنىن وتكىزۋدە. جيىن اياقتالعان بەتتە جەرلەستەرىمىز تاشكەنتكە ات- تانادى. وزبەكستاننىڭ باس شاھارىندا 21-29 مامىر كۇندەرى الەم بىرىنشىلىگىنىڭ جالاۋى جەلبىرەيدى. ايتۋلى جارىستا جەتى ورەنىمىز باق سىنايدى.

تاشكەنتتە ەرلەر سايىسىندا ابىلاي اۋەلحانوۆ (55 كيلو)، الەكسەي دروزدوۆ (61 كيلو)، اقمولدا سايرامكەز (67 كيلو)، سايحان تايسۋەۆ (73 كيلو) جانە راحات بەكبولات (102 كيلو) كۇش سىناسسا، ايەلدەر اراسىندا گۇلنۇر ىبىراي (64 كيلو) مەن ايسامال سانسىزباەۆا (+87 كيلو) ونەر كورسەتەدى. بۇل سپورتشىلاردىڭ دەنى جاسوسپىرىمدەر مەن جاس­تار بۋىنى اراسىنداعى جارىس­تاردا ولجاعا كەنەلىپ جۇرگەنىن جانكۇيەرلەر جاقسى بىلەدى. ماسەلەن، ابىلاي بىلتىر پەرۋ­دىڭ استاناسى – ليمادا ۇيىم­داستىرىلعان الەم كۋبوگىندا توپ جارسا، بيىل ەرەسەكتەردىڭ ەل بىرىنشىلىگىندە باس جۇلدەنى ولجالادى. سوڭعى باسەكەدە ول الەم چەمپيوناتىنىڭ ەكى دۇركىن كۇمىس جۇلدەگەرى، ازيا چەمپيونى، دۇنيەجۇزىلىك ۋنيۆەرسيادانىڭ قولا جۇلدەگەرى ارلي چونتەيدىڭ ءوزىن شاڭ قاپتىرىپ كەتتى. بۇل جارىستىڭ ەكەۋى دە ونلاين فورماتتا وتكەنىن ەستەرىڭىزگە سالا كەتەيىك.

بىلتىر پەرۋدە راحات الەم كۋبوگىنىڭ يەگەرى اتانىپ قانا قويماي، الەمدىك رەكوردتى دا جاڭارتتى. 2019 جىلى ول جاسوسپىرىمدەردىڭ الەم جانە ازيا بىرىنشىلىكتەرىندە التىن تۇعىرعا كوتەرىلدى. سول جارىستاردىڭ بىرىندە سوعان دەيىن يليا يلين كورسەتكەن ناتيجەدەن اسىپ تۇسكەن قازاقتىڭ نار تۇلعالى ۇلى كوپشىلىكتىڭ قوشەمەتىنە بولەنگەنى دە ەسىمىزدە. ۇستىمىزدەگى جىلدىڭ ءساۋىر ايىندا تاشكەنتتە وتكەن ەرەسەكتەردىڭ ازيا چەمپيوناتىندا دا راحات الدىنا جان سالمادى. سول سەكىلدى ءتۇرلى بايراقتى باسەكەلەردە الەكسەي، اقمولدا، سايحان جانە گۇلنۇر مەن ايسامال سىندى ۇل-قىزدارىمىزدىڭ دا قول جەتكىزگەن تابىستارى قوماقتى.

– مەن ۇلتتىق قۇرامانىڭ باس باپكەرى رەتىندە جاستاردىڭ دا ءار قادامىن ءجىتى قاداعالاپ وتىرامىن. ويتكەنى كەلەشەكتە سول سايىپقىراندار قازىرگى مىقتىلاردىڭ ورنىن باسادى. سول سەبەپتى دە ءار كەز ولاردىڭ قارىم-قابىلەتىن بايقاپ، شاما-شارقىن شامالاپ وتىرۋىم قاجەت. ءبىر ايتا كەتەرلىگى، قازىردىڭ وزىندە كەيبىر جالىندى جاستار ساقا سپورتشىلاردى سان سوقتىرىپ ءجۇر. ماسەلەن، تاشكەنتكە اتتانعالى وتىرعان ۇل-قىزدارىمىزدىڭ ءبىرازى ساۋىردە وتكەن ەل چەمپيو­ناتىندا مىقتىلاردى جولدارىنان ىعىستىرىپ، باس جۇلدەنى ەنشىلەدى. سونداي ساتتەردىڭ كۋاسى بولعانىمىزدا كوڭىلىمىز مارقايىپ قالدى.  ءبىزدى كەڭ-بايتاق رەسپۋبليكامىزدىڭ ءار قيىرىندا دارىندى زىلتەمىرشىلەردىڭ قالىڭ شوعىرى ءوسىپ كەلە جاتقانى قۋانتتى. بۇيىرتسا، شەبەرلىكتەرى شىڭدالا كەلە، وسى ورەندەرىمىز ەرەسەكتەر اراسىنداعى الەمدىك دەڭگەيدەگى دودالاردا دا دارالاناتىنىنا ەش كۇمانىم جوق، – دەيدى بۇل كۇندەرى قازاقستاننىڭ ۇلتتىق قۇراماسىنىڭ تىزگىنىن ۇستاپ وتىرعان كەزىندەگى تانىمال اۋىر اتلەت باقىت احمەتوۆ. 

جاستار اراسىنداعى الەم بىرىنشىلىگىنە قازاقستان قۇراماسى ۇزبەي قاتىسىپ كەلەدى. ءبىر ايتا كەتەرلىگى، ءبىزدىڭ كوماندا ءار كەز سانعا ەمەس، ساپاعا جۇگىنۋدە جانە دە بۇل تاكتيكا ءوز جەمىسىن بەرىپ كەلەدى. وعان دالەل، الەمنىڭ ءار قيىرىندا وتەتىن جارىستارعا قازاق ەلىنەن ساناۋلى عانا زىلتەمىرشىلەر اتتانعانىنا قاراماستان، سولاردىڭ دەنى جەڭىس تۇعىرىنا كوتەرىلىپ ءجۇر. ناتيجەسىندە، جالپىكوماندالىق ەسەپتە جەرلەستەرىمىز ۇنەمى ۇزدىكتەر قاتارىنان تۇسكەن ەمەس. ماسەلەن، 2019 جىلى فيدجي ارالىندا بەس سپورتشىمىز ونەر كورسەتىپ، سولاردىڭ ۇشەۋى ولجاعا كەنەلدى. كارينا قۇزعانباەۆا (81 كيلو) مەن داريا احمەروۆا (87 كيلو) التىننان القا تاقسا، ارتەم انتروپوۆ (97 كيلو) كۇمىس مەدالدى موينىنا ءىلدى. تارقاتىپ ايتساق، قۇزعانباەۆا ءوزىنىڭ باستى قارسىلاسى، وڭتۇستىك كورەيانىڭ وكىلى جانگ حيەنجۋدان ءۇش كيلو وزسا، احمەروۆا رەسەيلىك داريا ريازانوۆادان توعىز كيلو ارتىق سالماقتى ەڭسەردى. سول سەكىلدى ەۆگەني لومانوۆ (81 كيلو) پەن نۇرعيسا ادىلەت ۇلىنىڭ دا (89 كيلو) ونەرى جاقسى اسەر قالدىردى. ولار جەڭىس تۇعىرىنا كوتەرىلە الماسا دا، ۇزدىك بەستىكتىڭ قاتارىنان كورىندى.  

فيدجيدەگى الەم بىرىنشىلىگىنىڭ جالپىكوماندالىق ەسەبىندە قىتاي قۇراماسى كوش باستادى. اسپاناستى ەلىنىڭ وكىلدەرى باس جۇلدەنىڭ تورتەۋىن ولجالادى. قازاقستاننىڭ ورەندەرى ەكىنشى ورىندى يەلەندى. ءبىزدىڭ زىلتەمىرشىلەردىڭ قورجىنى 2 التىن جانە 1 كۇمىس مەدالمەن تولىقتى. ءۇشىنشى ساتىعا اقش-تىڭ سپورتشىلارى تابان تىرەدى. امەريكالىقتار 2 التىن مەن 2 قولا جۇلدەنى يەمدەندى. سونداي-اق قوس التىننان ەنشىلەگەن مىسىر مەن وزبەكستان قۇرامالارى وزىق بەس كوماندانىڭ ساناتىنا قوسىلدى.

سوڭعى جاڭالىقتار

وتانشىلدىق – تاۋەلسىزدىك تىرەگى

رۋحانيات • بۇگىن، 08:16

العىس ارقالاعان جاناشىر جاندار

مەديتسينا • بۇگىن، 08:01

حەم اعاي

ادەبيەت • كەشە

نەسيە كورسەتكىشى ارتتى

ەكونوميكا • كەشە

ۇقساس جاڭالىقتار