قازاقستان • 17 مامىر، 2021

سەناتورلار سايلاۋ تۋرالى زاڭ جوبالارىن قارايدى

6 رەت كورسەتىلدى

سەنات سپيكەرى ماۋلەن اشىمباەۆتىڭ توراعالىعىمەن پالاتا بيۋروسىنىڭ وتىرىسى ءوتتى. وندا دەپۋتاتتار 2021 جىلعى 20 مامىردا وتەتىن سەنات وتىرىسىنىڭ كۇن ءتارتىبىن تالقىلادى.

پالاتا وتىرىسىندا سەناتورلار «قازاقستان رەسپۋبليكاسىنداعى سايلاۋ تۋرالى» قازاقستان رەسپۋبليكاسىنىڭ كونستيتۋتسيالىق زاڭىنا وزگەرىستەر مەن تولىقتىرۋلار ەنگىزۋ تۋرالى» كونستيتۋتسيالىق زاڭنىڭ جوباسىن قارايدى.

بۇل قۇجات مەملەكەت باسشىسىنىڭ تاپسىرماسىن ورىنداۋ ماقساتىمەن ازىرلەنىپ جاتىر. زاڭ جوباسى اۋداندىق ماڭىزى بار قالالاردىڭ، اۋىلداردىڭ، كەنتتەردىڭ جانە اۋىلدىق وكرۋگتەردىڭ اكىمدەرىن تىكەلەي سايلاۋ جۇيەسىن ەنگىزۋدى كوزدەيدى. قۇجاتتاعى جاڭا نورمالار سايلاۋ كەزىندە ساياسي پارتيالاردىڭ ءوتۋ شەگىن دە تومەندەتەدى. زاڭ قابىلدانعاننان كەيىن ساياسي پارتيالارعا دەپۋتاتتىق كورپۋستان ورىن الۋ ءۇشىن سايلاۋشىلاردىڭ 5 پايىز داۋسىن جيناسا جەتكىلىكتى بولادى. ودان بولەك، بارلىق دەڭگەيدەگى سايلاۋ بيۋللەتەندەرىنە «بارىنە قارسىمىن» دەگەن جازۋ قوسىلادى.

سونىمەن قاتار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە سايلاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى دا سەنات وتىرىسىنىڭ كۇن تارتىبىنە شىعارىلدى.

بۇل زاڭ جوباسى نەگىزىنەن جەرگىلىكتى ءوزىن-ءوزى باسقارۋ جۇيەسىن نىعايتۋدى، جەرگىلىكتى حالىقتىڭ ءوز كونستيتۋتسيالىق قۇقىقتارىن پايدالانۋ كەزىندەگى بەلسەندىلىگىن ارتتىرۋدى جانە ساياسي پارتيالاردىڭ ءرولى مەن جاۋاپكەرشىلىگىن كۇشەيتۋدى ماقسات تۇتادى.

الداعى وتىرىستا سەناتورلار «2021-2023 جىلدارعا ارنالعان رەسپۋبليكالىق بيۋدجەت تۋرالى» قازاقستان رەسپۋبليكاسىنىڭ زاڭىنا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن دا قارايدى.

بۇدان باسقا، بيۋرو وتىرىسىندا مەملەكەت باسشىسىنىڭ ەكونوميكالىق جانە ساياسي باستامالارىن زاڭنامالىق تۇرعىدان قامتاماسىز ەتۋ بويىنشا پرەزيدەنت تاپسىرمالارىنىڭ ورىندالۋ بارىسى تۋرالى اقپارات تىڭدالدى.

سونداي-اق، وتىرىس كەزىندە سەناتتىڭ تۇراقتى كوميتەتتەرىنىڭ توراعالارى دەپۋتاتتاردىڭ وڭىرلەرگە جاساعان ساپارلارىنىڭ قورىتىندىلارى تۋرالى باياندادى جانە ماجىلىستەن كەلىپ تۇسكەن زاڭ جوبالارى كوميتەتتەرگە ءبولىنىپ بەرىلدى.

سوڭعى جاڭالىقتار

دوللار قىمباتتادى

قارجى • كەشە

ۇقساس جاڭالىقتار