مۇنداي سالت-ءداستۇرىمىزدى ساقتاۋدا قوشانكول اۋىلىنىڭ تۇرعىندارى وزگەلەرگە ونەگە بولىپ كەلەدى. مۇندا جىلقى ۇستامايتىن وتباسى سيرەك كەزدەسەدى. سونىڭ ءبىر كورىنىسىندەي, اۋدان ورتالىعىنان قوشانكول اۋىلىنا قاراي باراتىن كۇرە جولدىڭ بويىندا تۇياعىمەن جەر تارپىعان سايگ ۇلىكتىڭ قولادان سوعىلعان ەسكەرتكىشى تۇر.
قوشانكول اۋىلىندا جىلقىعا ارنالعان مۋزەي دە بار. مۇندا قاسيەتتى ت ۇلىكتى سيپاتتايتىن سان ءتۇرلى ەكسپوناتتار مەن ات ابزەلدەرى, جىلقىعا قاتىستى مازمۇندى انىقتامالىقتار, تانىمدىق ماتەريالدار قويىلعان. مۋزەيدەگى جەرگىلىكتى ءمۇسىنشى شەبەرلەر سوققان ات ءمۇسىنى دە ەرەكشە كوز تارتادى. قوشانكول اۋىلدىق وكرۋگىنىڭ اكىمى ەرنار ءىلياسوۆ مۋزەيدەن ورىن العان جادىگەرلەردىڭ ءبارى اۋىل ازاماتتارىنىڭ شىن جاناشىرلىق پەيىلدەرىنىڭ ارقاسىندا جيناقتالعانىن ايتىپ بەردى. سونىمەن بىرگە ول اۋىلدا ات سپورتىنا قاتىستى ءىس-شارالار, قىز قۋ, كوكپار تارتۋ, اۋدارىسپاق سەكىلدى ۇلتتىق ويىندار, تاي, قۇنان, دونەن جارىستارىن وتكىزۋ داستۇرگە اينالعانىن جەتكىزدى.
– ەلىمىزدىڭ وزگە وڭىرلەرىندە جىلقىعا ارنالعان مۋزەي بار-جوعىن ءدوپ باسىپ ايتا الماي تۇرمىن. ەگەر بولماسا, وندا ءبىزدىڭ اۋىلداعى رەسپۋبليكاداعى جالعىز مۋزەي بولىپ شىعادى. ەڭ باستىسى, اۋىلىمىزدا جىلقىنىڭ قادىر-قاسيەتىن ۇعىناتىن ۇرپاق ءوسىپ كەلەدى, – دەيدى ول.
اۋىل تۇرعىندارى تەك مال ءوسىرىپ, مال باعىپ قويماي, سونىمەن بىرگە بۇرىن اينالىسىپ كورمەگەن تىڭ كاسىپتەرگە دە بەت بۇرا باستاعان. بۇعان «باستاۋ بيزنەس» باعدارلاماسىنىڭ شاپاعاتى ءتيىپتى. اتالعان جوبا شەڭبەرىندە قوشانكولدىكتەر كولەمى 500 مىڭ تەڭگە كولەمىندە قايتارىمسىز نەسيە الىپ, پايدالى ىسپەن شۇعىلدانا باستاعان. وسى ورايدا تۇرعىندار جاڭا كاسىپتىڭ الىپپەسىن يگەرۋ ءۇشىن «اتامەكەن» كاسىپكەرلىك پالاتاسىنىڭ وڭىرلىك وكىلدىگى جانىنداعى ونكۇندىك ونلاين كۋرستان وتكەن.
جاڭا كاسىپتەردى يگەرۋ, اسىرەسە تۇرمىسى تومەن وتباسىلار ءۇشىن وتە ءتيىمدى ءارى ىڭعايلى بولىپ وتىر ەكەن. شاعىن نەسيەسىن وتەۋ ءۇشىن تۇرعىنداردىڭ ءبىرى شاعىن ناۋبايحانا اشسا, ەكىنشىسى تاۋىق ءوسىرۋدى قولعا العان.
قوشانكول – جىلقىعا عانا ەمەس, قويعا دا باي اۋىل. سوڭعى جىلدارى قويدىڭ ءجۇنىن قايتا جىبەرەرىن بىلمەي, دال بولعاندارى دا از ەمەس. كەيىن تاعى وسى «باستاۋ بيزنەستىڭ» كومەگىمەن قوي ءجۇنىن ءتۇتىپ, وڭدەيتىن شاعىن اپپارات ساتىپ العان.
پرەزيدەنت قاسىم-جومارت توقاەۆ بەلگىلەگەن «حالىق ۇنىنە قۇلاق اساتىن ۇكىمەت» جوباسى نەگىزىنەن ەلەكتروندى فورماتقا نەگىزدەلگەنى ءمالىم. مۇنداي جاڭاشىلدىق پەن قىزمەت كورسەتۋ ءۇردىسى شالعايداعى قوشانكول اۋىلىنا دا جەتكەن. اۋىلداعىلار ەلەكتروندى قىزمەت ارقىلى قاجەتتى انىقتامالاردى ۇيدە وتىرىپ-اق الا الادى.
قوشانكول اۋىلىنىڭ تۇرعىندارى وڭىرگە سۇبەلى ۇلەس قوسقان ازاماتتارىن دا ارداقتاي بىلەدى. ومىردەن وتكەندەرىنە تاعزىم ەتىپ, كوزى تىرىلەرىنە قۇرمەت كورسەتۋدى داستۇرگە اينالدىرعان. وسى ورايدا ولار وتكەن عاسىرداعى جەتپىسىنشى جىلداردىڭ اياعى مەن سەكسەنىنشى جىلداردىڭ باسىندا قوشانكول سوۆحوزنىڭ ديرەكتورى بولعان سالىمگەرەي اسانعاليەۆكە ەسكەرتكىش ءمۇسىن ورناتىپتى.
– كەڭەستىك كەزەڭدەگى «قىزىل ديرەكتوردى» دارىپتەگەنى قالاي دەۋى دە مۇمكىن, بىرەۋلەر. بىراق قوشانكولدىكتەر ءۇشىن سالىمگەرەي اعانىڭ ورنى بولەك. ول كىسى ءشوپ شابۋ, ەگىن ورۋ جانە مال ءوسىرۋ سەكىلدى تاپسىرمانىڭ تاساسىندا قالىپ قويماي, ەڭ ءبىرىنشى كەزەكتە اۋىل تۇرعىندارىنىڭ الەۋمەتتىك-تۇرمىستىق جاعدايىنا ەرەكشە دەن قويعان ازامات. ءوزى باسقارعان كەزدە اۋىلىمىزدى وبلىستاعى ەڭ دامىعان, ەڭ ساۋلەتتى شارۋاشىلىقتىڭ بىرىنە اينالدىرا ءبىلدى. مۇندا مادەنيەت ءۇيى, بالاباقشا, قوعامدىق مونشا, ورتا مەكتەپ جانە اكىمشىلىك عيماراتتار بوي كوتەردى. سول ءۇشىن ءوزى مۇشەسى بولىپ تابىلاتىن كومپارتيادان قۇقاي كورىپ, قىزمەتىنەن الىندى. ونىڭ ەسىمىن جەرلەستەرىمىز قاشاندا قۇرمەت تۇتادى. ءوزى تۇرعىزعان مادەنيەت ءۇيىنىڭ الدىنا اسىل ازاماتقا ارنالعان ەسكەرتكىش قويۋىمىزدىڭ ءمانى وسىندا, – دەيدى اۋىل اكىمى ە.ءىلياسوۆ.
اۋىل تۇرعىندارىنىڭ بويىنداعى تاعى ءبىر جاقسى قاسيەت – ءوز اۋىلىن شەكسىز ءسۇيىپ, ونىڭ ءبىر كادەسىنە جاراۋعا ارقايسىسىنىڭ ءازىر تۇراتىنى. وزدەرى تۋىپ-وسكەن توپىراقتى قادىرلەپ, قاشاندا وعان جاناشىرلىقپەن قارايتىن قوشانكولدىكتەردىڭ بۇل جاقسى قاسيەتى وزگە اۋىل تۇرعىندارىنا دا ءسىڭىستى بولسا يگى.
تەمىر قۇسايىن,
جۋرناليست
باتىس قازاقستان وبلىسى,
قازتالوۆ اۋدانى,
قوشانكول اۋىلى
