ايماقتار • 13 مامىر، 2021

باتىس قازاقستاندا جاڭا قاۋلى شىقتى

190 رەت كورسەتىلدى

باتىس قازاقستان وبلىسىنىڭ باس سانيتار دارىگەرى وبلىس اۋماعىندا كارانتيندىك شەكتەۋ شارالارىن كۇشەيتۋ جانە «Ashyq» جوباسىن ەنگىزۋ تۋرالى جاڭا قاۋلى شىعاردى. وسىعان بايلانىستى وڭىردە مامىردىڭ 15-ىنەن باستاپ جاڭا تالاپتار كۇشىنە ەنەدى، دەپ حابارلايدى Egemen.kz.

جاڭا قاۋلىدا باس سانيتار مەملەكەتتىك ورگاندار مەن كۆازيمەملەكەتتىك سەكتور ۇيىمدارى قىزمەتكەرلەرىنىڭ كەمىندە 80%-ى، ال جەكە كاسىپكەرلىك نىساندارى قىزمەتكەرلەرىنىڭ كەمىندە 50%-ى قاشىقتان جۇمىس ىستەۋىن ۇسىنعان. بىراق بۇل تالاپ حالىقتىڭ تىنىس-تىرشىلىگىن قامتاماسىز ەتەتىن جانە ەپيدەمياعا قارسى ءىس-شارالارعا تارتىلعان قىزمەتتەرگە جۇرمەيدى.

جينالىستار، كەڭەستەر، سەمينارلار، كونفەرەنتسيالار بۇرىنعىشا سەلەكتورلىق رەجيمدە، بەينەكونفەرەنتسبايلانىس ارقىلى وتكىزىلگەنى ءجون.

وڭىردەگى كاسىپكەرلىك نىساندارى اراسىندا «Ashyq» قوسىمشاسىن قولدانۋ، ەنگىزۋ جانە پايدالانۋ بويىنشا ءتۇسىندىرۋ جۇمىسى تۇراقتى ءجۇرىپ جاتىر. ءدال وسى «Ashyq» قوسىمشاسىنىڭ كومەگىمەن مامىر ايىنىڭ باسىنان بەرى 40-تان اسا ادامنىڭ كارانتين تالابىن بۇزعانى انىقتالدى. Covid-19 دياگنوزى انىقتالعان 15 ادام ورال قالاسىندا، 2 ادام اقساي قالاسىندا كارانتين تالابىن ساقتاماي، ساۋدا ۇيلەرىنە كىرمەك بولعان. تاعى 24 ادام «سارى دارەجەسىنە» - ياعني كوروناۆيرۋس جۇقتىرعان ناۋقاسپەن قارىم-قاتىناستا بولعانىنا قاراماستان وقشاۋلانۋ ءتارتىبىن ساقتاماعان.

«ۆيرۋس تاراتۋشى ادامدار وقشاۋلانۋ ءتارتىبىن ساقتاماي وتىر»، دەيدى وبلىستىڭ باس سانيتار دارىگەرى مۇحامعالي ارىسپاەۆ.

باتىس قازاقستان وبلىسى اكىمىنىڭ ءبىرىنشى ورىنباسارى مۇحتار مانكەەۆ مۇنداي ءتارتىپ بۇزۋشىلارعا قاتاڭ شارا قولدانۋدى تاپسىردى.

ء«بىز ەڭ الدىمەن تۇرعىنداردىڭ قاۋىپسىزدىگىن ويلاۋىمىز كەرەك. سوندىقتان قاۋىپتى ۆيرۋستى ودان ءارى تاراتىپ، جاۋاپسىزدىققا جول بەرۋگە بولمايدى»، دەدى م.مانكەەۆ.

قاۋلىدا ءوڭىر تۇرعىندارى مەن مەيماندارعا رەسپيراتورلىق ينفەكتسيانىڭ العاشقى بەلگىلەرى پايدا بولسا، مەديتسينالىق ۇيىمدارعا بارماي، 103 ءنومىرى ارقىلى جەدەل مەديتسينالىق كومەكتى شاقىرۋ، جاسى 65-تەن اسقان ادامدارعا ازىق-ت ۇلىك، ءدارى-دارمەك پەن مەديتسينالىق بۇيىمداردى، سونداي-اق قاجەتتى تاۋارلاردى ساتىپ العاندا نەمەسە مەديتسينالىق مەكەمەلەرگە بارعاندا بولماسا، ۇيىنەن شىقپاۋعا كەڭەس بەرىلگەن. ال جەرلەۋ شارالارىنا مارقۇمنىڭ ەڭ جاقىن وتباسى مۇشەلەرى، جاقىن تۋىستارىنان ەڭ كوپ دەگەندە 20 ادام عانا جينالۋىنا رۇقسات بەرىلگەن. بۇقارالىق، ۇجىمدىق، وتباسىلىق، ەستەلىك ءىس-شارالاردى جەكە ۇيدە دە، ارنايى ورىنداردا دا وتكىزۋگە تىيىم سالىنعان.

دەگەنمەن، كوروناۆيرۋستىڭ تارالۋ كورسەتكىشتەرى تومەندەسە، كارانتين تالاپتارىن جەڭىلدەتۋ دە كوزدەلىپ وتىر. قازىردىڭ وزىندە اۋىل شارۋاشىلىعىمەن اينالىساتىن نىساندار، اۆتوجۋ، اۆتوموبيلدەر مەن تۇرمىستىق تەحنيكانى، كيىمدى جوندەۋ شەبەرحانالارى، تىگىن اتەلەلەرى، كىر جۋ، حيميالىق تازالاۋ، ت.ب. بويىنشا قىزمەتتەر كارانتين تالاپتارىن ساقتاي وتىرىپ 15 مامىردان باستاپ شەكتەۋسىز جۇمىس ىستەۋگە كوشەدى. مۇنداي مەكەمەلەر قاتارىنا تۋريستىك كومپانيالار مەن بيزنەس ورتالىقتار، مۇراجايلار مەن كىتاپحانالار، ت.ب. كوپتەگەن نىساندار قوسىلدى. ەپيدەميولوگيا احۋالى جاقسارسا، مامىردىڭ ەكىنشى جارتىسىنان باستاپ قالالار مەن اۋدان شەكارالارىنداعى بلوك-بەكەتتەر دە الىنىپ تاستاۋى مۇمكىن.

كۇنى بۇگىنگە دەيىن باتىس قازاقستان وبلىسىندا 20 671 ادام كوروناۆيرۋس جۇقتىرعان. مامىر ايىنىڭ باسىنان بەرى 1331 ادامنان ۆيرۋس انىقتالدى. 5-11 مامىر ارالىعىندا ۆيرۋس جۇقتىرعانداردىڭ سانى – 862 ادام. ياعني وسىنىڭ الدىنداعى اپتامەن سالىستىرعاندا اۋرۋدىڭ تارالۋى 7،5 پايىزعا ازايعان.

 

باتىس قازاقستان

سوڭعى جاڭالىقتار

دوللار قايتادان قىمباتتادى

قارجى • بۇگىن، 15:00

ۇقساس جاڭالىقتار