قوعام • 13 مامىر، 2021

اۆياتسيا سالاسى قولداۋعا مۇقتاج

24 رەت كورسەتىلدى

توسىننان كەلگەن توقىراۋ اۋە نارىعىن دا اينالىپ وتكەن جوق. بىلتىر توتەنشە جاعداي جاريالانا سالىسىمەن رەيس بىتكەن توقتادى. حالىقارالىق تۇرماق، ىشكى رەيستەردىڭ وزىمەن ۇشۋدىڭ اۋرە-سارساڭى كوبەيىپ كەتتى. وتاندىق اۋە كومپانيالارى جوسپارلاپ قويعان تابىستارىنان قاعىلىپ، جان ساقتاپ قالۋدىڭ ءوزى ۇلكەن جەتىستىككە اينالدى. 2020 جىلى اۋە كومپانيالارى تيىن-تەبەنگە قاراپ قالدى دەسە دە بولعانداي.

رەيس ازايدى، قارىز كوبەيدى

2019 جىلى كومپانيالار 403 ملرد تەڭگەنى شىتىرلاتىپ ساناپ السا، بىلتىرعى تابىس نەبارى 187،7 ملرد تەڭگەمەن شەكتەلگەن. وسى ورايدا وتاندىق اۋە كومپانيالارىنا حابارلاسىپ، قازىرگى حال-احۋالىن، شىعىن كولەمىن، قولداۋعا قانشالىقتى ءزارۋ ەكەنىن، الدا بولۋى مۇمكىن قاتاڭ شەكتەۋگە دايىندىعىن، باعا ساياساتىنىڭ قالاي وزگەرگەنىن سۇراپ بىلدىك.

2020 جىلى Air Astana اۋە كومپا­نيا­سى­نىڭ تابىسى 2019 جىلمەن سالىس­تىرعاندا 81 پايىزعا ازايىپ، 33،1 ملن دوللار بولىپتى. دەگەنمەن اۋە كوم­پا­نيا­سىنىڭ وكىلدەرى پاندەميانىڭ اۋىر زارداپ اكەلگەنىنە قاراماستان، وزدە­رى­نىڭ قارجىلىق جاعدايىن تۇراقتى دەپ باعا­لايدى. 2021 جىلدىڭ قاڭتار-اقپان ايلارىنداعى قارجىلىق كورسەتكىشى 2017 جىلدان كەيىنگى ەڭ جوعارى دەڭگەيگە جەتكەن. ءسىرا، مۇنى ءوز-ءوزىن جۇباتۋ دەپ تە باعالاۋعا بولاتىن شىعار. ويتكەنى بىلتىر اۋە ساپارلارىنىڭ كۇرت قىسقارۋىنا باي­لانىستى كومپانيا قىزمەتكەرلەرىنىڭ ۇشتەن ەكىسىن اقىلى ەڭبەك دەمالىسىنا جى­بەرگەن.

– بوس تۇرىپ قالۋ رەجىمىنە كەت­­كەندەرگە جالاقىنىڭ 50 پا­يى­­زى تولەندى. بارلىق سىرتقى ۆاكان­­سيالاردى بەلگىسىز مەر­زىم­گە دەيىن توقتاتتىق. قازىر اۋە كومپانياسىنىڭ «حالىق بانك قازاقستان» اق الدىندا 156،4 ملن دوللار كولەمىندە قارىزى بار. مەملەكەت الدىندا قارىزىمىز جوق. قارىز جۇك­تە­مەسىن تومەندەتۋدىڭ ءبىر نۇس­قا­سى – ۇلتتىق بانكتىڭ اۆياتسيا سالاسىندا جۇمىس ىستەيتىن كۆازيمەملەكەتتىك كومپانيالارعا (COVID-19 پاندەمياسىنان كوپ زارداپ شەككەن) مۇمكىندىك بەرەتىن شاعىن جانە ورتا بيزنەستى جەڭىلدەتىلگەن نەسيەلەۋ باعدارلاماسىنا تۇزەتۋلەر ەنگىزۋ. تاعى ءبىر نۇسقا – «دامۋ» قورىنىڭ ءىرى كاسىپكەرلىكتى قولداۋ باعدارلاماسىنا (ەكىنشى دەڭگەيلى بانكتەردەن الىنعان زايمدار بويىنشا سىياقىنىڭ ءبىر بولىگىن سۋبسيديالاۋ) وزگەرىستەر ەنگىزۋ، – دەلىنگەن كومپانيا ءباسپاسوز قىزمەتىنىڭ جاۋابىندا.

Qazaq Air اۋە كومپانياسى 2020 جىلى الدىن الا جوس­پار­لان­عان تابىستىڭ 40 پا­يىزىن الا الماعان.

– 2020 جىلى كومپانيا تابىسى 2019 جىلمەن سالىستىرعاندا 5 پايىزعا نەمەسە 7 ملن 652 مىڭ تەڭگەگە دەيىن تومەندەدى. دەگەنمەن ۋاقتىلى قابىلدانعان ەكونوميكانى قولداۋ شارالارى ارقىلى 2019 جىل دەڭگەيىندەگى ناتيجەلىلىكتى قام­تا­ماسىز ەتە الدىق. پاندەميا كەزىندە جانە ودان كەيىن دە اۋە كومپانياسى جۇ­مىس­­شىلاردى قىسقارتقان جوق. جالاقى دا ۋاقتىلى تولەندى. 2020 جىلدىڭ كوكتەمىندە ءبىر جارىم اي بويى جۇمىس توقتاپ تۇردى. سوسىن 1 مامىردان باستاپ كەزەڭ-كەزەڭىمەن رەيس­تەر جاسالا باستادى. ءبىرىنشى ايدا كومپانيا جۇ­مىس­شىلاردى اقىلى ەڭبەك دەمالىسىنا جىبەردى. ەكونوميكالىق قورعاۋ ماق­سا­تىندا لوكداۋن كە­زىندە ءبىر ايداعى جالاقىنى 40 جانە 20 پايىزعا قىسقارتۋ تۋرالى ءبىراۋىزدان شەشىم قابىلدانىپ، جازعى قىزمەت دەڭگەيىمىزدى قالپىنا كەل­تى­رۋگە تىرىستىق، – دەيدى كومپانيا.

كومپانيانىڭ قازىرگى ساتتە قانداي دا ءبىر قارىزى بار ما؟ بۇل سۇراققا Qazaq Air «كومپانيامىز «سامۇرىق-قازىنا» اق اكتسيونەرى ۇسىنعان زاەمدىق قاراجات ەسە­بى­نەن قارجىلاندىرىلادى. قارىز پورتفەلى بويىنشا دەرەكتەر جىل سايىنعى اۋديتورلىق قارجىلىق ەسەپتە تولىققاندى كور­سەتىلگەن»، دەپ جاۋاپ بەردى. ولار ازا­مات­تىق اۋە تاسىمالىنا مەملەكەت قول­دا­ۋى تۇراقتى نەگىزدە كورسەتىلۋى كەرەك دەپ سانايدى.

– تاياۋ شىعىس، ەۋروپا نەمەسە كورشىلەس رەسەي، قىتاي ەلدەرىمەن سالىستىرعاندا بىزدەگى اۋە تاسىمالى ءالى قالىپتاسۋ ساتىسىندا تۇر. اۋە تاسىمالى بويىنشا الەمدەگى تابىستى گيگانتتاردىڭ وزىنە مەملەكەت قولداۋى كورسەتىلگەن. ويتكەنى اۋە مارشرۋتتارىنىڭ ينفراقۇرىلىمى ەلدىڭ ەكو­نوميكالىق نەگىزى ىسپەتتى. قۇرى­لىستا كاپي­تالدى كوپ قاجەت ەتە­تىن ينۆەستيتسياعا مۇق­تاج اۋە­جاي­لاردىڭ جەرۇستى ينفرا­قۇ­رى­لىمىنا كوڭىل بولۋمەن قاتار اۋە پاركىن كەڭەيتۋ جانە حالىقارالىق رەيستەردى ورىنداۋ، مۇددەلەردى قورعاۋ بويىنشا دا وتاندىق اۋە كومپانيالارىنا قولداۋ وتە قاجەت، – دەيدى.

حالىقارالىق رەيستەن قايران جوق...

SCAT اۋە كومپانياسى 2019 جىلى 2  ملن 300 مىڭ جو­لاۋشى تاسىمالداسا، 2020 جىلى 1 ملن 260 مىڭ جولاۋشى عانا تاسىمالداعان. بىلتىر حا­لىقارالىق رەيستەر نەگىزىنەن قاڭتار-اقپان ايلارىندا عانا ورىندالىپ، سوسىن ۇزاق ۋاقىتقا دەيىن توقتاپ قالعاندىقتان، SCAT رەپاترياتسيالىق رەيستەر ەسەبىنەن جان باققان.

2020 جىلدىڭ مامىر، ماۋسىم ايلارىندا كومپانيا ارمەنيا، رەسەي، گرۋزيا، جاپونيا، ءباا، تايلاند، ومان، تۇركيا، چەحيا جانە كورەيا ەلدەرىنەن قازاق­ستاندىقتاردى الىپ كەلدى. ءباس­پاسوز قىزمەتىنىڭ جاۋابىنشا، پاندەمياعا دەيىن كومپانيا 85 تۇراقتى جانە 40 تۋريستىك با­عىت بويىنشا رەيستەر ورىنداپ، جىل سايىن جاڭادان 10 باعىت اشىپ وتىرعان. ال قازىر تۇ­راق­تى نەگىزدە «اقتاۋ – ۇرگەنىش» جانە «شىمكەنت – ىستانبۇل» باعىتتارىن قا­نا­عات تۇتۋعا ءماج­بۇر.

– 2020 جىلى اۋە كومپا­نيا­سى­نىڭ تىكەلەي شىعىندارى 12 ملرد تەڭگەنى قۇرادى. بۇدان بولەك، كومپانيا 1،8 ملرد تەڭگە كولەمىندە ورىندالماعان رەيستەردىڭ بيلەت قۇنىن 100 پايىز قايتارىپ بەردى. ەلدەگى تج كەزىندە كومپانيا 3 مىڭ رەيستى توقتاتتى. بۇل – 98 مىڭنان استام بيلەت. 2019 جىلدىڭ ءبىرىنشى توقسانىندا 433 مىڭ جولاۋشى تا­سىمالداساق، 2021 جىلدىڭ ءبىرىنشى توق­سا­نىندا بۇل كورسەتكىش 404 مىڭدى قۇرادى. حالىقارالىق رەيستەردىڭ ەداۋىر قىسقارۋىنا بايلانىس­تى تابىس تا تو­مەن­دەدى. 2020 جىلدىڭ ءساۋىر ايىندا ين­دۋستريا جانە ينفراقۇرىلىمدىق دامۋ مينيسترلىگى ازاماتتىق اۆياتسيا كو­مي­تە­تى­مەن بىرلەسىپ، اۆيا­تسيا سالاسىن قولداۋ شارالارىن ۇيىمداستىردى. ۇكىمەت 20 ساۋىردە بىرقاتار سالىق پەن الەۋمەتتىك تولەمدەر ستاۆكاسىنا بايلانىستى «0» تۇزەتۋ كوەففيتسيەنتىن ەنگىزۋ تۋرالى قاۋلى شىعاردى. ءۇش ايعا جۇمىسشىلاردىڭ جالاقىسىنان ەسەپتەلەتىن سالىقتاردان بوساتۋ شاراسى ۇسىنىلدى. كومپانيا بۇل قاراجاتتى وندىرىستىك قىز­مەت­كە باعىتتاۋعا مۇمكىندىك الدى، – دەيدى SCAT وكىلى.

Air Astana دا حالىقارالىق رەيستەردىڭ ءبىرشاما شەكتەلىپ قالعانىن مالىمدەدى. باعىتتار بويىنشا عانا ەمەس، اپتاسىنا جۇزەگە اسىرىلاتىن رەيستەر سانى دا ازايعان.

 

جولاۋشىلار اعىنى ارتا باستادى

جىل باستالعالى ءۇش ايدا Air Astana 1،3 ملن جولاۋشى تاسىمالداعان. 2020 جىل­دىڭ ءۇش ايى­مەن سالىستىرعاندا 8 پا­يىز­عا كوپ.

– 2020 جىلى كومپانيا 3،7 ملن جولاۋشى تاسىمالدادى. بۇل جوسپارلانعان دەڭگەيدەن 54 پايىزعا تومەن. تج جاريا­لانىپ، تۇراقتى رەيستەر توقتاعان كەزدە Air Astana پاندەمياعا بايلانىس­تى پايدالانىلماعان بيلەتتەر اقىسىن تولىق كولەمدە قايتاردى. جولاۋشىلارعا ءوز بيلەتتەرىن باسقا مەرزىمگە قايتا بروندايتىن، ءتىپتى باعىتتى وزگەرتەتىن دە مۇمكىندىك ۇسى­نىلدى. كليەنت­تەرىمىزدىڭ سەنىمى مەن ادال­دىعى ءبىز ءۇشىن اسا ماڭىزدى، – دەيدى Air Astana.

Qazaq Air 2020 جىلدىڭ قورىتىن­دىسى بويىنشا 432 مىڭ جولاۋشى تاسى­مال­دا­عانىن، بۇل 2019 جىلمەن سالىس­تىر­عاندا 15 پايىزعا جوعارى ەكەنىن مالىمدەيدى.

– نۇر-سۇلتان قالاسىنداعى بۇرىن قۇرىلعان ايماقارالىق حاب ارقىلى جاڭا مارشرۋتتىق جەلىنىڭ قۋاتتىلىعى ارتتى. اۋە رەيستەرىنىڭ سانى مەن تۇراقتى اۋە مار­شرۋتتارى كوبەيدى. جولاۋ­شى­لار اعىنىنىڭ ايتارلىقتاي كوبەيۋى قازاق­ستان­دىقتاردىڭ Qazaq Air كومپانيا­سى­مەن ۇشۋدى قولاي كورەتىنىن اڭعار­تا­دى. 2020 جىلمەن سالىستىرعاندا 2021 جىلدىڭ ءبىرىنشى توقسانىندا جولاۋشىلار اعىنى 65 پايىزعا ۇلعايدى. ءبىزدىڭ كومپانيا قازىرگى تاڭدا حالىقارالىق رەيستەردى ورىنداپ جاتقان جوق، – دەيدى كومپانيا.

SCAT داعدارىس ساتىندە قىز­مەت­كەر­لەردى قىسقارتپاعان. ونىڭ ىشىندە شە­تەل­دىك قىز­مەت­كەرلەردى دە.

– بىلتىر اۋە تاسىمالداۋ­شىسى جۇمىس ورىندارىن 100 پايىز ساقتاپ قالۋ ءۇشىن بارلىق مۇم­كىن شارالاردى جاسادى. بۇل ماقساتقا قول جەتكىزۋ ءۇشىن تج رەجىمى كەزىندە ۇنەمدەۋ رەجىمىن ىسكە قوستىق. اكىم­شىلىك دەپارتامەنتتەردىڭ ءبىراز بولىگى قا­شىقتان جۇمىس ىستەپ، ولار تومەنگى جالاقىمەن قامتاماسىز ەتىلدى. ستراتەگيالىق ماڭىزى بار قىزمەتتەر شتاتتىق رە­جىم­دە جۇمىس ىستەدى. تج كە­زىندە قازاقستان اۋەجايلارىندا قوسىم­شا اۋە كەمەلەرى ورنالاس­­تى­رىلىپ، رەزەرۆتىك ەكيپاجدار كەزەكشىلىك اتقاردى. اۋە تاسى­مال­دارىنىڭ قايتا جاندانۋى سەبەپتى بارلىق دەپارتامەنت قاۋىپسىزدىك تالاپ­تا­رىن ساقتاي وتىرا قالىپتى جۇمىس كەس­تەسىنە اۋىستى. جولاۋشىلارمەن تىكە­لەي بايلانىساتىن جانە اۋە كەمەلە­رى­مەن جۇ­مىس ىستەيتىن بارلىق پەرسونال كۇن­دە­لىكتى مەديتسينالىق تەكسەرۋدەن وتەدى، – دەپ جاۋاپ بەردى كومپانيا.

«جەتىسۋ» اۋە كومپانياسى 2019 جىلى 61 042 جولاۋشى تاسىمالداسا، 2020 جىلى 52 585 جولاۋشى تاسىمالداعان. «2021 جىل­دىڭ باسىنان بەرى جولاۋشىلار اعىنى وڭ ديناميكا كورسەتكەن جوق»، – دەيدى كومپا­نيا.

باعا ساياساتى قالاي وزگەردى؟

Air Astana ۆيتسە-پرەزيدەنتى ايدار قوشقارباەۆ ىشكى مارشرۋتتار بو­يىنشا قوسىمشا قۇن سالىعىنا نولدىك ستاۆكا ەنگىزۋ جانە ليزينگتەگى ۇشاقتار ءۇشىن الىنعان بولشەكتەرگە بەرىلەتىن سالىق جەڭىلدىگىن ۇزارتۋ تۋرالى ۇسى­نىس بىلدىرگەن ەدى. كومپانيا ءباس­پا­سوز قىزمەتىنىڭ جاۋابىندا اتالعان باس­تا­مانىڭ مەملەكەت تاراپىنان قولداۋ تاپپاعانى ايتىلدى.

– اتالعان باستاماعا وڭ كوز­­قاراس تانىتۋ 2020 جىلعى ۇلت­تىق ۆاليۋتانىڭ قۇنسىزدانۋى جاعدايىندا تاريفتەردى ۇستاپ تۇرۋعا (شىعىنداردىڭ 70 پايىزى شەتەل ۆاليۋتاسىندا كورسەتىلگەن كەزدە)، جو­لاۋ­شىلار اعىنىن قالپىنا كەلتىرۋگە، اۋە يندۋستريا­­­سى قاتىسۋشىلارىنان تۇسە­تىن تابىس جانە باسقا دا سالىق تولەم­دە­رى كولەمىنىڭ ارتۋىنا مۇمكىندىك بەرۋشى ەدى. وكىنىشكە قاراي، وڭ شەشىم شىقپادى. رەسەيدە ىشكى رەيستەردە قوسىمشا قۇن سالىعىنا نولدىك ستاۆكا قولدانىلىپ جاتىر. باستاپقىدا ولار بۇل شەشىمدى 10 جىل مەرزىمگە دەپ قابىلداپ، كەيىن مەرزىمىن شەكتەۋسىز ەتىپ جاسادى. پاندەمياعا بايلانىس­تى اۋە كومپانيالارىنا سالىق اۋىرتپالىعىن تومەندەتۋ ماق­ساتىندا قوسالقى بولشەكتەر يمپورتىنا سالىق جەڭىلدىكتەرىن 2021 جىلدىڭ سوڭىنا دەيىن توقتاتۋ تۋرالى ۇسىنىس ءالى قارالۋدا، – دەيدى كومپانيا. سونداي-اق كومپانيا «باعا ساياساتى وزگەرگەن جوق. وپەرا­تسيالىق قىز­­مەت­تەردىڭ قىس­قار­ۋى سالدارىنان شى­عىن­دار­دىڭ كۇرت ارتىپ كەتۋىنە قارا­­ماس­تان، اۋە كومپانياسى ءوز رەيس­تە­رىنە تاريف قۇنىن كوتەرگەن جوق»، دەپ مالىمدەدى.

Qazaq Air كومپانياسى دا قوسالقى بول­شەكتەردى يمپورتتاۋعا ارنالعان جەڭىل­دىكتىڭ ۇزارتىلۋىن قولدايدى.

– قازىرگى نورما قوسالقى بولشەكتەردىڭ 3-5 پايىزىن عانا قام­تىپ تۇرعاندىقتان، ءتىزىم كەڭەي­تىلۋى كەرەك دەپ سانايمىز. يم­پورتتىق سالىق بارەرلەرى جەرگىلىكتى ون­دىرۋ­شىلەردى قولداۋعا باعىتتالعان. بىراق پايدالانىلاتىن ۇشاقتارعا ارنالعان قوسالقى بولشەكتەر قازاقستاندا جانە ەاەو-دا شىعارىلمايدى. وسىلايشا، ۇشاقتارعا ارنالعان قوسالقى بولشەكتەردى كەدەندىك راسىمدەۋدەن وتكىزۋ اۋە بيلەتىنىڭ قۇنىن قىمباتتاتۋعا الىپ كەلەدى، – دەيدى. كومپانيا وكىلدەرىنىڭ ايتۋىنشا، ولار تومەنگى باعا سايا­ساتىن ساقتايدى جانە باعا مەن قىزمەتتەر اراقاتىناسىن ەسەپكە الا وتىرىپ تاريفتەر ازىرلەيدى.

– بيىل ناۋرىز ايىندا كومپانيا تاريف ساياساتىن قايتا قاراپ، تاريف سەتكاسىن تولىقتاي وڭتايلاندىردى. كومپانيا قازاق­ستان­دىقتاردىڭ دىتتەگەن مە­جەسىنە تەز ءارى جايلى جەتۋى ءۇشىن بازا­لىق كەستەنى جەتىلدىرۋ بويىنشا جۇمىستار جۇرگىزىپ جاتىر، – دەلىنگەن جاۋاپتا.

«جەتىسۋ» اۋە كومپانياسىنىڭ حابار­لا­ۋىنشا، 2020 جىلى تابىس 21 پا­يىزعا قۇل­دىراعان. «سوعان قاراماستان، قىز­مەت­كەرلەردى قىسقارتۋ بولعان جوق. ولار­دىڭ جالاقىسىن ۋاقتىلى تولەپ تۇردىق. كومپانيا جۇزەگە اسىراتىن رەيستەر سۋبسيديا ەسەبىنەن بولعاندىقتان، باعا ساياساتى پاندەميا كەزىندە وزگەرىسسىز قالدى»، دەيدى كومپانيا بەرگەن جاۋابىندا.

SCAT 2020 جىلدىڭ ماۋسىم ايىندا جۇ­مىس ىستەۋدىڭ بالاما مودەلىنە كوشىپ، جاڭا جاعداي بويىنشا تاريفتەردىڭ 3 كاتەگورياسىن – LIGHT، OPTIMUM جانە FLEX تاريفتەرىن ۇسىنىپ وتىر.

 

ونلاين قىزمەت كورسەتۋ

داعدارىس سالقىنىن سەزگەن سوڭ كومپانيا ءوز ماركەتپلەيسىن قانشالىقتى جە­تىل­دىردى دەگەن سۇراققا ەكى اۋە كومپانيا­سى جاۋاپ قاتتى. Air Astana-نىڭ اي­­­­­تۋىنشا، ەلەكتروندى پوشتا جانە SMS-حابار­لاما سياقتى ءداستۇرلى تاسىلدەن بولەك، كورپوراتيۆتى سايتتا باراتىن ەلدىڭ ساني­­­تارلىق تالاپتارى، سونداي-اق ۇشۋ سا­پارىن توقتاتۋ نەمەسە قايتا جاڭارتۋ بويىنشا وزەكتى اقپاراتتاردى جاريالاپ وتىراتىن ارنايى پاراقشا اشىلعان.

– «ونلاين-كونسۋلتانت» فۋنك­­تسياسىن دا ىسكە قوستىق. جو­لاۋ­­شىلار باسقا مەملەكەتتە وتى­رىپ-اق اۋە كومپانيا­سى­مەن بايلانىس ورناتا الادى. ءبىز قۇراستىرعان چات-بوت جىلدام ءارى ناقتى جاۋاپ بەرىپ، جولاۋ­شىلاردى سەنىمدى اقپاراتقا باعىتتايدى، – دەيدى كومپانيا.

Qazaq Air دە كليەنتپەن جۇمىس ىستەۋ فۋنكتسياسىن بارىنشا جەتىلدىرگەن سەكىلدى.

– 2020 جىلى كومپانيا بي­لەت­تەردى برونداۋدىڭ جاڭا جۇيەسى مەن الدەقايدا ىڭ­عاي­لى ينتەرفەيسكە يە جاڭا ۆەب-سايتتى ىسكە قوستى. www.flyqazaq.com سايتىنان بيلەت ساتىپ الۋ كەزىندە جولاۋ­­­شىلار الدىن الا بورتتاعى ورىندى برونداپ، باگاج نەمەسە قول جۇگى كولەمىن كەڭەيتىپ، ءۇي جانۋار­­لارى مەن سپورت قۇرالدارىن تاسىمالداۋدى رەزەرۆتەي الادى. سونىمەن قاتار IQ Bonus ادالدىق باعدارلاماسىن ىسكە قوستىق. ونىڭ قاتىسۋشىلارىنا بيلەتكە جەڭىلدىك (3 پايىزعا دەيىن) نەمەسە Qazaq Air رەيستەرىمەن ۇشقانى ءۇشىن بونۋستار جيناۋ مۇمكىندىگى ۇسىنىلادى. جينالعان بونۋستاردى ارنايى بونۋستىق بيلەتكە اۋىستىرۋعا بولادى، – دەيدى.

 اۋە كولىگى حالىقارالىق قا­ۋىم­­داستىعىنىڭ (IATA) دەرە­گىنە سۇيەنسەك، 2020 جىلى حالىقا­را­لىق جولاۋشىلار تاسىمالىنا دەگەن سۇرانىس 2019 جىلعى دەڭگەيدەن 75،6 پايىزعا تومەن بولعان. ىشكى سۇرانىس ءبىر جىلدا 48،8 پايىزعا ازايعان. IATA 2021 جىلى اۆياتسيا سالاسى 47،7 ملرد دوللار جو­عالتادى دەپ بولجايدى.

«اتامەكەن» ۇلتتىق كاسىپ­كەرلەر پالاتاسى لوگيستيكا جانە تاسىمالداۋ كوميتەتىنىڭ ازا­ماتتىق اۆياتسيا جونىندەگى قوسالقى كوميتەتىنىڭ توراعاسى داۋلەت حامزين ء«ىشىنارا كورسە­تىل­گەن مەملەكەت قولداۋى اۆيا­تسيا سالاسىنىڭ جاعدايىن تۇ­زەي المادى» دەيدى.

– شاعىن جانە ورتا بيزنەس قولداۋ تاپتى دا، ءىرى اۋە كومپانيالارى مەن اۋەجايلار مەملەكەتتىك قولداۋ پاكەتى باعىتتالعان كاسىپ­ورىن­دار تىزىمىنە ەنگەن جوق. ناتي­جە­سىندە، اۋە كاسىپورىندارى ەكىنشى، ءۇشىنشى توقساندا م ۇلىك جانە جەر سالىعىن تولەۋدەن عانا بوساتىلدى، – دەيدى د.حامزين. ونىڭ ايتۋىنشا، كەيبىر اۋە­جاي­لار­دا جۇمىسشىلار قىسقارىپ، جالاقى ۋاقتىلى بەرىلمەي، قاجەتتى تەحنيكالار ساتىپ الىنباي قالعان. ال مۇنىڭ ءبارى اۋە ساپارلارىنىڭ قاۋىپ­سىزدىگىنە تەرىس اسەر ەتكەن. سونداي-اق اۋەجاي تەرريتوريا­سىندا ورنا­لاس­قان شوب سۋبەكتىلەرىنىڭ جال­عا الۋ اقىسىن تولەۋدەن بوساتىلۋى دا اۆياتسيا سالاسى ءۇشىن قوسىمشا اۋىرت­پالىققا اينالعان.

سوڭعى جاڭالىقتار

دوللار قايتادان قىمباتتادى

قارجى • بۇگىن، 15:00

ۇقساس جاڭالىقتار