«استانا وپەرا» ارتىستەرى مەرەكەلىك رەپەرتۋاردى ايرىقشا جاۋاپكەرشىلىكپەن ازىرلەدى. كونتسەرتتەردىڭ باعدارلاماسى بەيبىتشىلىك ءۇشىن ايانباي كۇرەسكەن قايسار جانداردىڭ باتىرلىق پەن باتىلدىققا تولى ءومىر جولى تۋرالى مادەني ەستەلىكتەردى ساحنا تورىنە شىعارۋدى كوزدەدى.
تىڭدارمان نازارىنا ۇسىنىلعان «كوكتەمنىڭ جەڭىس سيمفونياسى» كونتسەرتىنىڭ اۆتورى – ماەسترو ابزال مۇحيتدين «استانا وپەرا» سيمفونيالىق وركەسترىنە جەتەكشىلىك ەتەدى. تانىمال ديريجەر كلاسسيكالىق مۋزىكا جاۋھارىن – د.شوستاكوۆيچتىڭ №7 سيمفونياسىن («لەنينگرادتىق») ورىندادى. اتالعان مۋزىكالىق شىعارمادا سوعىستىڭ قاسىرەتتى العاشقى ايلارىندا تۋعان, وندا لەنينگرادتىقتاردىڭ ءوز قالاسى مەن ەلىنە دەگەن جانكەشتىلىگى مەن شەكسىز ماحابباتى, ەڭ باستىسى – جەڭىسكە دەگەن قالتقىسىز سەنىمى باياندالادى. كەشتى ر.گليەردىڭ وركەستر مەن كولوراتۋرالىق سوپرانوعا ارنالعان كونتسەرتى جالعاستىردى, سوپرانو پارتياسىن باشقۇرتستاننىڭ ەڭبەك سىڭىرگەن ءارتىسى الفيا كاريموۆا ۇسىندى. سونىمەن قاتار ر.شتراۋستىڭ گوبوي مەن وركەسترگە ارنالعان كونتسەرتى شىرقالىپ, گوبويدىڭ جەكە پارتياسىن حالىقارالىق بايقاۋلاردىڭ لاۋرەاتى يسلام اليەۆ ورىندادى.
ال كامەرالىق زالدا وپەرا ونەرسۇيەر قاۋىمعا ارنالعان «ەستەلىك ءارى داڭقتى اندەر» كونتسەرتى باعدارلاماسىنا وپەرا سوليستەرى, حور ارتىستەرى مەن وركەستردىڭ ورىنداۋىنداعى قازاق, ورىس جانە باتىس ەۋروپالىق كلاسسيكانىڭ وزىق ۇلگىلەرى, سونىمەن قاتار سوعىس جىلدارىنداعى تانىمال اندەر مەن سۇيىكتى اۋەندەر ەندى. ءجاميلا جارقىمباەۆانىڭ ورىنداۋىندا م.يساكوۆسكيدىڭ سوزىنە جازىلعان كوپشىلىك ءسۇيىپ تىڭدايتىن «وگونەك» ءانى شىرقالدى, ايزادا قاپونوۆا م.يساكوۆسكيدىڭ ءسوزى مەن م.بلانتەردىڭ مۋزىكاسىنا جازىلعان «كاتيۋشا» كومپوزيتسياسىمەن ونەر كورسەتتى. ال المات ىزبامبەتوۆ پەن مۇقان تولەباەۆتىڭ «توس, مەنى توس» ءانىن ۇسىنسا, بۋلات وكۋدجاۆانىڭ ءسوزى مەن مۋزىكاسىنا جازىلعان اتاقتى «نام نۋجنا ودنا پوبەدا» ءانىن كورەرمەندەر كوپ جىلدار بويى ورىنداۋشىمەن بىرگە شىرقاپ كەلەدى.
– مادەنيەت پەن ونەرىمىزدى دامىتۋعا, ساتتىلىكتەرىمىزگە قۋانۋعا, جوسپار قۇرىپ, ەرتەڭگى كۇنىمىزگە ۇلكەن سەنىممەن قاراۋعا مۇمكىندىك بەرگەن بارلىق باتىرىمىزدى قۇرمەتتەيمىز, ولار ءبىزدىڭ ماڭگى جادىمىزدا. وسى ءبىر ايرىقشا كۇنى سوعىس جولىن ابىرويمەن وتكەن بارشا جانعا سۇيىسپەنشىلىك پەن ەرەكشە قۇرمەتىمىزدى بىلدىرەمىز, بارلىعىن مەرەكەمەن قۇتتىقتايمىز. مىقتى دەنساۋلىق, بىرلىك پەن كۇش-قۋات تىلەيمىز, – دەپ اتاپ ءوتتى «استانا وپەرا» ارتىستەرى.
